Sa-ai Nguyễn Hữu Hiếu, po ngak bruk di Labik ngak Ia taiy lê-ki-ma di xa Đất Đỏ (huyen Đất Đỏ, tinh Ba Ria – Vung Tau klak), Ban raya Ho Chi Minh brei thau, lê-ki-ma lac phun pala hu angan di bhum taneh Đất Đỏ praong glaong, hu urang ngak nong pala rilo di bein sang, sang pala takik abih ye 1 phun, rilo ye meng 5-7 phun.

Kayua prein diuk di phun lê-ki-ma biak khang yau nan ye urang dalam bhum oh lac cang ralo sangka, drak khak… Phun kayau diuk suai thun umo saong brei baoh khik kajap salamat kaya mbang.

Thun 2024 sa-ai Hiếu ba abih hatai tut angan mek OCOP saong tal bilan 12/2024 ndap nda kaya ia taiy lê-ki-ma mek hu OCOP 3 patuk, harak brei angan HACCAP. Tal ini, sa-ai Hiếu pala labaih 1ha hu 150 phun lê-ki-ma. Piah hu kaya tani tanat ba tabiak darak pasar, sa-ai daok jak ba urang dalam bhum khik tani tanat phun lê-ki-ma. Labik ngak bruk di sa-ai Hiếu kuhria paglaong pakat ndap nda ia taiy lê-ki-ma  tui janih arak gal tagok OCOP 4 patuk saong tut angan OCOP 3 patuk brei dom kaya ia taiy lê-ki-ma, ia masam giấm lê-ki-ma:

"Labik jeng pataom blei baoh lê-ki-ma di dom baoh sang dalam bhum, caong khin rahra khik tani tanat phun lê-ki-ma di bhum palei, nan lac ilamo gheih karei di bhum palei. Hu makna abih lac asar siam kaya, tuk halei jeng khik kajap bruk salamat kaya mbang, HACCAP. Blaoh tal lac pataom tame thaik thaot kaya mbang ka salah blaoh, tani tanat saong hu makna ndung bak bruk gheih karei di bhum palei".

Daok sa-ai Đinh Công Trường, po Labik ngak habei athah xa Long Hải (huyuen Đất Đỏ, tinh Ba Ria – Vung Tau klak), Ban raya Ho Chi Minh brei thau, kaya tapung habei athah di sa-ai mek hu OCOP 3 patuk dalam thun 2024, tal ini hu mbaok di grauk labik dalam bhum. Tui sa-ai Trường, akaok habei athah tok pablei that ye oh hu yaom kaom meng bruk ngak jeng tapung habei athah ngak pandap tamo dalam bruk ngak kaya mbang, janih jru… Cambaih laih lac, habei athah meyah pablei tuk that tok di labaih 100 ribau dong/kg, daok ba 10kg habei that ngak jeng 1kg tapung habei ye meda pablei meng 1,4-1,5 trieu dong/kg, siam lagaih biak glaong saong kaya mbuan nao tal tangin urang blei pandar:

"Darak pasar urrak ini biak praong, hatai caong blei jeng biak ralo. Kayua yau nan ye nan khol dahlak hu jalan ngak padang tabiak bruk ngak mbang pablei salih piah ngak tani tanat jang bruk ngak ndap nda kaya, pabak hatai caong urang blei pandar. Kayua bruk ngak meng akaok habei athah lac biak praong biak rilo dalam kaya mbang, janih jru saong ba kaya tapak meng urang ngak nong tal urang blei pandar, kayua nan asar siam ndap nda brei khik kajap glaong jang".

Tui So Ngak nong saong Alam langik Ban raya Ho Chi Minh, Danak dak yaok xa sa kaya (OCOP) lac sa dalam dom jalan langyah hu makna di ban raya dalam luac jalan patagok kinh te palei pala, daong pandar siam ka kein lagaih di bhum taneh, jhul tagok salih bahrau hadah krah, salih lek taka so saong parilo jien mek tame ka rahra. Danak dak jeng brei daong prein khang ka gah ngak nong ban medin saong palei pala Ban raya patagok tui jalan bahrau, karo kajap saong ba drei tame dunya. Tal ini, hu 1.006 kaya, dlaam nan hu 220 kaya mek hu 4 patuk saong 786 kaya mek hu 3 patuk.

Min, tui ong Nguyễn Văn Đa, Phaok Yam ndok So Ngak nong saong Alam langik Ban raya Ho Chi Minh, tal tukvak urak ini ban raya oh ka hu kaya OCOP 5 patuk. Ban raya brei kham merat hu meg 5-10 kaya OCOP mek hu 5 patuk dalam thun 2026:

"Ban raya Ho Chi Minh brei paglaong pakat dom kaya OCOP meng 4 patuk tagok 5 patuk, ngan haong kein lagaih lac dom kaya brei khik hu tanut tui adat. Kayua nan bo So hu jalan ngak daong dom kaya OCOP 4 patuk brei salih dom kadha di langiu (kadung papaok, thaik thaot…), abih di nyu nan lac brei paglaong asar siam piah paglaong kaya tagok 5 patuk hu Mentri brei tangin".

Di danak dak Pambuak pablei salih kaya OCOP Ban raya Ho Chi Minh thun 2025 rah tabiak di phuong Vung Tau bahrau ini, rilo labik hu tut angan pahadar, peih tabiak kein lagaih ba kaya tame majam darak pasar, majam tadai kuan lagaih saong dom kenh pablei praong. Ini lac dom yaom kaom karo kajap, brei jien mek tame tani tanat saong jhul tagok cakrok kinh te palei pala di Ban raya Ho Chi Minh dalam tukvak ba drei tame./.