Amuk Lê Bích Hạnh, kapul rahra taka so 14, palei Phước Thới, ban sit Đất Đỏ, huyen Đất Đỏ, tinh Ba Ria – Vung Tau brei thau, meng harrei hu Kapul ngak kong taka so bhap bini, rahra mboh biak siam lagaih dalam dom bruk mayit mayao nao mai harak gar karja.

 Tui amuk Hạnh, urak ini mayah khin mahu caong ngak dom harak gar ka dak angan, gah adat hukum, atau buh jien, bayar jien … rahra daok di sang, pandar phone mada Kuhria hu abih bruk

 Di dom baoh sang ngak nong, jal val bruk ngak apuh ngak hamu ye yaok harei adit hu Kapul ngak kong taka so mai tal sang tacei ba ka mikva ngak VneID. Meng di nan, bruk tut angan ka akhar cih taka so, tut angan ka bruk pasang iek ruak jeng hu brei thau pandar, rahra meda oh cang nao tal UB Bhap bini xa piah ngak.

“Brei pandar VneID biak lagaih, Kapul ngak kong taka so bhap bini daong pato tacei brei pandar blaoh rahra tok sa janih padaok angan tame ieu lac hu khau tin abih dalam nan, biak kein lagaih tuk ngak pak dalam nan. Hu dom mayao mayit karja yau pasang iek ruak, bayar jien Wifi, jien gom ndien, jien ia atau akhar cih tut tangn tui lek taka oh cang nao tal dom labik nyu biak kein lagaih brei ngak di sang”.

Tui Mbang pato tacei Salih lek taka so tinh Ba Ria – Vung Tau, tal ini jaik 3.000 urang di 503 Kapul ngak kong lek taka so bhap bini dalam bhum palei hu mbaok tame bruk bac da-a, paglaong ilamo pandar bruk ngak kong haong khao tin.

Tapa ba tacei, ilamo, bruk ngak di dom urang dalam kapul ngak kong lek taka so bhap bini hu pasiam, dom urang pandar nao mai mayao mayit harak gar karja saong dom yitvu dalam labik taka so jeng hu paglaong.

Ong Vũ Đình Tú, Phaok Kapul ngak kong lek taka so bhap bini bhum Phước Thới, ban sit Đất Đỏ brei thau, kapul ngak kong lek taka so hu dom Kapul Dam dara, akaok bhum ban khu pho, urang pacang khik bhum ban khu pho… bhian nao yaok jalan dalam puac adit – nao tal yaok baoh sang jak ba rahra brei ka bruk salih lek taka so, kuhria ka jalan karja taka so, kinh te taka so:

“Bhum ban Khu pho peih bruk jak ba urang dam dara mai tal khu pho padang kapul piah daong mikva ngak bruk salih lek taka so. Harei adit yaok adit, kapul ngak kong lek taka so mai daong tacei ba mikva tut tangan taka so. Atau tut angan daok di labik anak meta tok daok sang ngak di angaok phone, oh nao cang tal polih kong an piah ngak, mboh biak kein lagaih”.

Amuk Hồ Thị Mỹ Hoà, Akaok UB Bhap bini xa Xà Bang, huyen Châu Đức, tinh Ba Ria – Vung Tau brei thau di masa meng anak, UB Bhap bini xa brei kein lagaih ka urang dalam kapul ngak kong lek taka hu pato megru brei ka bruk salih taka so kayua huyen, tinh peih ngak. Ramik dom thiet bi ndap nda jammriak yau computer, wifi… di dom palei piah karo kajap brei pasiam saong peih praong bruk Kapul ngak kong lek taka so bhap bini dalam bhum palei.:

“Xa brei pathau khan ka rahra piah dom urang ngak bruk buh harak gar online di palei, oh mek rahra mai tal jabat karja UB Bhap bini xa rilo mbang, tawak tawe brei ka rahra. Langiu di nan xa daok peih praong bruk di grauk palei karei piah ngak brei kein lagaih ka rahra buh harak gar tui online”.

Piah nao tal jalan pasalih ngak kong lek taka so tal yaok rahra, mek rahra ngak pasak piah duh ye bruk “nao yaok jalan – taom yaok baoh sang: di Kapul ngak kong lek taka so bhap bini hu maong lac bruk ngak siam lagaih di Ba Ria – Vung Tau. Di masa meng anak tinh Ba Ria – Vung Tau brei caik dalau abih piah ba tame ngak App Mayit karja online duh brei ka rahra saong urang ngak mbang pabei salih. Bruk ini ieu lac sa janih salih taka so di tinh piah jhul tagok bruk salih taka so, ndo thi hadah krah pagam haong salih bahrau hanh chinh saong kuhria tal bruk karja taka so saong kinh te taka so./.