Hadah page puac adit, bruk gheih ghang hu rah tabiak di “Bein bingu pahla”di khu phố 3, phường Phú Mỹ, ban Thủ Dầu Một. Pak ini, dom urang takik patuah jamo hu dom urang menuac ngak pahla alin hadiah dom kaya pandap hu makna.

Sap ndom klao uan tabuan, meta mblan mblan di dom urang menuac hu taduan kaya pandap, dom tangin kuan di urang alin brei saong urang taduan mek ndung bak hatai anit ranam …taong abih ngak jeng sa thaik thaot gheih ka hatai urang menuac. Ong Phạm Văn Phụng, daok di khu phố 3, phường Phú Mỹ khan lac, diuk pasang ong ngak kong nhan, jien mek tame oh hu ginup piah raong amaik daok ruak saong dua anek nao bac. Meng hu bruk daong di bol bhap, sang jeng trun hu dom naong trak.

 "Meng bruk brei kein lagaih di karja palei, dom sang daok payua hu kein lagaih piah diukrai saong ngak bruk. Dom tuk kan kandah, kol dahlak tuk halei jeng hu karja daong. Urak ini sang daok kham merat ngak piah duah jien, hadei tuk hu lagaih jang ye ein veik paok pandap alin hadiah ka dom urang karei .”

Taphia bruk alin hadiah kaya pandap, daok hu dom bruk makna yau ye cakak mbuk oh mek jien, mbang panan oh mek jien…Taphia bruk alin kaya pandap, cakak mbuk saong mbang panan oh mek jien, daok hu bruk “Tu ao zero jien dong” hu ba mai bruk bui sambai ka rilo adei sa-ai kamei. Bein bingu pahla khu phố 3, daok lac “talei pambuak” di dom urang menuac ngak pahla haong dom urang kan kandah tapa bruk pamuak di karja phường saong khu phố. Meng bruk thau ka urang, rilo urang menuac ngak pahla hu taduan bruk daong ka dom anek saih kan kandah, atau dom sang kathaot.

Tamuh meng hatai caong klah rabha kan kandah haong dom urang rambah saong ngak asal kadha “Urang menuac daok dang thau ka bol bhap”, meng bilan 6/2024, dom phường Phú Mỹ, Phú Hòa di Thủ Dầu Một hu nao dahlau peih bruk ngak “Bein bingu pahla”.

Meng akaok meti, bruk nan rilo meng bruk daong di urang jakar, kong chuc, urang đoàn. Min, tuk mboh hu makna lagaih di bruk ngak, dak harei dak hu rilo rahra halan hatian ba drei tame, rik daong jien saong prein. Bruk ba gauk ngak di abih gauk ngak jeng sa bol bhap gul pataom, haniem phol. Ong Nguyễn Hồng Nam, Phaok Bí thư Thường trực Đảng ủy phường Phú Mỹ, brei thau: Piah rahra jia tame saong ba gauk klah rabha, bruk ngak tantu cambaic laic saong jao brei njauk manuac lac hu yaom glaong abih:

“Yaok bilan, Ndang uy, UB Bhap bini jak ba dom urang ngak pahla daong ka dom sang kan kandah di phường. Piah ngak praom njaom pambak, puk phường peih ngak saong da-a urang ngak pahla jao alin hadiah pandap tuk nan. Gam haong nan, kol dahlak jeng bhian mai tal yaok baoh sang piah duah thau tanat dom bruk kan kandah, yau nan bruk daong di urang ngak pahla hu siam lagaih saong hu mai tal tangin urang njauk hu daong.”

Ngak tui bruk ba tabiak “Urang menuac daok dang thau ka bol bhap” kayua Mban Tacei ba Danak dak Paglaong mbang jak ba “Padang bruk daok dang hu ilamo – văn minh đô thị” ban Thủ Dầu Một peih tabiak hu siam lagaih, taphia bein bingu pahla, dom bhum palei karei jeng peih ngak bruk yau “Bein bingu haniem phol”, “Bein bingu Gul pataom”…Yaom lac angan ieu karei di gauk min dom bruk nan jeng hu sa jalan ngak tabiak sa labik pataom me-in, pagam pambuak bol bhap, labik karja phường, dom urang ngak pahla ba gauk klah rabha hatai anit ranam, daong ka dom urang menuac kan kandah. 

Ong Trần Đông Thành, Phaok Akaok Ủy ban Mat tran Negar Việt Nam ban Thủ Dầu Một khan lac, angan haong jalan ngak “oh sa urang halei klak gilac di gah likuk”, oh lac sangka tal rahra di bhum palei bo daok klah rabha haong dom urang meng dom labik karei mai daok saong ngak bruk di Thủ Dầu Một. Kayua nan, rilo bruk pahla hu peih tabiak piah sangka tui njauk hatai Thủ Dầu Một ilamo, anit ranam.

 “Dom sang kathaot mai pak ini diukrai jeng hu dom phường daong. Abih di nyu nan lac, oh tok hệ thống mặt trận bo dom kapul chinh tri – xa hoi yau kapul Urang Kamei, kapul Chữ thập đỏ, Kapul Urang praong thun, Kapul Dam Dara…jeng ba gauk daong prein. Langiu di sangka ka sang kathaot, kol drei daok sangka tal dom urang rambah mejua dalam diukrai ini, công nhân atah palei, urang pablei vé số…”

Bruk ngak “Bein bingu pahla” oh lac hu makna dalam xa hoi bo daok daong dak padang bol bhap gul pataom, daong klak rabha haong gauk. Bruk pambuak labik hijao haong dom bruk pahla hu jeng sa labik daok siam mekre saong hadah hadai anit ranam./.