Di kreih langik pandiak, pa-uh pa-ang di bilan thu, Thiếu tá Nguyễn Phúc Thuận, Đồn Biên phòng Đắk Lao, tỉnh Đắk Nông pato tacei mikva palei Đắk Thọ, xã Đắk Lao, huyện Đắk Mil ilamo sangka phun cà phê. Thun ini, langik pandiak bhang biak khang, nao tal sang halei, saai jeng kakei mikva pruh ia patak pataom piah hu ia pandar tal puac bilan thu. Tukvak ini, phun caphe mboh tamuh dom janih ruak, abih di nyu nan lac rệp sáp, saai gam haong urang jakar ngak nong pato tacei mikva jalan pacang caga halak halieng habar piah hu siam lagaih. Thiếu tá Nguyễn Phúc Thuận brei thau:“Piah khik ka phun pajaih, athur raong lagaih, ye dahlak hu duah thau, pambuak haong dhar kapul urang ngak nong di xã, di huyện duah dom janih phun pajaih lagaih piah ba tabiak ka mikva pala. Ba sinh viên mai ndem mayai haong mikva dom jalan ngak lagaih piah ka mikva meda pandar. Dahlak jeng hu panuac caong ba dom urang jakar trun puk, palei piah hu mbaok tame daong ka dom baoh sang gaok kan kandah”

Ong Nguyễn Khắc Chinh, Bí thư Chi bộ palei Đắk Thọ, xã tapen negar Đắk Lao, huyện Đắk Mil brei thau lac, meng harei Thiếu tá Thuận hu brei bruk mai pak ini, dom mbang nyaom chi bộ palei chreih chrai tagok. Dom urang ndang jeng thau cambaih jang ka bruk ba akaok nao dahlau di drei, kham marat dalam cak rok patagok kinh tế, khang hatai salih rilo janih phun pala, athur raong, thâm canh phun cà phê. Palei daok hu rilo sang gaok kan kandah, Thiếu tá Thuận haong chi bộ palei hu jak ba, rik daong padang ngak 4 baoh sang anit ranam. Meng dom bruk ngak di Thiếu tá Thuận, mikva daok di bhum tapen negar dak jia tame dom urang lin biên phòng.“Sa-ai Thuận lac sa urang jakar ranaih umo, abih hatung hatian, sami samar dalam yaok bruk ngak. Kakei chi bộ saong mikva dalam palei ngak njauk dalam bruk khik ramik jalan tapen negar. Biak njauk iek praong iek glaong”.

Kham marat “klau pambuak, pak pagam” piah ngak tui jalan yau yuan lac "mưa dầm thấm lâu", dom urang ndang biên phòng hu ba mai hu mbaok dalam dom chi bộ palei di labik tapen negar Đắk Nông hu daong ka mikva dak harei dak salih jalan sahaneng, jalan ngak, paglaong raidiuk. Amuk H’Xuân, Phó Bí thư Huyện ủy Đắk Mil, khan lac. “Ngan haong dom urang lin biên phòng dalam huyện ye jeng padang ngak hu rilo bruk, rilo danak dak hu parabha biak praong glaong. Dom danak dak hu pambak tabiak, saong rahra dalam huyen taong yaom glaong. Rik tame dalam bruk dak padang bhum palei Đắk Mil, abih di nyu nan lac peih ngak dom sarak di ndang ka bruk cak rok patagok kinh tế xã hội saong padang ngak an ninh, quốc phòng di dalam huyện.”

Đại tá Bùi Đức Chính, Phó Chính ủy Bol lin biên phòng tỉnh Đắk Nông brei thau, dom thun tapa, Bol lin Biên phòng Đắk Nông hu mayaih khan 57 urang ndang mai sinh hoạt di 55 chi bộ puk palei; parabha 146 urang ndang tui iek yaok nyaom baoh sang di bhum tapen negar. Dom urang ndang hu patagok siam dom bruk ngak, daong ka pakat ủy, kanja paglaong prein pan akaok, peih ngak bruk cak rok patagok kinh tế, xã hội, khik kajap quốc phòng, an ninh.“Padang hệ thống chính trị dom xa bhum tapen negar khang kajap saong rilo danak dak bruk ngak karei hu peih ngak taong abih gah di 7 xa bhum tapen negar. Tapa nan hu pambak tabiak siam makre. Daong ka dom xa bhum tapen negar cak rok patagok taong abih gah kinh tế, xã hội, quốc phòng an ninh dak harei dak khang kajap”.

Ba urang ndang quân hàm hijao mai haong puk palei Đắk Nông, meng dom bruk ngak mboh di anak meta saong siam lagaih hu daong paglaong raidiuk di mikva dom bangsa, pabak pakhang talei jumpataom di bol lin saong rahra di bhum tapen negar. Daok jaik rahra, paglaong jang prein khang dalam rahra lac jalan ngak piah ka bol lin biên phòng Đắk Nông khik caga bhum tapen negar hu saron mbon saong dak harei dak cak rok patagok./.