Ngan haong kadha “Pacang khik, patagok saong pambak praong asal ilamo meng kan di dom bangsa takik saong bhum ceik pambuak pagam haong cak rok bruk rivang ma-in”, harei raya hu mbaok di 7 huyện dalam tinh nan lac Tuy Phong, Bắc Bình, Hàm Thuận Bắc, Hàm Thuận Nam, Hàm Tân, Tánh Linh, Đức Linh.

Harei raya pataom mbaok hu dom bruk hu angan: pataom gauk adaoh tamia kadha adaoh bhap bani; yaih angui cuk khan ao meng kan dom bangsa takik saong bhum ceik, ngan haong kadha “Ragam di glai ceik - Sap yava di ceik glai”, yaok kapul hu mbaok padang ngak sa danak dak daoh tamia kadha adaoh bhap bani. Danak dak ginum biai ilamu “Dom hagait daok rah tabiak saong jalan khik caga, patagok kaya khan ao meng kan di dom bangsa takik saong bhum ceik di tinh Binh Thuan”, hu mbaok di dom urang khik iek ilamu daok dalam Vu Ilamo bangsa, Mentri ilamo, padhih saong jirah rivang ma-in, urang pal akaok Uy mban bhap bani tỉnh; urang lambaok dom sở, gah dhan jabat karja ban, ngành, kapul nyaom tỉnh saong dom tinh hu rilo urang bangsa takik yau ye Ninh Thuan, Lam Dong, Dong Nai, Dak Nong saong Dak Lak.

Langiu di nan daok hu bilik brei prai parang iek, yaih khan ilamu meng kan di puk palei piah brei mboh ka dom baoh jeng siam mekre mek hu dalam bruk ngak mbang pala drak, pacang caga khik taneh aia, cak rok patagok kinh te - xa hoi, pakaro taneh ia palei nagar saong dak padang rai diuk ilamo bhap bani; pandap panda rivang ma-in, labik mai siam gheih…

Harei nyaom raya daok ba mai ka bhap bani saong tuai damuai jirah dom bruk ngak angui cuk khan ao bangsa meng kan dahlau, maong iek dom kadha adaoh tamia hu peih ngak biak siam; dom kadha daoh bhap bani oh bhian mboh. Langiu jaik di nan, bhap bani saong tuai damuai jirah daok ba drei tame dalam bruk parang iek meyaih khan pandap panda ilamo meng kan di puk palei ngan haong rilo janih pandap panda ndung bak ilamo bhap bani bangsa takik saong bhum ceik di dom puk palei dalam tinh Binh Thuan; dom pandap panda rivang ma-in jirah, labik mai siam gheih, pandap panda biak karei di puk palei, pandap OCOP pambuak pagam haong pren khang cak rok patagok bruk rivang ma-in jirah di puk palei.

Ong Võ Thành Huy, Phaok akaok Sở Ilamo, padhih saong jirah rivang ma-in Binh Thuan pok panuac brei thau lac: Harei Ilamo dom bangsa takik saong bhum ceik tinh Binh Thuan thun 2024 biak biai hu jeng harei nyaom pataom di bol bhap rah ra urang bangsa takik, bhum ceik; pok glaong dom inem krung ilamo oh mboh di meta di bhap bani urrang bangsa takik dalam tỉnh; pachreih bruk hu mbaok tame di dom urang nghệ nhân saong rilo urang daoh tamia, rah tabiak samu haong gauk dom bruk ngak ilamo, ilamu ndung ban asal ilamo bangsa.

Harei nyaom raya ngak brei mboh cambaih laih sarak nyaom biai mbang ka 9 Ban Chap hanh Trung uong Ndang (mbang XI) ka bruk “Dak padang saong cak rok patagok ilamo, anek manuac Viet Nam pabak hatai caong khin cak rok patagok taneh aia” dalam tinh Binh Thuan.

Tapa dom asal kadha hu peih ngak dalam harei nyaom raya ini, Mbang kapul pan bruk ba ngak hu pok brei 7 paok mayaom lek yai A; 5 paok mayaom yai B; 4 paok mayaom yai C saong 20 paok mayaom yai Khuyen khich pachreih brei ka dom kadha saong urrang tui dom janih yau ye: adaoh tamia brei ka kadha daoh bhap bani; angui cuk khan ao meng kan di bangsa; urang ma-in naih gheih di abih…

Langiu di nan, Mbang peih ngak daok hu pok mayaom brei giải A ka kapul nyaom huyen Bắc Bình; mayaom yai B ka huyen Hàm Thuận Bắc saong mayaom giải C ka dom huyen Tuy Phong saong  Đức Linh. Dom huyen Hàm Tân, Tánh Linh saong Hàm Thuận Nam taduan mek yai khuyen khich./.