Kapul manyim khan bai meng kan di palei Mùi 2, xã Cư Né, huyện Krông Búk, tỉnh Đắk Lắk urak ini hu labaih 20 urang dalam kapul. Ini jeng lac dom urang bac tamat tal bac pato bruk manyim khan bai kayua Kapul urang kumei huyen pambuak haong Pasak pato bruk ngak – pato megru thường xuyên huyện Krông Búk peih tabiak. Hadei di tuk bac salah, dom saai kumei eng drei pataom gauk veik piah padang kapul ngak tabiak, duah tuai damuai. Saai Hoàng Thị Niệm (bangsa Tày), Akaok kapul manyim khai bai meng kan palei Mùi 2 brei thau, ngan haong yaok đơn pandap, kapul meda taduan saong jao veik ka dom urang dalam kapul ngan haong yaom jien pah ngak meng 300 – 500 ribau daong yaok sa pandap. Bruk manyim bhian hu ngak dalam tuk lahe, min hu daong ka dom adei saai gam hu jien mek tame, gam khik ramik hu bruk ngak meng kan."Dahlak takre bruk manyim khan bai di urang bangsa Ê Đê. Dom tuk lahe, dom harei langik hajan ye jeng ngak veik piah hu jien mek tame. urak ini, kapul manyim jeng daok palagaih ba bruk ngak ka adei sa-ai kumei hu jien mek tame.”

Patui veik dom jak jeng, thun ini, huyện Krông Búk daok brei peih tal pato pasram ilamo manyim khan bai mbang ka 2. Tal bac hu peih tabiak meng kreih bilan 3 meng blaoh, dui pachreih hu 35 urang bac hu mbaok tame. Saai H Hà Kpă, bangsa Êđê, daok di puk Ktơng Drun, xã Cư Né, huyện Krông Búk khan lac:"Tuk camriep bahrau tame bac ye mboh lac kan min ba tangin tame ngak blaoh jeng mboh randap, mboh takre bruk bac. Urak ini adei saai  takre, harei halei jeng nao bac, hadei di ini bac salah ngak hu pandap ka drei blaoh hadei di ini mayah hu jalan pablei tabiak, pablei hu pandap drei manyim blaoh duah hu jien mek tame ka drei ".

Gam haong bruk manyim khan bai, dalam thun ini, huyện Krông Búk meda peih 9 tal pato bruk ngak katut harei ka labaih 300 urang bac, ngan haong dom bruk ngak karei, lac hàn điện, ramik caik dien ia, jhik kong nghiep, raong glang, pala bimau. Amuk Nguyễn Thị Thu Trang, Phó yam ndok iek gah pasak pato bruk ngak – pato megru thường xuyên huyện Krông Búk brei thau, dom mban, dom gah, dom bhum palei hu pambuak gauk pasang iek, duah thau  hatai caong bac bruk ngak di rahra piah padang ngak jalan pato ka nyu lagaih.“Urang bac biak chreih chrai hu mbaok tame, langiu di bruk hu pato brei saoh, dom adei daok hu mbang tui sarak daong brei. Anak mata lac pato ka dom adei thau hu bruk ngak piah khik bruk ngak meng kan di palei. Dom tal pato ini lac pato gam gam ka dom adei, labaih 3 bilan  dom adei hu harak chứng nhận bac bruk ngak”

Meng thun 2021 tal urak ini, tỉnh Đắk Lắk hu pato bruk ngak ka labaih 7.000 urang ngak di palei, dalam nan hu labaih 6.000 urang ngak lac urang bangsa takik, hadei di tuk pato pakai, labaih 80% urang bac hu bruk ngak bahrau atau hu paglaong tangin gheih ngak brei nang suat, jien mek tame glaong jang. Ong Nguyễn Quang Thuân, Phó yam ndok Sở Lao động, Thương binh saong Xã hội tỉnh Đắk Lắk brei thau, piah ka bruk pato bruk ngak hu siam lagaih, danak dak pato bruk ngak hu padang ngak tui asal kadha pasang iek hatai caong di urang bac saong darak pasa urang ngak:"Dahlak jeng hu mbaoh tangin pambuak bruk haong dom doanh nghiep dalam saong langiu tinh caong pilih ruah urang ngak; ndem mayai nao mai, ngak bruk haong dom sang bac trung cấp, cao đẳng dalam tinh piah patagok bruk brei thau, ba dom bruk ngak bo urang daok caong hu piah pato. Ngan haong urang ngak eng drei padang bruk ngak jeng hu ngak bruk haong gilang paraik sarak kanja. Tui jalan ngak di yaok urang ngak meda daong brei masaiy jien tui kuhria lac labaih 50 triệu sa urang".

Tapa bruk pato bruk ngak, rahra puk palei di Đắk Lắk hu thau dom bruk ngak saong ilamu ngak bruk, paglaong tangin gheih ngak, daong ka urang duah bruk ngak hu mbuan lagaih, patagok jien mek tame. Bruk pato bruk ngak tui hatai caong di urang bac saong tui bruk di yaok bhum palei jeng hu daong salih urang ngak, salih kinh te, padang prien khang piah cak rok patagok kinh tế - xã hội./.