Sóc Trăng lac tinh hu rilo urang Khmer daok, meblah labaih 30% menuac sia dalam tỉnh. Dalam dom harei tết Chôl Chnăm Thmây, mikva phật tử Khmer hu rami ramik sang danaok. Di dom labik paha, dom hu tuan băng rôn, hala dok, bingu la, rami ramik ngak gheih piah salam uan thun bahrau di mikva.

Thun ini, mikva daok pak xã An Hiệp, huyện Châu Thành uan raok Chôl Chnăm Thmây  haong hatai chreih chrai bui sambai kayua hu sa thun pala drak  jayah. Mikva daok yuak padai Đông Xuân muộn haong nang suat lac labaih 1 tấn/công (jaik 1.300m2). Urak ini urang blei salih mai blei haong yaom mangaok mala 8.000 đồng/kg dom janih padai pajaih OM, Đài Thơm 8, urang ngak nong pak ini laba meng 4-5 triệu đồng/công. Ong Thạch Vạch, daok di palei Bưng Tróp A, xã An Hiệp khan lac: “Thun ini padai ngak njauk, yaom kaom ye dahlak ngak padai OM urang mai blei yaom 8 ngàn đồng/kg. Bilan padai ini hu laba, kaoh abih phun jien khak drak, li-ua hamu, blei pajaih, yuak kuak,… laba hu meng labaih 4 triệu-5 triệu đồng/công. Thun ini mbang Tet bui sambai lo”.

Dalam thun bloh, yaom lac daok rilo kan kandah, tavak tavaiy, min meng bruk kham marat di abih urang Ndang, abih rahra, bruk kinh tế - xã hội di Sóc Trăng hu rilo salih bahrau siam lagaih, ngak hu saong yam tapa 14/20 bruk ba tabiak. Abih di nyu nan lac, Sóc Trăng hu peih ngak samu gauk, peih ngak khang dom jalan ngak, sarak di Ndang saong Kanja ngan haong mikva bangsa Khmer, ngak brei salih bahrau praong dalam cak rok patagok kinh tế - xã hội di bhum bangsa.

Urak ini, dalam tỉnh Sóc Trăng gtaong abih dom xã hu jalan radaih oto nao tal pasak xã, hu talei ndien negar; labaih 99,6% dom baoh sang bangsa hu pandar ia hacih. Dom xa jeng hu sang bac, tal bac saong khik tani tanat tanut chuan pato magru trung học, y te dak harei dak cak rok patagok, bruk iek ruak, taong ruak dak harei dak hu paglaong. Ilamo siam gheih meng kan di mikva bangsa takik jeng hu khik ramik saong patagok. Ong Thạch Ngọc Bá, urang hu angan je dalam xa daok pak Trường Khánh, huyện Long Phú brei thau:

“Mbaok mata puk palei drei hahad hadai mboh biak cambaih laih, jalan mbak hu pala phun bingu, khik kajap hadah- hijao- hacih - mekre, dom jalan tapa dom xa, dom palei biak haci hacih. Raidiuk di mikva Khmer, mikva bangsa takik hu kanja drei sangka biak tani tanat”.

Tui ong Lý Rotha, Akaok Mban Bangsa tỉnh Sóc Trăng, tỉnh hu pataom tame peih ngak hu siam dom danak dak cak rok patagook kinh te, ilamo, xã hội; sangka daong duah jalan ngak mbang duah jien khang kajap ka mikva yam tagok dalam raidiuk; sangka ngak siam bruk khik ramik saong patagok dom yaom glaong ilamo di bhap bini Khmer.... Tapa nan, raidiuk, mbang ngui, ma-in sambai di mikva Khmer daok hu glaong tagok. Urak ini, dom baoh sang kan kathaot dalam mikva bangsa Khmer dalam tinh tok daok labaih 3,86%. Ong Lý Rotha ndom lac:

“Tukvak tapa, hu mbang tui danak dak bruk ngak negar ka cak rok patagok kinh tế-xã hội bhum bangsa takik, tukvak 2021-2025. Dalam nan meng puac thun 2022 akaok thun 2023, tinh hu pato tacei parabha phun jien piah peih ngak meng pak nan, tal thun 2023 mek hu jak jeng cambaih laih, mikva biak bui sambai, chreih chrai. Abih di nyu nan lac, tui jalan pato tacei di tinh lac pataom asal kadha, danak dak pambuak tal daong tapak ka rahra, pagap yau taneh daok, sang daok, ia pandar …”

Dalam bui sambai chreih chrai meng bruk ngak mbang kinh te sang, raidiuk mbang ngui hu siam tagok, dom danak dak, sarak, danak dak bruk ngak negar hu buh jien tame ngak samar drah hu daong ka mbaok mata puk palei, bhum mikva bangsa takik hu hadah hadai, rik daong tame bruk uan raok tết meng kan Chôl Chnăm Thmây thun ini di mikva Khmer Sóc Trăng hu bui sambai, chreih chrai jang./.