Di palei Rạch Sên, xa Thạnh Phú, huyen Mỹ Xuyên, tabak tui rah tapen jalan 57 pakat huyen, dua mblang hamu padai praong hijao daok matian chraoh nerang. Di ini, yaok rituh met gilac mboh ribaong praong sit labaih 10 met bak ia taba brei ka ngak nong. Dua gah tapen jalan bak dom pein apuh sap janih njam patam baoh karaoh, gam thong urang ngak nong bubap jan var brei ka hamu taneh.

Daok paik amriak di taneh praong 2,5 cong, muk Thạch Thị Lay, di puk palei Rạch Sên, xa Thạnh Phú, huyen Mỹ Xuyên, tinh Soc Trang khan lac, pak ni, urang nong langiu bruk ngak hamu, ralo baoh sang hu caik taneh piah pala njam patam, taeng baoh sang muk jang pala 3,5 cong hu amraik, he saong lasun. Urakni phun amraik 4 harei paik sa mbang, hu jaik 100kg. Yaom pablei labaih 20 rabau kuhria sa kilo, hadei kuhria jien klak tabiak ngak, baoh sang hu kein laba 15 rabau kuhria sa kilo. Yam tame bilan paik baoh, kuhria lac paik 200 – 300 kg, baoh amraik saong lac paik tal Tet Nguyen dan thun 2025. Muk Lay biak uan tabuan khan lac, hu ngak puh, bo baoh sang muk hu kein laba miat miat, rai diuk jang hu ginup. Muk Thạch Thị Lay khan:

 “Dahlau diah drei njauk nong ba baoh amraik nao pablei, daok urak ini jalan mbak mbiah siam lagaih paje ye urang blei hu mai tal labik, biak lagaih”.

Palei Rạch Sên, xa Thạnh Phú, huyen Mỹ Xuyên ieu lac sa labik bhum palei hu pachreih bruk pala njam patam biak khang di tinh Soc Trang. Dom baoh sang di ini jeng caga piah ralo taneh piah pala njam patam baoh karaoh piah ngak hu siam, piah mek hu kinh te biak glaong. Taong abih dalam palei hu labaih 40 ha brei ka bruk pala njam patam baoh karaoh. Gam haong bruk caik hatai buh prei yawa jien padai brei padang ha tang jalan jeng ye ribaong kraong di Karja nagar daong brei ka mikwa ngak mbang dak harei dak lagaih, siam makre brei ka kinh te glaong, tapa di nan, daong ka ralo baoh sang duah hu jien tame, raidiuk dak harei dak hu karo tagok.

Ong Đinh Văn Diễm, Akaok kapul Chi Hội ngak Nong palei Rạch Sên, xa Thạnh Phú ndom mayai brei thau, dalam tuk langik tasik lagaih siam, yaok sa kong taneh mada duah hu labaih 40 trieu ndong dalam sa thun:

“Ia ye drei tuh pruh meng jammariak barau yau nan ye oh mada bih ralo prein, njual si buh jien tabiak. Pajaih ye drei jeng pilih dom janih lagaih haong langik tasik alam, brei yaom kom baoh karaoh ralo, yau ye amraik drei paik baoh dui atah harei masa jang dut pachoh tui dalau, jien mek tame sang karo jang, rai diuk mboh tagok jang di dalau diah.”

Ong Lê Hồng Quang, Phaok Akaok UBND xa Thạnh Phú, huyen Mỹ Xuyên, tinh Soc Trang ndom mayai brei thau lac, yaok thun xa Thạnh Phú pala njam patam jaik 1.200ha njam patam; ralo di dalam nan mboh pala di baoh ar dan haong mala takai hamu di bilan thu. Bruk sang ka caik hatai buh prei yawa jien ndo tame padang ha tang ngak nong brei siam purana patagok prein khang brei ka bruk pala njam patam di palei.

 “Urak ini jalan tabak nao mai meng tinh tal huyen, palei pala puk paga hu brei pambuak. Binek riya ribaong kraong hu kuac kuah rami ramik lagaih ia nduac nao mai brei ka bruh tuh, pajeng ban dap nda. Urang blei salih mai tal labik tal dhua biak lagaih sanang”.

Di dom harei ini, rah ra urang ngak nong di palei Rạch Sên daok bubap jan war ieik glang njam patam raok harei raya Tet Nguyen dan jaik si mai tal. Gam haong kein lagaih di dalam bruk ngak mbang, mikwa palei nagar caong khin harei raya bilan Tet jayah krah hadah, raidiuk mikwa bhap bini trei sil siam makrei selamat./.