Xã Phước Nam (huyện Thuận Nam, t.Ninh Thuận) hu urang Cam meblah 90% bol bhap dalam xã. Di dalam xã jeng bhian rah tabiak dom bruk ngak brei srau kadau puk palei, kayua hu dom menuac urang oh ka thau cambaih adat hukum di karja, njauk kol kanjah jhak nyu pacuh pajarak.

 Anak bruk yau nan, urang hu angan je dalam bhap bani Cam di xã brei patagok bruk ngak di drei, kham merat pambuak bruk haong Karja palei langyah dom bruk, samar drah grap tanat bruk an ninh trật tự di puk palei. 

Pagap yau ong Từ Công Dư – sa halau janeng dalam Hội Đồng sư cả Bàni, palei Ram (Văn Lâm), xã Phước Nam, lac sa dalam dom urang hu rilo rik daong praong dalam bruk khik ramik an ninh trật tự di puk palei. 

Ngak siam bruk di sa halau janeng, ong Dư haong Hội đồng po gru tacei pato, daong ka mikva peih ngak dom adat cambat di agama njauk tui adat hukum di karja, kham merat hu mbaok tame dom danak dak cak rok patagok kinh tế-xã hội, ngak siam bruk jak ba “Taong abih bhap bani jum pataom dak padang rai diuk ilamo di labik daok”.

Daok di palei Caklaing (Mỹ Nghiệp), ban sit Phước Dân hu amuk Thuận Thị Trào lac po labik menyim hu angan dalam palei menyim jih dalah meng kan di bhap bani Cam huyện Ninh Phước. Amuk lac sa kareh camin ngak bruk naih jioy, sa urang kamei jak jeng dalam bruk pablei salih, bo daok lac urang abih hatung hatai haong bruk khik ramik siam mekre, sron mbon puk palei.

 Lac urang daok dalam Tổ hoà giải palei Caklaing, meng hatung hatian abih drei ka bruk ngak, meng angan je di drei, amuk Thuận Thị Trào gam haong dom urang dalam tổ nao tal yaok baoh sang piah duah thau, tui pang, ginum biai piah duah jalan langyah ka nyu siam mekre di abih, kak kajap talei rohim, anit ranam gauk dalam puk palei haong gauk tuk hu bruk methuh gauk rah tabiak. 

Yaok thun, amuk haong dom urang dalam Tổ hòa giải hu langyah ba brei njauk gauk rilo bruk kandah gauk, meriak gauk, pathau gauk dalam bol bhap rah ra, dalam nan hu dom bruk pambuak pagam tal adat cambat tanarakun di bhap bani dom bangsa di puk palei. 

Langiu di ngak siam bruk langyah ba brei njauk gauk, amuk daok kham merat jak ba mikva dalam palei ngak siam sarak di Đảng, hukum di Karja, ngak siam dom adat di palei yau ye  hương ước, quy ước but pajaih, hu mbaok tame dom bruk dak padang rai diuk ilamo di labik daok, bruk khik caga an ninh taneh aia, rik daong khik ramik siam mekre sron mbon di puk palei.

Gam haong dua urang hu angan je yau angaok nan, tukvak tapa hu yaok rituh hatau janeng, taha akaok palei, akaok but pajaih di tỉnh Ninh Thuận patagok hu bruk ngak di drei dalam khik ramik an ninh trật tự. Dom urang nan, lac urang hu angan je dalam bhap bani daok harei melam ba abih hatung hatai di drei rik gam haong bhap bani dom bangsa karei dalam tỉnh khik caga sron mbon ka bhap bani.

Dalam bruk khik ramik siam mekre, sron mbon puk palei, urang hu angan je di Ninh Thuận bhian pambuak bruk haong karja saong gah Công an, bol lin pathau khan, jak ba bhap bani paglaong hatai sangka, pacang caga kol tội phạm, oh pang tui dom panuac pacuh pajarak di kaol kanjah jhak. Gam haong gah Công an, Bol lin dak padang bruk pacang caga khang kajap, khik hu siam mekre sron mbon ka puk palei

Palei Lương Tri, xã Nhơn Sơn (huyện Ninh Sơn) lac labik hu biak rilo urang Cam daok. Tukvak tapa, bruk “siam mekre, sron mbon puk palei – salamat bruk nao mai angaok jalan” hu ba mai sron mbon ka bhap bini labik ini.

Iek tui dom adat ba tabiak di dom but pajaih ka padang ngak bruk ini di palei Lương Tri bo Hội đồng adat cambat tanarakun, kapul xung kích hu pambuak bruk haong dom talei but pajaih, Mban khik iek palei jhul khang bruk pathau khan, jak ba mikva kham merat hu mbaok tame, ngak njauk tui hukum di Karja, adat di palei, jak ba labaih 1.000 sang mbaoh tangin tame harak sanya oh ngak suan bruk siam mekre, sron mbon puk palei – salamat bruk nao mai angaok jalan.

Gam haong nan, dom halau janeng, taha akaok palei, akaok but pajaih hu ba tangin, rik prein tame pambuak bruk haong công an xã peih pathau khan piah ka mikva thau, ngak siam bruk khik caga drap ar, khik ramik siam mekre, sron mbon puk palei saong patagok bruk ngak di drei dalam pacang caga saong tacei tabiak kaol tội phạm. Meng nan, hu khan brei thau rilo khau tin pambuak pagam tal kol ngak suan adat hukum, daong ka gah chức năng duah mboh saong cap mek kol co klaik drap ar.

Ong Đạo Văn Bùi, Po Gru sang megik palei Lương Tri chreih chrai khan lac: Bruk “Palei Cam siam mekre, sron mbon – salamat bruk nao mai angaok jalan” hu ngak biak siam, khaol dahlak jeng hu pambuak bruk haong karja palei pathau khan ka anek kamuan dalam but pajaih ngak siam dom sarak di Đảng, hukum di Karja, jak gauk ngak mbang pala drak, rik daong dak padang puk paga, palei negar.

Thượng úy Trương Duy Hải, Akaok Công an xã Nhơn Sơn brei thau, meng harei bruk ini hu peih tabiak ngak ye bruk siam mekre, sron mbon puk palei – salamat bruk nao mai angaok jalan di palei Lương Tri hu siam tagok mboh di meta, dom bruk pambuak pagam tal an ninh trật tự trun biak rilo duk haong dahlau diah, abih di nyu lac bruk likei dam palei ini taong gauk haong likei dam palei diah, bruk ndik radaih biak samar, nẹt pô, ngak lahik an ninh trật tự jeng oh daok. 

“Tuk hu bruk rah tabiak, Hội đồng adat cambat tanarakun, akaok but pajaih saong dom urang hu angan je dalam palei hu pambuak siam haong gah công an, Mban khik iek palei, Kapul xung kích, langyah samar drah, oh caik ka nyu ngak srau kadau di puk palei”, ong Hải khan lac yau nan./.