Bilik thaok binguk di urang kumei Thạc sĩ, họa sĩ Nguyễn Chế Kim Trung di jalan Ngô Gia Tự, TP. Phan Rang - Tháp Chàm, tỉnh Ninh Thuận hu yaok rituh blah thaot binguk nghe thuat, rup patau, lan am…ginup sambo mau hu dak saong tuan tagok biak gheih meta. Yaok blah thaot binguk lac sa kadha karei di gauk, hatai sahaneng karei cih tabiak rija roya, adat cambat, bruk ngak yang, raidiuk di urang Cam, anit ranam taneh ia. Abih di nyu lac bilik thaot  binguk di họa sĩ Chế Kim Trung hu parang biak ralo thaot ngan haong kadha “ Bac megru saong ngak tui jalan hadah krah siam mekre di Ho Chi Minh” yau "Lang Cham ơn Bac", “Mien Nam trong trai tim Bac”,  “Nguoi Cham làm theo loi Bac”… piah yaih khan tal urang mong iek. Gheih abih lac thaot  "Lang Cham ơn Bac", tapa but cih di họa sĩ Chế Kim Trung brei mboh raidiuk  di urang Cam, kinh te palei pala hu salih birau tapa thaot got gom điện, jalan mbak praong prang, sang bac, balai y te, mbaok meta chreih chrai. Hu yau nan lac meng hu Đảng, Karja, Wa Ho praong uranam. Njuak caik hatai lac kreh blah thaot ini hu thaot binguk urang Cam daok vin taom dar Wa Ho. Tapa nan, brei mboh hatung hatian di Wa biak jaik haong bhap bini. Rup sa-ai lac urang cih thaot jeng mboh hu bruk nan  saong cih tabiak piah brei mboh hatung hatai di urang Cam ngan haong Wa Ho praong uranam. Blah thaot binguk “Lang Cham ơn Bac” hu cih meng sơn dau akaok meti hu Ban Tuyên giáo Trung ương pokn brei giải thưởng Xuất sắc (thun 2010) ngan haong kadha “ Bac megru saong ngak tui jalan hadah krah siam mekre di Ho Chi Minh.”

Thạc sĩ, họa sĩ Nguyễn Chế Kim Trung khan lac: “ Meng daok sit mai, hinh tuong Wa Ho hu dalam hatai dahlak, praong tagok bac tagok veik, meng bruk nghe thuat cih thaot, dahlak cih vak thaot binguk Wa”

Meng nan, dom blah thaot binguk brei mboh bruk chreih chrai di kadha “Bac megru saong ngak tui jalan hadah krah siam mekre di Ho Chi Minh” di họa sĩ Chế Kim Trung hu Ban Tuyen giao Trung ương pok brei dom giai thuong yau “Bhum meraong negar dalam hatai baoh di Wa” (giải Xuất sắc, thun 2015); “ Urang Cam ngak tui panuac Wa Ho” (giải C, năm 2013); “Palei pala birau bhum Cam” (giải C, năm 2018);  “Bruk ngak lan am Cam” (giải C thun 2020);  “Bilan nyo rilo baoh” (giải C, thun 2020); “Menyim khan bai Cam khik ramik saong patagok” (giải B thun 2023),…Nan lac dom blah thaot brei mboh ilamo siam gheih di bangsa Cam, brei mboh hatai anit ranam jeng yau hatai jia di bhap bini tui Đảng, Wa Ho; rik tame dak padang bruk jum pataom taong abih bangsa dalam bruk cak rok patagok di bhum palei, taneh ia tui jalan Wa Ho praong uranam palih ruah. Mbiah tal harei ini, sa-ai hu abih tih 31 blah thaot mek hu giai thuong glong.  

Ong Thành Văn Tân, Bí thư chi bộ, Akok palei An Nhơn, xã Xuân Hải, huyện Ninh Hải, tỉnh Ninh Thuận ndom ka Thạc sĩ, họa sĩ Nguyễn Chế Kim Trung: “Hoa si Che Kim Trung lac sa urang anek Cam daok di bhum palei Blap, daok dalam palei dahlak mboh lac hoa si Kim Trung ini biak joi gheih cih tabiak rilo kadha, dalam nan hu rilo kadha cih ka Wa Ho hu ba ilamo Cam tame dalam thaot binguk nan. Tapa nan khik ramik veik ilamo Cam.”

Dak thau cambaih ka bruk ngak, ka raidiuk, jalan sahneng siam mekre hadah krah di Chủ tịch Hồ Chí Minh, lac anai gru, lac sa urang đảng, hoạ sĩ Chế Kim Trung tuk halei jeng sahaneng lac brei kham merat bac megru biak ralo, bac di Wa meng dom bruk sit di abih piah pasang rup drei blaoh ngak siam hu rilo bruk di drei, rik tame daong puk paga, palei negar.    

Langiu cih thaot,  hoạ sĩ Chế Kim Trung daok caik hatai ranam lan am Cam, haong hatai caong ba lan am Cam meng labik mbuan lahik gilac veik mai hu siam lagaih. Meng dom pandap lan am Cam jhuk bhong, labaih 10 thun tapa, sa-ai ba abih hatai roh duah, cih yaok ribau thaik thaot birau ba tame pandar ralo ngan haong bingula  biak mekre, hu tuai dalam saong langiu  negar takre blei. Jien mek tame meng lan my nghe  daong ka raidiuk bhap bini  palei Hamu Craok  hu tani tanat, hu hadah mbaok meta, piah kak kajap saong ba lan am Cam dak harei dak par glaong, yam tabiak dunya. Sa-ai Đàng Thị Minh Trọng- Po Labik ngak lan am mỹ nghệ Hải Âu, ban sit Phước Dân, huyện Ninh Phước, tỉnh Ninh Thuận khan lac: “ Tui mau ma hoa Trung si ngak tabiak, mikva ngak tui jeng pablei hu, ngak mbang jeng duah jien tame ka raidiuk…”  

Takik hu thei yau Chế Kim Trung, yaom lac bac tamat Sang bac su pham saong ngak gru pato tui hatai caong di sang drei, min sa-ai biak takre cih thaot binguk. Umo 30 thun, tuk anek likei ka dua birau hu 10 bilan, sa-ai tut angan  pakacah tame sang bac Đại học Mỹ thuật Ban raya Hồ Chí Minh piah bak hatai caong khin ngak hoa si. Hadei di 5 thun bac ĐH mek hu bằng thu khoa, sa-ai bac tagok veik abih 2 thun tra piah mek bằng Thạc sĩ pakat dunya nghệ thuật meta di sang bac Đại học Mahasarakham - Negar Thái Lan.

Họa sĩ Nguyễn Chế Kim Trung lac sa thạc sĩ, lac urang kumei cih thaot danei angan. Sa-ai danei angan oh lac urang kumei Cam cih thaot binguk akaok meti saong lac to ta-eng gait tal harei ini. Langiu  bruk cih thaot, sa-ai daok ngak gru pato di Pasak pato pakai thường xuyên – Hướng nghiệp tỉnh Ninh Thuận. Pak di ini, harei harei sa-ai patua veik dahlah apui pachreih ba dom rai uranaih, pabak hatai takre nghe thuat ka dom adei saih bac. 

Bac megru saong  ngak tui Wa Ho meng bruk mbuan mbiah dalam raidiuk, hoạ sĩ Nguyễn Chế Kim Trung tuk halei pato padar dom anek di drei brei diuk rai hu kein ka manuac sia. Rup sa-ai tuk halei jeng ngak siam piah ka anek bik mblak ngak tui, kham daong bruk puk paga./.