TP.HCM lac labik hu talei rohim haong jaik 50% dalam abih tih labaih 5,8 triệu urang Việt daok diukrai, ngak bruk di labaih 130 taneh ia saong bhum taneh di dunya. Dalam nan, 80% urang Viet daok di dom taneh ia hu bruk kinh te, ilamo, kong nghe saong pato magru cak rok. Yaok thun, dom jien negar langiu tuh mai TP.HCM meblah meng 38%-53% abih tih jien negar langiu payua mai Việt Nam. Quý I thun ini, jien negar langiu payua mai Ban raya lac glaong di abih, hu jaik 2,9 tỷ USD, tagok 35,4% dut saong tukvak ini thun blaoh. Phó Akaok UBND TP.HCM Bùi Xuân Cường taong yaom lac: “Urak ini hu prein khang biak praong, biak hu makna, rilo thun tapa, payua mai Ban raya biak tani tanat, biak rilo lac jien negar langiu. Thun 2023 hu 9,46 tỷ USD, rilo jang jaik 3 mbang FDI. Bruk njauk iek praong nan lac dalam tuk taom gaok urang pan akaok TP.HCM rilo urang Việt Nam daok pak negar langiu brei mboh hatai caong hu buh jien tame rilo jang ka taneh ia, palei negar”.

Tiến sỹ Trần Du Lịch taong yaom lac, dom jien negar langiu hu prein biak khang ngan haong gah kinh tế. Langiu di bruk pasiam veik raidiuk rahra daok daong ka taneh ia samu veik jien negar langiu. Urak ini TP.HCM daok caong dui pachreih khang jang jien negar langiu, ba janih jien ini tame padang ngak hạ tầng kỹ thuật, hạ tầng xã hội min TS Trần Du Lịch mboh lac, caong hu yau nan, camriep abih TP.HCM brei ngak siam dom bruk, dom jalan buh jien tame, abih di nyu nan lac njauk hu dom kadung jien buh tame.

Tui TS Trần Du Lịch, urang taduan hu jien negar langiu tuk halei jeng hu jalan piah pandar hu siam lagaih di abih. Kayua yau nan ye, TP.HCM njauk ngak tabiak dom “bhum dhaong” piah ka janih jien ini meda nduac tame, gam pabak hu bruk cakrok gam tamuh hu laba. TS Trần Du Lịch kakei lac, piah dui pachreih gah ini njauk ngak tabiak sa jalan gah adat hukum piah ngak habar ka nyu salamat siam mekre abih ka gah buh jien tame, caih manek tabiak jien laba, khang kajap piah ka urang kuhri kuhria hu:“Dahlak caong lac anak tal tuk peih ngak Sarak 98 ye hu dom bruk ndung bak sarak saong daok hu ngak salah, dalam nan bruk quy hoạch, ba tabiak dom danak dak piah dui pachreih urang buh jien tame dalam tuk nan kol drei njauk pilih ruah dom danak dak saong jalan nao pamaong tal phun jien di negar langiu tame dom danak dak nan. Mayah hu, meng 2025 meda dui pachreih hu janih jien ini ka bruk buh jien tame”.

Tui TS Huỳnh Thanh Điền, Đại học Nguyễn Tất Thành, dalam tuk daok kurang phun jien buh tame yau urak ini, TP.HCM njauk hu rilo jalan langyah piah dui pachreih chip gah jien di negar langiu ini. Tukvak tapa, rilo danak dak pambuak gauk di công – tư peih ngak suai njauk pasang iek veik bruk peih ngak sanya haong gah buh jien tame daok tavak hagait piah hu jalan langyah taoh talaih; abih di nyu nan lac njauk hu bruk taduan veik di hukum piah peih ngak abih tih dom sanya haong gah buh jien tame. tapa nan meda padang hu hatai jia piah dui pachreih urang buh jien tame gilac veik.

TS Huỳnh Thanh Điền mboh lac, TP.HCM njauk pambuak haong jalan ngak lac patabiak trái phieu danak dak, hu dom danak dak cambaih laih, oh njauk lac trái phiếu jien negar langiu.

TP.HCM njauk hu dom kadung jien negar langiu di dom gah cambaih laih, patabiak trái phiếu di dom gah, dom bruk ngak, brei thau tantu cambaih laih. Tuk nan, mikva daok di negar langiu meda duah thau saong payua jien mai buh tame: “Urang ngak tabiak negar langiu ngak caong payua jien mai ka taneh ia, caong buh jien tame  urang oh hu tukvak. Ye njauk tapa dom kadung jien buh tame. kadung jien ini meda roh duah saong pandar jien njauk jalan, njauk bruk, kadung jien ini tok roh duah dom danak dak, dom gah, dom bruk ngak ini. Buh jien tame tapa kadung jien meng ngak hu, daok mayah patabiak ta-eng drei, dahlak hu 20 – 30.000 USD jeng oh thau jalan halei piah buh jien tame”.

Tui danak dak cak rok patagok jalan mbak di dalam ban raya tukvak 2020-2030, TP.HCM caong hu phun jien labaih 970.000 tỷ đồng piah buh tame dom danak dak. Saong dalam tuk daok kurang phun jien yau urak ini, mayah TP.HCM hu dom sarak piah ka janih jien ini hu pataom sa labik, hu ba tame ngak dom jalan mbak, hạ tầng xã hội, pataom tame dom gah pablei salih saong buh jien tame ye kein laba meda praong jang saong pambak tal cak rok patagok kinh te meda glaong jang rilo. Makna lac kayua janih jien ini biak tani tanat, tagok tui yaok thun, oh gaok rilo adat, oh tui dom bruk masaiy, adat biyar jien yau dom phun jien negar langiu karei karei./.