Tui panuac khan di amuk Chu Thị Tú Liên, Cty TNHH MTV Ngọc Minh – LS, di TP. Cần Thơ, urak ini taneh pambuak bruk, blei abih baoh durian ka dom sang pala di Cty daok rilo di xã Tân Thới, huyện Phong Điền. Cty pambuak bruk, blei abih baoh durian di urang pala piah pablei tapa negar langiu nan ye bruk tiêu chuẩn, chất lượng lac bruk praong dang akaok.

Tui amuk Liên, suai di abih lac 15 harei hadei di tuk pasang iek durian meyah taong yaom mboh lac siam ye hu blei tui yaom darak pasar, daok meyah oh ka siam ye tacei pato sang bein sangka tui iek ka nyu siam jang. Baoh durian siam hu chất lượng brei hu độ tasak tui tanut ba tabiak, oh paik baoh mada, baoh ruak kik halak halin ngak khut angan je pablei salih. Bruk blei baoh durian di dom sang pala hu mbuan lagaih tuk Cty bayar jien chip saong tok mek veik jien pablei tavak khak drak dahlau nan hadei di tuk paik baoh pablei: "Dahlau di tuk paik baoh meng 7 tal 10 harei, Cty brei menuac trun pasang iek chất lượng saong mek baoh nao dut iek độ tasak di baoh blaoh doanh nghiệp meng blei. Thun ini jeng hu mikva ieu Cty tame bein blei aval jang, thun ini dom urang blei salih tame blei biak aval, tapa nan jeng ngak kan kandah ka doanh nghiệp, jeng lac sa bruk ngak brei srau kadau darak pasar".

Dahlau di nan, yau rayo sap ndom VN (VOV) hu khan brei thau, di huyện Phong Điền, TP. Cần Thơ hu bruk urang blei salih mai blei durian meda, takik chất lượng, pandar jru hóa chất piah ngak brei tasak baoh, hadei di nan ba nao pablei ngak lahik angan je durian di palei. Oh padeih di bruk blei durian mada, rilo urang blei salih daok kateik yaom urang pala, meyah urang pala oh pablei ye urang blei salih klaak jien caik takai, tui nan khat lahik laik tame urang pala. Tui panuac khan di ong Phan Thanh Trung - akaok bilai pachreih nong huyện Phong Điền, bruk pablei salih durian mada nyu ngak jhak tal angan je durian di palei:  "Bruk blei baoh durian mada angaok mạng tukvak tapa nyu ngak kanjah jhak tal angan je durian di palei. Ka sa lac baoh drei paik tuk daok mada ye ralow durian sambo taba, oh yamen, oh pahe durian, tui nan nyu ngak kan tal lô durian hadei di kol drei pablei tapa negar langiu atau tuk kol drei pablei tabiak darak pasar ye urang huac oh khin blei mbang".

Pambuak bruk lac jalan nao njauk, oh lac daong ka doanh nghiệp hu bhum pala tani tanat, urang pala pataom tame ngak tui jalan GAP piah khik mã số bhum pala, padang angan je saong pabak ka bruk pablei tapa negar langiu. Tui panuac khan di ong Tống Văn Ngọt, urang ngak nong daok di xã Tân Thới, huyện Phong Điền, tuk pambuak bruk haong doanh nghiệp, urang pala sahanang hatai pala ngak tui jalan ba tabiak, ngak tui dom jalan khik iek jit ruak, khik njauk tukvak padeih pandar jru dahlau meng paik baoh, khik kajap chất lượng pabak ka bruk pablei tapa negar langiu: "Tuk hu pambuak bruk ye drei sahanang hatai jang, Cty jeng blei di drei haong yaom tani tanat jang, drei oh huac yaom kaom trun tagok. Tuk pablei ka urang blei salih gah langiu ye tuk urang caong blei ka pahu ye urang bayar yaom glaong, tuk yaom laik ye urang duah jalan ngak kan drei, dreih yau drei nao likau yaom, klaak bein kaoh mek baoh tui jalan ngak brei drei oh njauk hatai".

Bruk pablei atau blei baoh durian daok mada, oh hu chất lượng nyu ngak patrun hatai jia di urang blei mbang saong ngak jhak tal angan je di palei. Anak bruk blei salih baoh durian mada, takik chất lượng, UBND huyện Phong Điền hu panuac ieu dom xã, ban sit tui iek catang bruk blei salih durian saong hu jalan langyah piah plaih dom khat lahik ka urang pala saong ngak jhak tal angan je durian Phong Điền.

Meng taneh pala praong 5.000 hecta, TP. Cần Thơ daok pachreih urang pala tame pambuak bruk haong doanh nghiệp piah tani tanat bruk pablei tabiak, padang angan je, pabak ka bruk pablei tapa negar langiu janih baoh kayau yaom tỷ USD ini./.