Dalam dom harei puac adit, Pandanus Resort di Mui Ne, labik jirah main di Ban Phan Thiet, tinh Binh Thuan peih ngak bruk ba urang Cam meng di huyen Bac Binh nao tame ini piah ngak dom janih pandap mbang di bangsa Cam piah duh ka tuai damuai mai jirah main.

       Meng dom pandap panda hu mboh di puk palei tapa palak tangin gheih ghang di bhap bani hu jeng dom janih kaya mbang biak bingi, biak mek meta mai meng bruk pambuak di dom janih njam patam, hadang, ikan, ralo…

        Dom janih kaya mbang biak karei dalam dom pesta raya di urang Cam Binh Thuan hu thau tal nan lac: ginraong ya, bu, ikan kho, ikan am, abih di nyu lac aia tanut pabe mbang haong gem…

         Ong Lư Quốc Thiện, urang lambaok ka baoh sang putau bia urang Cam jaman dalau di palei Canar Tịnh Mỹ, xa Phan Thanh, huyen Bac Binh brei thau, ngan haong bhap bani Cam di Binh Thuan, pandap mbang oh njauk lac dom kaya mbang chit jien bo lac kadha gheij ghang saong mbuan mbiah, meda pandar dom janih pandap mbuan mbiaj piah ngak yau njam patam, rilo atau aia methil piah ngak jeng som janih pandap mbang biak bingi saong mbak carak.

“Jeng yau dom janih pandap mbang di dom bangsa karei, janih pandap mbang di urang Cam pak Bình Thuận nan lac thaik binguk lambaok ka bhum taneh bak pandiak saong angin. Ngan haong dom urang hu mbang tapa kaya mbang meng kan di urang Cam, meda taduan mek hu kadha ini.”

Ong Radek, sa urang tuai mai meng negar Ba Lan daok mbang aia tanut ralo pabe haong ghem khan lac yau ini:

       "Ini lac mbang akaok mereip dahlak mbang aia sup ini, nyu gam lamek gam thanh saong abih di nyu lac hu mbang haong rilo janih njam triak lapih, nyu ngak ka urang mbang oh njauk ngán. Daok ralo ye that, bingi, oh daok hagait de tuk mbang hu janih pandap ini."

      Langiu di dom janih kaya mbang mbak, bhap bani Cam di Binh Thuan daok hu rilo janih har, mboh rilo piah duh ka bruk ngak yang bhang. Dom janih har bhian hu mboh nan lac har tapei nung, tapei balik, ginraong riya... Yaok janih har nan lac sa hatai saneng ndom tagok bruk mbuan mbiah dalam rai diuk. Yaom jac pandap piah ngak tabiak hu mboh di puk palei, dalam glai saong langiu tasik.

        Pandap mbang di urang Cam Binh Thuan hu rilo janih saong ndung bak asal kadha biak karei, hu ngak jeng sa ilamo mbang huak biak karei ngan haong dom bangsa karei.

      Tukvak masa tapa, kaya mbang di bhap bani urang Cam daok di Binh Thuan hu iek prong dalam bruk pathau khan yau sa janih pandap panda rivang ma-in biak karei di tỉnh.

       Cambaih laih di Harei Kate, Mbang peih bruk hu caik sa labik karei piah meyaih khan ilamo meng kan di urang Cam, dalam nan hu pandap mbang. Mai meng nan, ilamo pandap mbang di bhap bani Cam hu yaih khan tabiak prong, ngak brei pachreih dak harei dak hu rilo tuai damuai mai haong le hoi di urang Cam.

         Urang roh duah Nguyễn Ngọc Ẩn hu pambuak bruk ba pandap mbang meng kan di urang Cam tame dalam menu janih mbang huak di Pandanus Resort, di phường Mui Ne, Ban Phan Thiet, khang panuac lac, dalam dom janih pandap mbang di urang Cam njauk ndom tal aia tanut ralo pabe, ini lac janih kaya mbang meng kan mai hu peih prong tabiak di dom nha hang.

        Ong Ẩn daok khan brei thau, janih pandap mbang ini oh hu kaya ngui hagait praong glaong ralo min njauk thau jalan ngak piah aia tanut mbau pahe biak karei. Urak ini, janih pandap mbang ini baoh sang urang Cam halei jeng meda ngak hu.  

        "Njauk ndom ini lac sa bruk ngak biak hu agama piah pachreih bruk rivang ma-in di tỉnh drei dak harei dak cak rok patagok jang. Abih di nyu lac dom tuai damuai mai meng labaih 30 negar châu Âu. Tuai damuai mai ini, nao rivang iek, duah thau hu ka janih ilamo biak karei di urang Cam Bình Thuận jeng yau urang dalam taneh aia Viet Nam."

       Urak ini kaya mbang biak karei di urang Cam Binh Thuan oh ka hu mboh rilo di angaok darak pasar, tok tuk halei tuai damuai vaih tame jirah rivang palei Cam meng meda mbang hu.

       Pandap mbang di urang Cam ieu lac biak pachreih haong tuai damuai mai jirah rivang ma-in min urak ini oh ka hu ba tame roh duah. Dom janih pandap mbang biak mbuan mbiah ini yau dom rai rah yaok rituh thun dahlau hu ngak tabiak.   

Kayua yau nan ye, piah dak padang hu angan je ilamo pandap nda kaya mbang Bình Thuận ka nyu pachreih jang, langiu di dom kaya mbang hu ngak meng tasik saong bhum palei njauk ba tame menu dom janih kaya mbang biak karei di urang Cam piah pachreih mere ka tuai damuai. Meng nan, tuai damuai meng hu rilo kadha piah palih ruah saong pachreih hu bruk cai jien pandar di drei./.