Yava langik bui sambai mai tal labik sang apah sit di saai Nguyễn Thị Hồng Loan, urang ngak kong Kong ty TNHH Eland Viet Nam, di huyen Cu Chi, Ban raya Ho Chi Minh. Dom paok pandap Tet, dom kaya pandap bingi di “Nyaom darak pasar anit ranam” kayua kong ndoan peih ngak saong alin hadiah, kuhria caga ka sa tukvak Tet hu ginup. Saai Loan bui sambai lac:

“Dahlak biak uan tabuan tuk taduan hu paok pandap ni, kayua bhian harei mayah nao blei di darak pasar jang abih ralo jien min hu danak dak ni, dahlak tok abih 100.000 bo hu ralo paok pandap alin. Nyu biak lagaih ka raidiuk dahlak. Bruk ngak mbang urak ni daok kan kandah, dom paok pandap ni biak siam makre, daong dahlak hu prein kham marat ngak mbang yaok harei”.

Muk Lê Ngọc Hà, Phaok Akaok Kong ndoan co so Kong ty TNHH Eland Viet Nam janih Củ Chi, khan lac: Thun ni kong ndoan hu peih ngak ralo bruk siam makre piah sangka Tet ka urang ngak bruk:

“Tet ni hu ralo bruk daong harak ve radaih, radaih pui ngan haong daong 40% yaom ve harak ka urang ngak kong mai palei raok Tet. Di paok pandap Tet, yaok sa paok pandap hu yaom 450.000 ndong. Langiu di nan hu Lien doan lao dong Quan 1 nan khaol dahlak jang peih ngak sa danak dak uan raok bal pataih, dhar phol Ndang piah ka urang kong ndoan saong manuac ngak bruk hu mbaok tame dom harei adaoh tamia”.

Di quan Binh Tan, danak dak “Dhar phol urang ngak bruk” kayua Lien doan Lao dong quan peih ngak di Kong ty TNHH Jhik angui cuk Song Ngọc saong Kong ty TNHH Top Royal Flash hu ba bui sambai Tet mai aval ka 340 urang ngak bruk.

Ong Nguyễn Thái Thành, Phaok Akaok Kong ndoan dom Khu che xuat saong kong nghiep Ban raya HCM, khan lac: Thun ni, kong ndoan ba tabiak jalan sangka ka jaik 46.500 urang ngak kong gaok kan kandah ngan haong abih tih jien karja buh tame ngak labaih 35 ty ndong. Di chuoi ngak bruk “Harei jum pataom urang ngak kong - Nyaom darak pasar anit ranam” hu peih ngak di 5 labik, brei pandap panda yaom lap saong alin pandap Tet.

Siam gheih abih, danak dak “Tet pataom mbaok - Bal pataih jum pataom” daong 800 baoh sang urang ngak kong oh hu jien mai palei raok tet meng dom var huak puac thun anit ranam saong alin pandap Tet hu yaom 1 trieu 800 rabau ndong sa paok pandap. “Radaih pui bal pataih” hu jaik 1.600 urang di 500 baoh sang urang ngak kong gaok kan kandah mai palei raok Tet meng Binh Dinh tal Ha Noi. Ong Thành ndom lac:

Khol dahlak ba tabiak 2 tanut khin ngak lac gam sangka urang ngak kong oh hu jien mai palei raok Tet, peih ngak dom bruk taphia di dom bruk di mikva khu kong nghiep. Khol dahlak jang tacei pato dom kong ndoan co so peih ngak dom bruk sangka ka dom baoh sang urang ngak kong oh hu jien mai palei raok Tet. Khol dahlak caong ka abih tih urang ngak kong thei thei jang hu raok Tet pandiak tung hatai tui tacei pato di ban raya.

Dom paok pandap alin khan lac bruk sangka tani tanat di gah kong ty haong kapul kong ndoan hu daong ralo ka manuac ngak bruk di puac thun ni, ba mai sa bal pataih pandiak tung hatai saong trei sir./.