Tukvak 2019-2024 mboh hu bruk buh jien tame ngak biak ralo di bhum urang bangsa takik tinh Binh Thuan ngan haong taong abih phun jien labaih 600 tỷ đồng meng rilo phun jien karei di gauk. Dom danak dak ca rok patagok bruk ngak mbang kinh te – xa hoi hu ngak pabrei salih barau mbaok mata palei pala, bruk ngak nong, patagok raidiuk di bhap bini.

Di palei 1, xa Đông Tiến, ong K’Văn Cảnh daok jan var haong bruk pak gui dalam baoh sang barau padang ngak biak khang kajap.

Ngan haong yaok baoh gui pablei hu labaih 500.000 ndong, ini lac phun jien duah hu biak prong di baoh sang. Ong Cảnh oh padauk hu hatai bui sambai tuk canah jalan anak sang barau hu ngak blaoh:

"Dahlau daih mboh sruh manuk sruh lamen, urak ini jalan ngak blaoh nao mai siam jang, oh daok gluh bok yau dahlau daih tra. Dahlau daih yaok mbang nao tabiak jalan yaok mbang kan, thei nao jang labuh. Urak ini jalan ngak blaoh paje, mboh jang uan."

Đông Tiến, xa urang K’ho ngan haong 1.121 urang/337 baoh sang, kham merat yam tapa ralo kan kandah akaok mereip dalam bruk padang ngak palei pala barau kayua labik ha tang daok takik, oh ka siam.

Mai meng bruk sangka di Ndang saong Karja, ha tang di xa hu padang ngak barau, abih di nyu lac jalan mbak nao mai, rabaong ba aia, sang bac, balai iek ruak, jabat UB Bhap bini xa saong dom danak dak ilamo, padhih. Mai meng nan bo Đông Tiến mek hu 19/19 tanut palei pala barau di puac thun 2023.

Ong K’Văn Góa, Akaok UB Bhap bini xa Đông Tiến, brei thau danak dak padang ngak palei pala barau daok ba mai ralo bruk ngak biak biai hu mboh di anak mata, yau: pasiam veik jalan tame labik pala drak Sông Do - Kà Tót; ar pacang cakak glut jaleih kraong Do, kraong Kà Tót; pasiam veik ribaong kraong; tatua tapa craoh Bằng Lăng. Bruk ngak ini oh lac tok pasiam rai diuk di mikva bo daok daong ngak brei siam mekre bruk ngak mbang pala drak di bhap bani. Ong Góa khan lac:

"Dom bruk ngak karei jang njauk nao gam haong bruk patagok jien mek tame di mikva nan jeng lac piah ngak brei patrun bruk maong akaok pambak tame bruk daong ba di pakat karja saong ta-eng drei yam tagok. Abih di nyu lac Pasak Yitvu bhum ceik tinh nan lac hu blei tame kaya nong di mikva, ngak brei patrun maneng bruk urang pablei salih gah langiu kateik geik yaom kaom, nan jeng lac kadha siam lagaih piah ka mikva cak rok patagok."

Meng Đông Tiến, huyen Hàm Thuận Bắc, khaol dahlak mai haong mikva Raglai di xa bhum ceik Phan Dũng, huyen Tuy Phong. Jalan nao cagar ceik glai ram nan ye peih tabiak bruk ngak rivang ma-in brei ka puk palei.

Hu jalan trekking Phan Dũng – Tà Năng, bhap bini Phan Dũng akaok mereip cakrok patagok hu bruk rivang ma-in, pasiam veik raidiuk.

Phan Dũng hu labaih 250 baoh sang ngan haong jaik 1.000 urang, mboh rilo lac bhap bini Raglai. Jaik abih baoh sang thei jeng hu gom saong aia hacih piah pandar.

Ong Mang Hạnh, Phaok akaok UBND xa Phan Dũng, brei thau xa hu balai y te, sang bac hu padang ngak biak siam saong abih di nyu lac baoh catua tapa binek Phan Dũng (di Km15+600) hu ba tame pandar, ngak brei palaghaih ka bruk nao mai saong pajeng ba kaya nong. Ong Hạnh ndom lac:

"Meng tuk hu danak dak jalan ngak pakat negar, puk palei jeng taduan mek hu 3 danak dak karei di gauk. Kasa nan lac danak dak padang ngak palei pala bahrau, kadua nan lac danak dak cak rok patagok bruk mbang kinh te – xa hoi bhum urang bangsa takik saong ka klau tra nan lac danak dak patrun kathaot khang kajap. Ngan haong xa Phan Dũng, puk palei jeng hu peih ngak samu gauk, abih di nyu lac danak dak padang ngak palei pala bahrau hu peih ngak dom pandap kaya."

Dalam 5 thun tapa, jaik 208 ty ndong hu buh tame padang ngak labik ha tang brei ka bhum urang bangsa takik Binh Thuan, dalam nan hu phun jien meng danak dak jalan ngak pakat negar cakrok patagok bruk ngak mbang KT-XH bhum urang bangsa takik saong bhum ceik.Danak dak hu ngak brei patagok talei pambuak nao mai di dom bhum, ngak brei palaghaih jang ka bruk padang ngak palei pala bahrau.

Binh Thuan hu 34 bangsa takik ngan haong labaih 106.000 urang/26.335 baoh sang, meblah labaih 8,4% bhap bani di tinh. Labaih 50% baoh sang urang bangsa takik diuk rai di bhum ceik, atah pasak, gaok rilo kan kandah dalam bruk taom gaok haong dom kadha siam gheih.

Yaom lac ket cau ha tang hu padang ngak, min jeng oh ka sanu gauk, abih di nyu lac jalan mbak nao mai di langiu mblang hamu, jalan ribaong ba aia saong labik ngak tabiak hadei di yuak kuak, paih baoh.

Ong Nguyễn Văn Song, urang bangsa Rai daok di xa Hàm Cần, huyen Hàm Thuận Nam klah rabha:

"Ngan haong ta-eng dahlak nan lac biak caong khin dom pakat, dom gah, Ndang patui veik sangka bruk bangsa jang piah ka dom bhum palei urang bangsa takik tui samu haong dom xa di bhum taneran, ba taneh aia drei dak harei dak cakrok patagok."

Ong Nguyễn Minh Tân, Akaok MBan Bangsa tinh Binh Thuan, khang panuac lac meda pambuak bruk haong dom gah, dom gah, puk palei brei panuac ka UB Bhap bini tinh maong iek buh jien tame ngak dom bruk ngak daok caong khin. Dalam nan brei ngak dahlau ka jalan mbak pambuak pagam dom bhum palei, jalan nao tal pasak xa, puk, palei, bruk ngak aia hacih sa-at. Ong Tân khan lac:

"Khaol drei meda taom gaok haong dom bruk ngak, asal kadha, jalan ngak barau, jalan saneng barau ngan haong bhap bani bangsa takik. Ngak habar piah salih barau hatai saneng jalan ngak di mikva brei ka biak biai cak rok patagok khang kajap saong cak rok patagok suai lavik jang. Dalam tukvak anak tal, pataom tame ba ilamu khoa hoc ky thuat brei ka bhap bani pandar tame dalam bruk ngak mbang pala drak, pablei salih, jeng yau cakrok patagok bruk ngak mbang pablei salih pandap panda di bhum urang bangsa takik. Saong meng nan ngak jeng labuk pambak ka kinh te xa hoi bhum urang bangsa takik cakrok patagok khang kajap."

Ngan hoang bruk buh jien tame ngak biak rilo saong bruk mek tangin tame ngak samu di gauk, Binh Thuan daok ngak brei salih bahrau dalam rai diuk kinh te – xa hoi bhum urang bangsa takik. Yau nan min, piah ka dom baoh jeng siam mekre saong biak biai ba mikva yam tagok, njauk patui veik dom jalan ngak biak siam jang, pataom tame cak rok patagok hatang samu gauk, pandar ilamu khoa hoc – ky thuat saong pamedeih pren khang dalam bhap bani./.