Urakni Ban raya HCM hu biak ralo radaih, labaih 10 trieu radaih, hu labaih radaih moto, 1 trieu o to, oh ka kuhria dom radaih meng dom bhum palei peih mai pak ni.

Kadha ngak paoh gauk tui Trung ta, Tien si Lê Hoàng Việt Lâm – Gru pato Ndai hoc An ninh Bhap bini Ban raya HCM khan kayua manuac urang oh ngak tui hukum jalan saong hadei di nan lac glaow saneng di manuac peih radaih daok trak damak. Ralo manuac ruah jalan nao samar min oh saneng tal kanjah jhak:

“Sa kadha biak praong tra lac kurang ilimo peih radaih di jalan. Hadei di ganuh radaih, ralo manuac lac drei yau ni yau daih, khin ataong manuac karei lac biak jhak nan urakni ganuh radaih di jalan saong yaih khan rup drei glaong jang manuac karei di ngaok jalan.”

Ralo manuac peih radaih nan thau khik hai hu rup drei, naih rup drei trun veik di dom mbang ganuh radaih di ngaok jalan, caik rup drei tame labik urang piah lang talaih kadha.

Tui Thuong ta Lê Văn Hải – Phaok akaok Aduk Canh sat jalan mbak, Kong an Ban raya HCM, dalam dom mbang dhuk radaih di jalan, ralo manuac oh khik hu rup drei nan ngak tal bruk paoh gauk oh siam.

“Praong abih lac saneng ngak tui hukum jalan mbak piah nao njauk, takik ganuh radaih gauk, gaok bala. Tuk ganuh radaih gauk ye mikva thau lakau duis piah krein mbaoh duis di drei atau urang karei. Nan hu sa gah thau krein lac duis saong lakau duis nan kadha hu lang talaih siam makre.”

Ralo urang ilimo khan lac, mayah hu ilimo ndom mayai saong gauk, yaok mbang manuac thau lakau duis di gauk nan oh daok ginaong di hagait tra, dalam dom mbang ganuh radaih gauk ngaok jalan jang yau nan. Min ralo manuac oh ciuk lakau duis kayua saneng ngak yau nan lac drei suan saong bayar jien ka urang, nan bruk ni srau dau saong kan lang talaih.

Ong Đỗ Ngọc Hải, Akaok aduk Pasang khik Pandar ha tang jalan mbak, So Jalan mbak – Pajieng ba Ban raya HCM khan, bruk paoh gauk kayua trak damak di jalan mbak lac sa kadha njauk caik di hatai, kayua Ban Raya HCM lac sa ban praong ngan haong jaik 10 trieu manuac saong radaih dak thun dak ralo.

Ong Hải jang pachreih mikva pandar radaih kong kong piah patrun kurrang trak damak di jalan mbak yau urakni jalan yau patrun kurang bruk ganuh radaih gauk di ngaok jalan.

“Khol drei mboh tuk gal radaih, ganuh radaih, masao gauk dak harei dak ralo. Yau nan ye, khol drei pandar dom radaih kong kong veik hai.”

Tui urang ilimo pachreih, tuk ganuh radaih ngaok jalan, urang juai pandiak blau, nan lac duah jalan ngak siam haong gauk, peih radaih, ba manuac gaok bala nao labik karei. Mayah hu khan haong jabat chuc nang, lac mek thaik, quay phim veik bruk nan ka gah chuc nang hu khao tin piah lang talaih bruk. Oh klak nao tuk dom gah pambak bruk oh ka brei nao. Mbluak jang abih, mikva thau lakau duis saong hadar hai bruk paoh gauk ngak ka bruk trak damak jang veik min, gaok mai laik tame bruk ngak suan hukum.