Ninh Thuận lac sa tỉnh bhian njauk tua riya pandiak bhang, kayua yau nan ye pandap mbang ka athur raong dak harei dak kurang. Piah hu pandap mbang brei ka bruk raong glang, rilo urang nong Ninh Thuận hu peih ngak rilo jalan ngak piah pacang khik tapon athur raong. Dalam nan, hu bruk ngak pandap mbang meng phun tangei, hala tangei saong dom janih klaak meng kaya nong hu rilo urang nong pandar ngak mboh biak siam. Ong Lương Ngọc Trí, palei Lương Tri, xã Nhơn Sơn, huyện Ninh Sơn khan lac:“Bilan pandiak bhang ini, drei mek phun tangei ini mai, drei pambu thu brei ka limo mbang, blaoh drei chai klik tabiak brei ka limo mbang jeng hu.”

Hadei di tuk paik 3 sào tangei, sa-ai Katơr Minh, daok di palei Chà Panh, xã Phước Hòa, huyện Bác Ái pataom mek taong abih phun tangei saong hala tangei piah ngak pandap mbang ka athur raong. Taphia di nan, sa-ai daok caik sa mblang taneh piah pala hareik, ngak pandap mbang that ka tapon athur raong. Ini jeng lac ilamu dalam bruk khik kajap pandap mbang dalam bruk raong glang hu sa-ai Katơr Minh peih ngak dalam tukvak tapa.“Bilan pandiak bhang ini kan kandah rilo, sang dahlak pala tangei ye drei jeng pataom mek abih hala tangei, phun tangei. Drei ngak padai ye pataom mek pon piah ngak pandap mbang ka limo. Oh ta-eng hagait sang dahlak, bo taong abih mikva di Phước Hòa ini jeng pataom mek pon, phun tangey khik piah ka limo mbang. ”

Ong Phạm Văn Hội, Phaok akaok UBND xã Mỹ Sơn, huyện Ninh Sơn brei thau, xã Mỹ Sơn, huyện Ninh Sơn hu labaih 16 ribau drei athur raong hu takaiy. Piah hu ginup pandap mbang ka tapon athur raong, meng akaok thun, karja palei hu mai jak ba urang nong khik piah pandap mbang piah khik tani tanat tapon athur. “Langik  pandiak bhang yau urak ini, palei jeng hu pathau khan, ieu kakei mikva urang nong khik piah pandap mbang meng pandap klaak di kaya nong, jeng yau pala hareik piah hu pandap mbang  ka athur raong. Langiu di nan, hu dom baoh sang jeng ngak van ro, padang labik khik piah pandap mbang ka athur raong dalam tuk pandiak bhang.”

Lac bhum palei bhian njauk pandiak bhang, piah hu ginup pandap mbang ka athur raong, Ninh Thuận daok jak ba urang nong salih dom taneh ngak padai oh caga hu aia tapa pala hareik. Gam haong nan, gah ngak nong jeng hu patagok bruk tacei pato urang nong ilamu ngak pandap mbang tui jalan ủ mesam meng phun hareik saong pataom mek phun tangei, hala tangei, dom pandap klaak meng kaya nong piah ngak pandap mbang ka tapon athur raong. Ndom ka bruk ini, ong Trương Khắc Trí, Phaok Akaok Sở Ngak nong saong patagok palei pala tỉnh brei thau:“Khaol dahlak jeng ieu kakei mikva mek pandap klaak meng kaya nong piah ngak, ủ mesam piah khik pandap mbang ka athur raong. Gah ngak nong jeng hu tacei pato Pasak  pachreih nong tỉnh pato pathram ka mikva. Ini lac bruk ngak meng lavik paje. Pandar dom chế phẩm sinh học, rỉ mật, patagok bruk daong pabak jang, pabak dom vitamin, khoáng piah patagok dinh dưỡng ka pandap mbang.””

Ninh Thuận urak ini hu tapon athur raong abih tih labaih 500 ribau drei. Dalam nan, athur hu takaiy jaik 351 ribau drei. Bruk sami samar di karja saong ilamu di dom urang nong dalam khik piah saong ngak pandap mbang oh njauk lac tok daong ka tapon athur raong hu pandap mbang bo daok daong ka dom urang raong glang hu jien mek tame tani tanat dalam tuk langik pandiak bhang dui atah./.