Mblang glai di bản Nhọt daok tapen jalan roya 37, praong jaik 200 héc ta, hu 2 talei ceik pacang vil val, luac thun, langik hacih, la-an bingi. Thun 1954, dalam mbang nao meng Nghĩa Lộ, tỉnh Yên Bái tagok Điện Biên tame bruk mesruh Điện Biên Phủ, Đại tướng Võ Nguyên Giáp saong kapul urang lin peih paha hu padeih takai di labik ini, nan ye meng tuk ini, glai hu rahra ieu haong angan anit ranam lac "Glai Đại tướng Võ Nguyên Giáp".

Oh dreih yau dom glai karei jaik abih tok daok hu gỗ tạp, phun sro, glai Đại tướng Võ Nguyên Giáp jeng daok tamo dom phun chò chỉ taha praong dom urang kua oh abih, gam haong nan, lac dom phun lát, dổi, pơ mu dang tapak, glaong tal langik.

 7 pluh thun tapa, glai ini jeng daok hijao, that, mekre, yau brei mboh hatai anit ranam di bhap bini dom bangsa pak ini brei ka Đại tướng Võ Nguyên Giáp haong kapul urang lin saman nan. Ong Lò Văn Linh, Akaok bản, akaok kapul khik iek glai bản Nhọt, xã Gia Phù, huyện Phù Yên, tỉnh Sơn La khan lac: “Dahlak uan tabuan hu mbaok dalam kapul khik iek glai Đại tướng Võ Nguyên Giáp. Kol dahlak bhian pathau khan mikva, piah ka rai hadei daok tui bruk khik iek saong khik hu glai miat miat. Gah kol dahlak, yaok adit nao tui iek glai 3 mbang piah pacang khuah padam khuah saong pacang urang daok jaik taphia nan tame mek njuh, meng nan khik iek glai hu siam jang.”

Ong Đinh Công Són daok di xã Gia Phù hadei di jaik 30 thun hu mbaok tame kapul khik iek "Glai Đại tướng Võ Nguyên Giáp" urak ini hu salih tapa ngak bruk khik ramik kalan kakuh Đại tướng pak di labik inem krung ini. Ong brei thau, yaom lac umo taha praong thun, min ong jeng daok ba abih hatai jai tabiak, gam haong mikva, sangka khik iek kalan kakuh saong labik inem krung ka nyu tuk tuk halei jeng hu hijao, hacih, mekre, lac hatung hatian di ong saong mikva labik ini tuk halei jeng hadar tal Đại tướng: “Dahlak biak uan tabuan saong bhian pathau khan ka rai ranaih, abih di nyu lac anek saih dom sang bac, dam dara urang đoàn tuk mai tal kalan kakuh. Dahlak jeng khan brei dom kamuan thau ka sajarah hadah hadai bo ong muk drei caik veik. Hu khik ramik kalan yaok harei, lac bruk hadah mbaok mata ka dahlak, dahlak uan tabuan lo.”

Mai tal labik ini, rahra saong tuai damuai oh lac hu diuk veik haong bruk hào hùng di kapul urang lin peih paha yam tagok Điện Biên tame bruk mesruh Điện Biên Phủ saman nan, bo daok hu ba drei tame labik ginreih di inem krung kalan kakuh Đại tướng Võ Nguyên Giáp. Sa-ai Nguyễn Thị Hồng Hạnh daok di huyện Phù Yên, tỉnh Sơn La brei thau: “Lac rai ranaih menek tabiak dalam saman sron mbon, dahlak biak uan tabuan, mboh lac drei brei kham merat jang dalam pathau khan, piah pambak tabiak dom yaom glaong sajarah di labik ravang me-in tal tuai damuai dalam dalam saong langiu huyện.”

Inem krung sajarah mesruh metak pacang Prang labik glai bản Nhọt saong kalan kakuh Đại tướng Võ Nguyên Giáp lac dom inem krung sajarah, ilamu hu yaom biak glaong, kakei rai harei ini hadar tal dom prein yava, rambah rambup, oh huac matai lahik di ong muk drei brei ka độc lập, tự do di taneh ia, palei negar. Dom jayah praong di Đại tướng Võ Nguyên Giáp haong kapul urang lin Điện Biên Phủ saman nan jeng daok miat miat, yau glai miat miat hijao angan Đại tướng daok hu khik iek meng hatung hatian di bhap bini daok pak ini./.