Chi cục Kiểm lâm tỉnh Bà Rịa - Vũng Tàu brei thau, glai di tỉnh daok rilo di labik mbon ceik, dalam 28.000 ha ye hu tal ¾ mbaok taneh glai lac ceik, rilo meng daok di dom huyện: Xuyên Mộc, Đất Đỏ, ban Vũng Tàu saong ban sit Phú Mỹ. Kayua mbon ceik nao mai kandah kandaiy, nan ye tuk hu pui khuah glai ye bruk ba ia padam khuah lac biak kan kandah. 

Ong Võ Văn Ích, sa urang taduan khik iek 6 ha glai labik ceik Thị Vải, ấp Phước Thành, xã Tân Hoà, ban sit Phú Mỹ khan lac, urak ini tabung glaong di bilan thu, labik ini oh hu ia nan ye phun kayau metai biak rilo, meyah khuah glai ye biak kan padam khuah: 

"Meyah labik ini bo khuah ye biak kan padam apui. Dahlak sahneng lac, labik halei hu ia ye Karja njauk hu jalan khik piah. Kayua lac hu ia drei meng padam apui hu samar jang, daok padam apui meng tangin ye ngin yuk pui nyu khuah veik, biak kan kandah".

Daok ong Nguyễn Văn Tiến, urang jakar Mban khik iek glai pacang caga tỉnh Bà Rịa - Vũng Tàu brei thau, dalam tinh hu 163 urang, kapul nyaom taduan khik iek jaik 2.100 ha glai. Piah caga pacang khuah padam khuah glai bilan thu 2023-2024, Mban khik iek glai hu ngak salah 174 ha jalan pacang apui, ngak hu 95% bruk pataom mek hala thu di dom jalan pacang:

"Kayua taneh glai di labik Long Điền - Đất Đỏ rilo meng patau, nan ye oh khik hu ia. Taphia nan, phun glai urak ini jruh abih hala, daok veik phun min, nan ye bruk pacang khuah padam khuah lac bruk praong njauk ngak samar drah. Oh ta-eng hagait po glai, bo dom đơn vị saong karja palei biak caong khin bhap bini paglaong hatai khik iek glai, tuk tame glai oh caik brei khuah, khik glai hijao ka taneh ia"

Chi cục Kiểm lâm tỉnh Bà Rịa - Vũng Tàu brei thau, meng akaok bilan thu tal ini, dalam tỉnh hu 11 mbang khuah glai, lac di dom huyện: Xuyên Mộc, Đất Đỏ, TP. Vũng Tàu saong ban sit Phú Mỹ. Abih tih mbaok taneh glai khuah jaik 16 ha, dalam nan mbaok taneh glai khuah khut lac 2 ha. Njauk caik hatai lac, tok dalam 3 harei di bilan 4 ini, tỉnh Bà Rịa - Vũng Tàu hu 2 mbang khuah glai njauk báo động di xã Châu Pha, ban sit Phú Mỹ khuah ralai abih 4ha glai tràm saong di labik ceik patau rah tui jalan plaih Quốc lộ 56, phường Long Huơng, TP. Bà Rịa.  

Ong Võ Đinh Vinh Quang, urang kiểm lâm labik Long Điền – Đất Đỏ brei thau, kayua lac labik mbon ceik nan ye bruk duah mboh saong pambuak bruk haong gah padam khuah lac bruk hu makna biak praong. Meng hu bruk pambuak gauk ini bo glai di Long Điền – Đất Đỏ oh njauk khat lahik tuk khuah rah tabiak:

"Glai di labik ini rilo meng lac dốc patau, mbon ceik nan ye tuk mehit lac khuah ye kiểm lâm pambuak bruk haong karja palei, haong gah quân sự, công an ba gauk padam apui. Khuah bhian rah tabiak di angaok tabung ceik glaong nan ye radaih padam khuah tagok oh tal, adei sa-ai njauk cakak jalan pacang, ba ia meng tangin piah padam khuah, padam dom bau pandiak daok veik".

Ong Ngô Thanh Trung, Phaok akaok Chi cục Kiểm lâm tỉnh Bà Rịa - Vũng Tàu brei thau, langik bilan thu nao gam haong ngin Đông Bắc yuk khang gam gam, ia meng dom baoh craoh thu abih, độ ẩm không khí biak biar jeng lac makna ngak brei biak mbuan khuah glai. Meyah khuah glai bilan thu ini, kiểm lâm meda ieu pataom labaih 3.900 menuac tame padam khuah. Ini lac bruk praong dang akaok, abih di nyu nan lac di dom labik radaih padam pui oh nao tal hu:

"Kham merat oh caik ka glai khuah, tuk radaih padam khuah oh tagok hu ye kol dahlak pajeng ia tagok meng kan, meng thung, jamriak njuk ia meng tangin piah padam khuah. Gam haong nan, kol dahlak pandar jamriak yuk ngin piah plaih khuah tapa labik karei."

Tui panuac di gah Lâm nghiệp tỉnh Bà Rịa - Vũng Tàu, dalam tinh hu labaih 4.428 ha glai praong njauk pacang khuah, rilo meng daok di dom huyện: Long Điền, Đất Đỏ, Xuyên Mộc, ban sit Phú Mỹ saong ban Vũng Tàu. Piah patrun patakik di abih dom bruk khuah glai, bhap bini saong tuai damuai njauk paglaong hatai khik iek glai, patakik bruk pandar apui dalam glai saong tapen glai, jak gauk ba tangin tame khik iek glai, khik ramik "hala phổi hijao"./.