Quận 1 bahrau ba tame peih ngak pandap du lịch angan ieu lac “sambo mau melam”. Ini lac tour du lịch melam ka 2 hu TP.HCM peih tabiak, hadei di tour “trắng chiến khu” di labik lubang kandauk dalam haluk Củ Chi.  Ong Lê Trương Hiền Hòa - Phó Yam ndok Sở Du lịch TP.HCM brei thau, bruk cak rok patagok tour melam daong ngak brei hu rilo pandap du lịch, peih tabiak jalan ka quận huyện di TP.HCM peih ngak dom yaom glaong du lịch:“Bruk cak rok patagok pandap du lịch, caong hu di abih lac jabat khik ramik gam haong doanh nghiệp du lịch taong yaom ba tabiak tour ngak ka nyu lagaih haong yaok umo tuai karei di gauk”

TP.HCM, sa pasak ravang me-in praong di taneh ia, hu rilo labik sajarah, ilamo hu angan. Tui panuac khan di tuai mai rivang iek, jeng lac dom labik nan, min tour du lịch melam mboh nyu karei jang. Bhian hu mbaok tame tour du lịch melam di rilo taneh ia di dunya, saai Diệp Anh daok di TP.HCM khan lac, bruk du lịch melam daong ka tuai oh lac eng drei duah thau pandap mbang, ilamo bo daok hu thau ka nghệ thuật meng kan labik drei vaih tame. Saai Diệp Anh brei thau, mayah ban raya hu tour melam gheih makre, saai meda hu mbaok tame: “Labik bo drei caong tal abih tuk bo TP.HCM peih dom tour du lịch melam nan lac Bến Nhà Rồng. Kayua daklak mboh ini lac sa dalam dom labik hu makna sajarah praong saong daong ka drei hu lagaih piah duah thau ka dom bruk sajarah di pak ini. Dahlak bhian mai tal pak ini piah rivang iek min maong 5 bier harei  lac kareik pambang nan ye dahlak biak damen”.

Tui panuac di saai Thu Trang, sa urang tuai daok di Hà Nội,  di ban ine tour du lịch melam biak rilo janih, tuai mbuan nao tal labik rivang iek piah blei harak vé tame iek, oh lac blei abih sa tour pambuak haong rilo bruk ngak karei. Daok tuai tal TP.HCM, melam mai tok thau tal phố nao takai Nguyễn Huệ atau hồ Con Rùa piah mbang dom pandap mbang:“Drei sahaneng lac mayah di TP.HCM hu dom tour melam di dom labik inem krung sajarah yau di Hà Nội ye drei nao tal. Kayua meng bruk ma-in di Hà Nội ye dom tour melam ini biak njauk hadar kanal, ba mai dom khau tin, gom hadah bo tok hu tour melam meng ngak hu.”

Tui Thạc sĩ Nguyễn Hoàng Long, akaok môn Du lịch, Sang bac Đại học Nguyễn Tất Thành, cak rok patagok kinh te melam njauk pambuak haong tour du lịch melam, gam haong nan, brei pambuak haong inem krung, ilamo. Min di TP.HCM, janih ini ka oh mboh cak rok patagok. Pagap yau di Hà Nội hu tour melam di Hoàng Thành Thăng Long, Văn Miếu Quốc Tử Giám. Tour melam, langiu di rivang iek, daok brei hu dom bruk ngak, karei jang harei piah ngak jeng bruk karei di nyu.

Thạc sĩ Hoàng Long ndom lac, bruk cak rok patagok tour melam, njauk pilih ruah saong pambuak haong gah peih ngak, oh caik ka rilo labik gam ngak, mbuan ba tal sarau kadau; njauk ngak habar ka nyu lagaih haong bruk nao mai tal dom labik karei di yaok palei:“Kol drei njauk pilih ruah dom labik ndung bak bruk cak rok patagok di Sài Gòn – TP.HCM yau Nhà thờ Đức Bà, Dinh Độc lập, Miuyim ilamo mỹ thuật, darak Bến Thành,…”

Tour du lịch melam oh daok kan mboh, TP.HCM jeng hu peih ngak saong taduan hu bruk pachreih tui biak siam meng rahra. Kayua yau nan ye, hadei di tour “sambo mau melam” di quận 1 saong tour “trắng chiến khu” di địa đạo Củ Chi, TP.HCM njauk hu jalan ngak piah patagok pandap du lịch ini./.