Jalan Nguyễn An Ninh (Quận 1) anak pabah Pai – darak Bến Thành ieu lac sa labik tuk halei jeng hu tuai damuai urang Islam mai jirah rivang di TP.HCM. Kayua di ini sa lac sabaoh jalan hu pataom dom kadai pablei pandap mbang saong parang pablei dom pandap panda Halal – hu ngak tabiak tui jalan adat hukum di aguma Islam.

Kyua mbang huak pandar ngui tui halal yau nan ye tuai damuai urang oh hu jalan pilih karei di dom ndap nda Halal di TP.HCM. Patui di nan gait jeng kan si nao rivang jirah labik karei piah main piah ieik bhum taneh palei pal di drei.

Daok jirah rivang pagam haong hu mbaok tame danak dak ndom meyai haong sinh vien, jum pataom ilamo di sa sang bac dai hoc di TP.HCM, sa-ai Aiz Asymal Bukhary Bin Kharul Izwan mai meng Malaysia brei thau, yaom lac biak chreih chrai tukvak daok di Viet Nam min tapi sa-ai oh mboh sanang hatai tuk hu mbang huak dom pandap mbang di sa baoh kadai angaok jalan Nguyễn An Ninh blaoh oh hu rilo kuan piah drei ruah. Langiu di nan, di hotel gait daok oh hu labik piah sambah yang.

“Dahlak daok di TP.HCM dalam 4 harei min tapi mbang huak sabaoh kadai ini, kol dahlak oh hu kadai mbang huak halei karei piah ruah. Di ini pandap mbang halal kan si duah yau nan ye kol dahlak biak njauk caik hatai tani tanat dalam bruk ruah pilih pandap nda mbang huak. Meyah duah oh hu pandap mbang Halal atau labik piah sambah yang ye kol dahlak brei panduan nao tal dom labik hu rilo bol bhap Islam diukrai. Kayua yau nan ye, dahlak sahaneng mboh lahik biak rilo tukvak daok di radaih, gam tuk nan dahlak meda hu tukvak piah me-in rivang vil ban raya”.

Amuk Nguyễn Thị Ngọc Hằng, lambaok Jabat brei angan Halal - HCA Việt Nam brei thau, urak ini bol bhap Isalm hu 25% dalam dunya. Kuhria di labik Đông Nam Á mboh hu labiah 42% rahra tui aguma Islam. Dalam thun, urang tui Islam hu rilo harei raya, gam haong langik pandiak suai atah yau nan ye hatai ralo caong nao jirah rivang lac biak praong:

“Njauk lac rirah rivang Halal biak hu kein lagaih. Kayua tuai damuai Islam bhian nao me-in suai harei saong dom urang nan bhian nao tui sa kapul menuac saong baoh sang, oh nao sa drei taeng. Sa urang lakei Islam tuk nao jirah rivang, bhian ba tui diuk anek, bhian dom urang nan hu sa mbang nao jirah rivang biak suai harei. Min tapi Viet Nam kol drei jeng oh ka thau tani tanat ka hukum halal di urang Islam piah meda ngak tabiak dom tour jirah rivang njauk Halal.”

Tuai damuai Islam oh tok sangka tal dom labik hu angan, bo daok brei pabak samu hu dom asal kadha ka aguma. Kayua yau nan ye, ong Trần Văn Tân Cương, Yam ndok Kongti Halal Viet Nam ndom meyai lac, piah dui pachreih dom tuai damuai hu kein lagaih ini, dom labik daok padeih padei, labik jirah rivang brei hu dom urang ngak hu pato pakai ka dom tanut siam mekre haong tuai damuai mbang tui Halal.

 “Kol dahlak daok ngak jalan ginum biai haong po di dom labik jirah rivang, labik daok padeih padei ka bruk padang dom bruk blei salih siam mekre haong urang Islam. Di ini kol dahlak jeng tacei ba, pato pakai haong dom urang po laik jirah rivang ka dom yitvu cambaih laih yau ramik sa labik sit piah ngak labik ngak adat saong srap gap pandap mbang Halal. Piah dom labik padeih padei jirah rivang ini hu harak gar hu dom mayao mayit ngak mbang brei ka siam mekre haong urang tui ugama Islam”.

TP.HCM hu rilo kein lagaih piah patagok gah jirah main rivang yulit siam mekre haong urang tui Islam dut haong dom bhum palei karei dalam taneh ia. Dalam nan, TP.HCM hu 10 Sang Megik Islam, 19 labik ngak adat saong lac labik hu rilo urang Cam tui aguma Islam daok diukrai rilo abih dalam taneh ia, gam haong dom labik padeih padei bahrau, chuoi kuan kadai pablei pandap mbang njauk Halal, dom labik jirah rivang gheih ghang saong dom pasak blei pandar saong dom darak praong tui ilamu meng kal, danei angan… Min, tapi dom kein lagaih ini jeng daok oh ka ngak “pamedeih” piah patagok ka njauk angan danei di nyu./.