Dalam yaok pluh harei angaok jalan nao meng palei Nghệ An tagok Tây Bắc tame bruk mesruh Điện Biên; gam haong dom harei “bal” jalan dalam “hajan mbom ribuk siu” brei ka radaih saong bộ đội tabiak mblang mesruh, meyah oh hu bruk khik pacang, daong brei di bhap bini dom bangsa dalam palei ye biak kan biak ngak hu bruk di drei. Ong Thái Hữu Hoành, urang dahlau daih ngak TNXP daok di phường Quyết Thắng, ban Sơn La, tỉnh Sơn La ndom lac yau nan tuk khan tal dom rik daong di bhap bini dom bangsa Tây Bắc dalam mbang mesruh Điện Biên thun 1954. Meng bruk khik pacang, daong brei di bhap bini, rilo urang dalam dom kapul ngak bruk di drei hu tabiak truh bruk sraong duah di kol khamang; padang hu rilo cơ sở chính trị dalam bhap bini, ba jalan peih ngak bruk  kháng chiến di Đảng pak bhum Tây Bắc: “Bhap bini dom bangsa Tây Bắc biak siam hatung hatian, anit bộ đội, ranam TNXP. Tuk nan kan kathaot lo, oh hu darak pasar hagait, min mikva siam lo, hu njam, hu ralow atau hu hagait mbang ye ba brei bộ đội, brei TNXP. Sa bruk tra njauk ndom tal lac bruk khik kandauk di bhap bini biak siam, oh hu labik halei di kol drei njauk kol khamang taong tame, tapa nan brei mboh bruk khik kandauk di bhap bini, lac taong abih brei ka kháng chiến.”

Peih rilo jalan brei ka menuac saong radaih nao mai, pajeng ba phao ndao, pandap mbang menyum, khik kajap ka labik mesruh lac sarak praong di drei tuk nan. Di tỉnh Yên Bái, bilan 4/1953, tui panuac ieu di Bộ Tổng tham mưu, dom kapul công binh saong dân công labik ini hu peih ngak jalan ka radaih tabiak mesruh. Bhap bini xã Nguyễn Phúc, TP. Yên Bái harei ini saong bhap bini dom huyện Trấn Yên, Lục Yên, Văn Chấn, Văn Bàn… chreih chrai ba gauk tame dom kapul dân công. Ong Hà Văn Hổ, urang daok di xã Thượng Bằng La, huyện Văn Chấn, tỉnh Yên Bái tuk nan bahrau 10 thun, min halan hatian tame daong dom anai, dom cei dân công saong TNXP peih jalan 13 nduac tapa xã di drei tagok labik mesruh. Ong Hà Văn Hổ hadar veik: “Piah peih jalan nao tapa ini, labik tapa bản Thẳm hu danao praong ngak hamu ye oh tam truh, kubao oh tapa hu, min mikva pak ini hu daong kayau, patau, hu sang daok ba kayau caga ngak sang tabiak piah tauk ngak jalan, tuh haluk tagok. Kapal haok di kol khamang ye biak rilo, meng bản Dạ tal tabung ceik Lũng Lô meda lac kapal haok harei halei jeng mai cuh palai pajoa.”

Tui yaok pataom, piah peih jalan meng căn cứ Việt Bắc tal labik mbaok mesruh, khik salamat ka yaok pluh rabau menuac, yaok pluh rabau mbang radaih ô tô, đại bác, radaih juak pajeng pandap… tabiak mblang mesruh Điện Biên Phủ, tỉnh Yên Bái brei ieu pataom labaih 128 rabau mbang menuac ngak jalan; labaih 273 rabau harei kuac raok, lam pasamu lubang mbom, pacang glut jaleih, ngak bahrau saong ngak pasiam 188 km jalan tabiak mblang mesruh…

Angaok palei di drei, bhap bini dom bangsa tỉnh Điện Biên, Lai Châu saong dom tỉnh Tây Bắc tuk nan gam lac dom menuac pajeng ba pandap, gam lac dom giao liên naih gheih, tuk halei jeng hu mbaok saong nao dahlau dalam dom kapul urang tabiak mblang mesruh. Urang sami samar daong bruk, klah rabha dom rambah rambup glaih glar, abih hatai haong dom adei sa-ai daok di dom tỉnh bhum atah bayah mai tame labik mesruh. Ong Trần Quốc Cường, UVTW Đảng, Bí thư Tỉnh uỷ Điện Biên brei thau: “Dalam bruk mesruh Điện Biên Phủ, bhap bini dom bangsa tỉnh Lai Châu, urak ini lac tỉnh Điện Biên saong tỉnh Lai Châu hu rik daong ka chiến dịch 2.666 tấn brah, rilo jang 64 tấn; 226 tấn ralow, rilo jang 43 tấn; 210 tấn njam hijao, ieu pataom jaik 17 rabau dân công, haong 568 rabau harei ngak bruk, jaik 450 radaih juak pajeng pandap, yaok rabau sruh ghe, daong labaih 25 rabau phun kayau piah ngak jalan ka radaih pháo saong bộ đội hành quân.”

Jeng tui panuac di Bí thư Tỉnh uỷ Điện Biên Trần Quốc Cường, dom rik daong di bhap bini dom bangsa Điện Biên - Tây Bắc brei ka bruk mesruh Điện Biên Phủ lac thaot binguk mekre, hadah hadai di bruk jum pataom dom bangsa, ngak jeng prein khang praong di bruk jum pataom bangsa, rik daong praong ngak jeng jayah Điện Biên Phủ “dane angan angaok dunya, tatuan megei baoh taneh”./.