Ong Rơ Chăm Trom, umo 84 thun, sa urang taha daok di palei Bua, xa Ia Pnôn, huyen Đức Cơ, tinh Gia Lai brei panuac khan, bhap bini di palei hu urang jakar tapen nagar daong ralo di dalam raidiuk, yau ye pato tacei brei pala drak, raong glang, ngak sang danaok brei karo… Tet raya tal, harei akaok thun barau mai, bol lin caga tapen nagar daok peih iek ruak gam haong brei hadiah jru ka dom baoh sang dalam sarak karja, brei ka baoh sang urang kathaot ngak ka ong mboh chreih sambai.

“Dahlak urak ini umo jeng praong thun, hu ralo ruak dalam rup, tal masa raya Tet mai urang jakar di tapen nagar mai ieik ruak saong brei jru, dahlak mboh biak bui sambai. Bhap bini rahra di ini daok ralo kan daman yau nan ye hu bol lin caga tapen nagar peih ieik ruak mikva mai biak ralo. Dom urang jakar ieik ruak dan saong kakei abih hatai tantu cambac lac bruk pandar manyum jru cavao njauk cara njauk janih, alin hadiah kaya brei ka sang kathaot saong dom anek saih bac magru piah hu raya tet la-an langaoh, bui sambai.”

Daong brei khang kajap karo di bhum taneh tapen nagar, kapuk bol lin cagar tapen nagar di tinh Gia Lai tuk halei jeng cak hatai brei ka bruk dakvah bhap bini rahra, padang khang talei rohim bhap bini bol lin karo kajap. Tui jalan “3 ndam, 4 gam” (ndam labik dhua, ndam saong bhap bini, ndam bruk palei; gam mbang huak, gam daok, gam ngak, gam sap ndom mayai di urang bangsa takik), kapul bol lin caga tapen nagar tinh Gia Lai tuk halei jeng gam gam saong bhap bini rahra dalam saneng kuria, dalam bruk ngak mbang, padang raidiuk ilamu palei, padam klak adat cambat yang mabang oh daok lagaih.

Dom harei barau akaok thun 2025, ralo bruk ngak hu angan, chreih sambai di dom balai tapen nagar peih, daong brei ralo janih kadha chreih hatai sambai suka brei ka mikva rah bhap bini, mikva urang bangsa bui sambai ba hatai jie gam tame saong bol lin daok caga tapen taneh ia nagar. Dai ta Nguyễn Văn Nghị, Phaok Chinh uy Bo Chi huy Bol lin Caga tapen nagar tinh Gia Lai brei thau.

“Harei akaok thun harei raya tet mai, bol lin caga tapen nagar daok di tinh Gia Lai brei peih ieu dom jabat labik rik daong buh tangin buh prein yava piah oh klak thei di lakuk raong, piah daong ka taong abih bhap bini rahra di bhum tapen nagar hu raya Tet taong abih. Nyu yau ye hatai anit ranam di Bol lin caga tapen nagar thau dhar phol tal bhap bini rahra di ini dalam nan ralo abih hu urang mikva bhap bini daok kan kathaot hu saron mbon sampurna selamat piah gam pan tangin sa hatai saong bhap bini rahra dalam nagar gam saong bonlin caga tapen nagar khik karo kajap po nagar di jalan tapen nagar taneh ia di masa raidiuk barau.”

Trung ta Đỗ Như Kiên, akaok balai caga tapen nagar di pabah mbang dunya Lệ Thanh ndom mayai lac: thun halei jeng yau nan, mbiah tal harei raya Tet dom adei saai bon lin daok di dalam balai gam saong karja palei gam tangin kuria caga brei raya tết ka mikva bhap bini di bhum palei drei padang bruk, njauk caik hatai di dalam nan tal dom baoh sang kathaot sang daok kan daman, khik yau habar piah ka mikwa hu raok uan harei tet trei ganap sampurna. Langiu di nan oh var rup tanggung javap khik kajap po nagar di jalan talei nagar, khik siam khik kajap khik karo luruh luac masa Tet.

“Balai bonlin caga tapen nagar paglaong pakhang bruk rah glang, ieik mata di tapen nagar piah khik kajap bruk ngak po di nagar bhum taneh ia nagar, gam gam pambuak bruk saong dom kapul kong an, bon masuh piah khik karo kajap chinh tri di bhum tapen nagar drei dang khik. Dang akaok pan bruk dom janih kadah di dalam raidiuk dalam jeng ye langiu bhum palei, brei sami samar drah capat brei thau tal Ndang uy, Mban tacei pato balai jeng ye pakat Ndang uy Halau daneng Bo Chi huy Bol lin Bien phong tinh Gia Lai.”

Dom bruk ngak siam ngak gheih ngak lagaih hatai di bol lin saong bhap bini hu angan di dalam raya harei bilan akaok thun 2025 oh lac sa janih ba mai sambai suka, ba mai janih la-an langaoh siam makre gheih ghang anit ranam brei ka bhum palei urang bangsa takik tapen nagar di tinh Gia Lai blaoh nyu daok daong brei padang talei pambuak khang saong bhap bini kajap karo, daong brei padang bruk khik kajap karo bhum palei taneh ia di talei tapen nagar. Gam tui di nan daok brei mboh cambac bruk ngak di dom kapul bol lin daok caga tapen nagar dalam bruk khik siam khik karo khik kajap taneh ia palei nagar di bhum taneh tapen nagar./.