Dom harei jaik Tet Nguyen ndan ini, sa-ai Đàng Thị Mỹ Thái, sa baoh sang kathaot daok di palei Thành Đức, xa Phước Hữu, huyen Ninh Phước, Ninh Thuan biak bui sambai tuk hu karja daong padang ngak sang jaik blaoh. Baoh sang hu padang ngak tui 3 khang kajap, praong labaih 50 m2 kuhria 100 trieu ndong. Langiu di jien karja daong, sa-ai Thái daok hu mikva puk paga, gauk gar brei jien nyim pabak ngak jaik 100 trieu ndong hu yau nan baoh sang hu padang tagok praong laneng lanoi. Caga ramik tame sang birau daok, sa-ai yau yam tapa sa raidiuk birau, oh daok haduh hatai huac tuk langik hajan hangin khang. Urak ini, baoh sang sa-ai meda sahanang hatai daok dalam baoh sang bak anit ranam.  Sa-ai Đàng Thị Mỹ Thái bui sambai lac:

“Hu karja daong 90 trieu ndong dahlak ini biak uan tabuan. Hu mikva, gauk gar daong jien hu 100 trieu tra, ngak hu sa baoh sang praong siam laneng lanoi yau ini. Hu sang birau brei anek bik trei daok. Dahlak rambah yau nan ye karja daong biak thau dhar phol”.

Oh atah di ini, baoh sang Jum pataom hu Mat tran Negar Viet Nam huyen Ninh Phuoc  daong 100 trieu ndong ka sang ong Đàng Thành jeng daok tame ngak dom bruk piah salah blaoh ba tame daok. Sahaneng ka raidiuk tani tanat oh daok atah bayah veik, ini lac piah ka dom baoh sang meng lavik mai kathaok daok ndam gam, rambah rambeip yau baoh sang ong Thành kham merat yam tapa truh kathaot dalam tukvak anak tal. Ong Đàng Thành khan lac:  

“Biak thau dhar phol karja daong ka dahlak 90 trieu ndong. Dahlak pabak tame 12 trieu veik. Hu adei sa-ai buh prein tame ngak, yaok urang 5-6 trieu tra pabak hu 200 trieu. Ndua en ngai karja palei, kara negar hu daong ka dahlak ngak hu sang pacang pandiak pandaok di hajan”.

Lac labik pambak tame di urang kathaot, Mat tran Negar dom pakat hu rilo bruk  ngak daong tani tanat raidiuk xa hoi, abih di nyu lac daong padang ngak sang jum pataom ka urang kathaot tapa ralo danak dak biak lagaih. Bruk jak ba rik jien tame Kadung jien “Daong urang kathaot” bhian peih ngak, pambak tame dom bruk praong di tỉnh mek hu rilo jak jeng siam mekre. Kuhria meng thun 2021 mbiah tal ini, Mban jak ba Kadung jien taduan hu bruk pachreih tui di dom gah, urang, doanh nghiep kuhria mboh labaih 85 ty dong. Meng kadung jien nan, Mat tran Negar dom pakat hu daong ngak birau 618 baoh sang saong pasiam veik 25 baoh sang Jum pataom. Ong Ma Nhông Đông, Akok UBMT Negar Viet Nam xa Ma Nới, huyen Ninh Sơn, tinh Ninh Thuan khan lac:

"Padang ngak sang daok tui danak dak Pakat negar patagok kinh te bhum urang bangsa saong bhum ceik. Urak ini, ta-eng xa Ma Nới  daok padang ngak 5 baoh sang. Dalam nan, palei Gia Rót 4 baoh sang. Khol dahlak jak ba mikva mesre di Gilang pariak sarak karja gam hoang karja piah ngak saman, yaok baoh sang labaih 90 trieu ndong”.

Mat tran tinh Ninh Thuan hu padang ngak tui danak daong sang daok ka urang kathaot, jaik kathaot vaktu 2023 -2025 caong padang 1.423 baoh sang kathaot  di thun 2025. Dom baoh sang ndung bak anit ranam daok hu mboh dak harei dak ralo di tỉnh Ninh Thuan, tapa nan hu daong ka ralo urang kathaot, abih di nyu lac urang bangsa takik hu sang daok yau hatai caong khin “hu labik daok, hatai sahanang ngak mbang”, tani tanat  raidiuk, dak harei dak patruh kathaot khang kajap. Ini daok lac bruk piah tinh Ninh Thuan peih ngak brei 1.243 baoh sang abih taik tahak di thun 2025. Ong Nguyễn Long Biên, Phaok akaok UB Bhap bini tinh Ninh Thuan  khan lac:

“Dalam tukvak anak tal, khol dahlak daong padang Mban tacei ba piah peih bruk jak ba ngak tui Thu tuong ba tabiak, kham merat jeng yau pataom tame dom prein khang di abih gah chinh tri ngak habar tal thun 2025 tinh Ninh Thuan oh daok baoh sang halei taik tahak.”

Sa bilan ban pataih birau veik mai tal haong bhum palei Ninh Thuan ngan haong rilo bruk ngak mboh hadah mbaok meta. Bui sambai ralo dak harei dak hu rilo urang kathaot di Ninh Thuan hu sangka daong sang danaok saong uan raok Tet Nguyen ndan Ula Naih dalam dom baoh sang daok pahe sơn birau bah, ndung bak hatai anit ranam. Yaok baoh sang hu padang tagok oh lac hu abih hatai, bruk ngak di dom pakat, dom gah  saong he thong chinh tri bo daok klah rabha, daong ka gauk, tui hatai anit ranam “Kadaoh lei anit ka baoh bloi hei” di taong abih bhap bini. Ini lac pabak prein khang, ngak jia hatai tame piah urang kathaot yam tagok tapa truh kathaot, padang raidiuk birau saong jeng piah Ninh Thuan kham merat haong taneh ia ngak salah bruk tame thun 2025 oh daok sang halei tak tahak./.