Huyện pulao Phú Quý lac labik hu gilai, kapal taong ikan rilo abih dalam tỉnh, lac 1.675 sruh gilai ikan, dalam nan hu 137 sruh ngak bruk hậu cần. Tukvak tapa, gah chức năng mboh hu 3 gilai ikan di huyện Phú Quý nao taong cap di bhum tasik negar langiu saong hu pacang cakak, langyah samar drah tui adat. Gah biên phòng, kiểm ngư daok ngak catang bruk tui iek kapal ikan taong cap angaok tasik saong di cảng ikan.

Trung tá Nguyễn Minh Hải, Chính trị viên Đồn Biên phòng cửa khẩu cảng Phú Quý brei thau, dahlau di tuk brei gilai tabiak tasik, hu pasang iek ginup dom janih harak gar, brei hu harak sanya oh taong cap tapa bhum tasik negar langiu saong brei ngak siam dom bruk pacang taong cap IUU (lac taong cap kaya ikan suan hukum, oh pathau khan saong oh njauk tui adat).

“Yaok thun, langiu di bruk pambuak gauk haong dom mban ngành di huyện, Chi cục Thuỷ sản tỉnh Bình Thuận hu pathau khan brei mikva thau cambaih saong ngak tui. Thun 2023 tal harei ini, kol dahlak hu pambuak bruk haong bilai kiểm ngư bhum Phú Quý patagok bruk pasang iek piah ba jalan ka mikva ngak siam bruk 3 oh”

Tukvak tapa, Bình Thuận jhul khang bruk pathau khan ka pacang taong cap IUU brei urang taong ikan thau, abih di nyu nan lac brei ka dom thuyền trưởng, po kapal, gilai ikan. Tui nan, Bộ Chỉ huy Bộ đội Biên phòng tỉnh pambuak bruk haong Chi cục Thủy sản peih 1.744 mbang pathau khan, pato tacei adat hukum brei ka labaih 160.300 mbang po kapal saong thuyền trưởng, jak ba urang taong ikan oh tame taong cap kaya ikan suan hukum di bhum tasik negar langiu. Gam haong nan, dom gah chức năng daok patagok langyah, taong phạt bruk ngak suan dalam gah kaya ikan, abih di nyu lac ngak suan gah IUU.

Meng thun 2018 tal thun 2023 hu langyah taong phạt 3.346 bruk haong yaom jien labaih 24 tỷ đồng. Meng nan, dom bruk gilai ikan lih tapa bhum tasik negar langiu trun, daok takik. Ong Huỳnh Văn Khải, Phaok akaok Chi cục Thuỷ sản brei thau, dalam tukvak tapa, gah ngak nong ngak catang bruk pacang taong cap IUU, abih di nyu lac dom kapal oh tut angan, oh đăng kiểm, oh hu harak adat (ieu lac kapal, gilai 3 oh).

“Kol dahlak biak caik hatai tal dom kapal gilai caik pagam pandap tui iek jalan nao bo oh daok hu mboh angaok tasik, tacei pato dom bilai kiểm ngư patagok bruk langyah, taong phạt saong kakei mikva, tuk nao mai angaok tasik atau tuk daok taong cap kaya ikan angaok tasik, brei peih jamriak pasang iek jalan nao luac harei malam. Abih di nyu lac kakei, pahadar dom gilai mbuan lih tapa bhum tasik negar langiu, jaik tapa labik brei adat, kol dahlak bhian ieu mikva mai veik haong bhum tasik Việt Nam”.

Bộ Chỉ huy Bộ đội Biên phòng tỉnh Bình Thuận hu tacei dom đồn biên phòng pambuak bruk pasang iek, padang angan 92 kapal gilai daok dalam angan mbuan lih tapa bhum tasik negar langiu piah tui iek catang, brei bruk ka 46 urang jakar tui iek dom sruh gilai kapal ikan nan.

Đại tá Đinh Văn Sáu, Chính uỷ Bộ Chỉ huy Bộ đội biên phòng tỉnh Bình Thuận brei thau, piah ngak siam bruk pacang taong cap IUU, tukvak tapa, biên phòng tỉnh hu brei bruk ka urang đảng tui iek dom sang labik drei daok piah thau cambaih bruk meng di palei, dom sruh kapal gilai halei, po gilai kapal halei mbuan lih tapa bhum tasik negar langiu.

“Pambuak bruk haong gah kaya ikan tui iek dom sruh gilai taong cap kaya ikan, abih di nyu lac dom kapal taong cap kaya ikan langiu tỉnh piah pambuak bruk haong dom tỉnh, abih di nyu lac dom tỉnh gah meraong, piah tui iek dom gilai taong cap dalam saong langiu tỉnh”.  

Meng bruk ba tangin tame khang di abih hệ thống chính trị tỉnh Bình Thuận dalam pacang cakak, oh daok bruk gilai ikan, urang taong cap ikan taong cap suan hukum di bhum tasik negar langiu, tapa nan, hu daong haong grauk labik dalam taneh ia, khang hatai taoh talaih cảnh báo “thẻ vàng”, khik caga kaya ikan saong cakrok patagok bruk ngak ikan khang kajap dalam tukvak tal./.