Ngak bruk di sang bac tieu hoc Hoàng Diệu, xa Cư Né, huyen Krong Búk, tinh Dak Lak labaih 10 thun, nai gru H Luê Buôn Krông brei thau, labaih 65% anek saih di drei ieu lac urang bangsa takik gam tui bruk pato yau meng hlei mai, nai gru hu roh duah thau bruk pato bac bahrau di angaok internet, pambuak pandar dua sap Việt – Ê Đê piah daong brei ka anek saih meda thau paham tani tanat kadha bac.

“Abih dalam nan ieu lac tuk pato dom adei oh ka thau krein mbaok akhar huruh, mbaok lek taka so, dalam bruk pato ye dom adei oh thau pang sap Viet bhian pandar sap bangsa drei yau nan ye bruk ndom meyai, pato bac brei ka dom adei jeng biak kan. Patuah jamo lac drei jeng sa urang Randaiy, ndom meyai dua dua sap dalam bruk pato bac piah brei ka dom adei mbuan si paham si thau saong thau siam jang”.

Jeng eng drei brei ka bruk roh duah thau, pandar dom bruk pato bac bahrau, cei gru Y Bih Êban, pato di sang bac THCS Phan Chu Trinh, xa Cư Né, huyen Krông Búk kham merat pandar rilo ilamo jammariak ky thuat, pandap piah pato bac magru hu ramik dahlau di sang bac piah pachreih ka kadha bac, bingi si pang bingi si eik maong jang. Cei gru Y Bih brei thau, dahlau yaok tuk masa pato bac, drei tame internet duah dom thaik thaot pabak thau brei ka kadha bac, pambuak haong bruk gam bac gam me-in piah bac magru hu chreih sambai suka otanot jang:

“Sang bac hu ramik brei dom janih ilamo jammariak barau, ti vi, loptop pasang ye khol dahlak pasang dom thaik thaot tapak mata piah daong dom adei maong mboh thaik thaot lagaih, cambaic laic, meng nan thau kadha bac samar drah jang”.

Tinh Dak Lak urak ini hu jaik 500.000 anek saih meng pakat anek naih tal pakat bac pho thong co so. Brei mboh bruk dak padang gah pato megru ieu lac sa janih di dalam dom asal kadha hu angan makna dalam bruk padang palei pala bahrau, tukvak tapa, tinh daok hu rilo jalan langyah, paglaong bruk pato megru, sang bac tal bac saong peih praong bruk pato megru.

Tui ong Nguyễn Tường Hiệp, Phaok Yam ndok So Pato Megru di Dak Lak, piah paglaong ka bruk pato magru, abih di nyu dalam nan njauk caik hatai di abih nyu nan lac tal bhum atah bayah, bhum urang bangsa takik, ong Hiệp ndom mayai bruk paglaong ilamo pato bac brei ka dom urang ngak gah bac njauk daok caik hatai brei patui ngak.

“Njauk Brei paglaong bruk patagok kapul gru pato bac, dalam nan gru pato bac lac urang bangsa takik hu ginup prein ilamo pato bac magru, ganap ilamo piah meda hu pato bac saong pato bac hu siam lagaih. Jhul khang bruk salih lek taka so, pandar ilamo jamariak barau tui jaman kong nghe khau tin saong glo akaok manuac tame bruk pato saong bac dalam dom sang bac. Brei pasang iek piah ramik dom sang bac, tal bac, padam padeih dom bruk oh lagaih saong padang labik bac megru, jak ba dom kapul rahra piah duh ka bruk salih bahrau.”

Dalam Harak tanut asal kadha pakat Negar brei ka bruk padang palei pala bahrau hu 2 asal kadha pambuak tal gah pato megru, tinh brei peih ngak saong mek hu 83% saong 98%. Gam haong dom kham merat di karja, gah gar jabat nagar, dom dom cei nai gru pato di Dak Lak,dalam nan hu dom labik daok di bhum taneh daok kan daman kham merat ba hatai pambuak gam thong sang bac, tal bac, ngak siam bruk “pala menuac”, padang urang ngak piah hu mbaok tame bruk ngak dak padang patagok bhumi./.