Jaik tal Tet Nguyen dan Ula Naih 2025, hadah page ini, Kapul urang lambaok Mban Chap hanh Trung uong Ndang, Akaok nagar, Quoc hoi, Rajaei, Uy mban Trung uong Mat tran Nagar Viet Nam hu mai caik bingu, tame Kalan rivang Chu tich Ho Chi Minh. Hu mbaok di harei rivang hu Tong Bi thu Tô Lâm; nguyen Tong Bi thu Nông Đức Mạnh; Akaok nagar Lương Cường; Akaok Quoc hoi Trần Thanh Mẫn; dom urang dahlau daih pan Akaok Quoc hoi Nguyễn Sinh Hùng, Nguyễn Thị Kim Ngân; Thuong truc Mban Bi thu, Akok Uy mban Pasang iek Trung uong Trần Cẩm Tú; Akaok Uy mban Trung uong Mat tran Nagar Viet Nam Đỗ Văn Chiến saong dom rajakar ngak praong di Ndang, di Karja urak ini saong dom urang dahlau daih ngak praong di Ndang, Karja…Bingu di Kapul mai rivang hu vak akhar “Miat miat dhar phol Chu tich Ho Chi Minh praong uranam”.

Di grauk labik dom puk, palei di bhum urang bangsa takik di tinh Kon Tum dom harei ini chreih chrai uan raok Tet haong Harei nyaom ahar bánh chưng hijao. Ini lac bruk ngak ndung bak makna pambuak khang kajap bruk jum pataom gauk dalam bhap bini. Rilo bruk chreih chrai hu peih ngak yau pakacah papaok ahar banh chung, glam baoh, tatung talei, gam haong nan lac dom paok pandap Tet biak lagaih haong raidiuk, daong mikva uan raok bilan pataih thun birau. Thun ini, hu labaih 560 puk palei  di tỉnh Kon Tum  hu peih ngak Harei pataom Ahar banh chung hijao saong bruk ngak ilamo daoh tamia chreih chrai  ka bhap bini.

Tinh Dak Lak, ngan haong 49 bangsa adei saai daok diuk rai, tuk halei jeng iek praong bruk jum pataom bangsa dalam bruk patagok kinh te - xa hoi. Dalam tinh urakni hu 921 urang taha palei, urang hu angan je dalam bhum mikva bangsa takik. Ni lac dom asal pusak, urang ngak kareih camin, pambuak bruk pathau khan sarak, jalan ngak di Ndang, sarak, hukum di Karja tal mikva dalam mbuan palei hu thau cambaih laih, ba gauk padak padang sa hatai gul pataom dom bangsa, khik kajap siam mekre ka mbuan palei. Dom urang taha di palei, urang hu angan jie dalam bhum mikva bangsa takik hu bruk ngak biak praong piah khik salamat siam mekre ka mbuan palei.

Danak dak “ Cambuai khim klao bilan Pataih” di phuong Cái Khế, quận Ninh Kiều, Ban Cần Thơ birau peih ngak pachreih hu rilo bhap bini saong dom rainaih hu raidiuk kan kandah. Mban peih bruk caga ngak rilo bruk yau daoh tamia, kadha ma-in saong labik pablei pandap oh abih jien. 300 blah phieu blei pandap yaom 350 ribau dong sa phieu hu alin brei ka bhap bini saong dom adei kan kandah. Meng dom bruk ngak hu makna di danak dak, Tet Nguyen ndan Ula Naih 2025 meda pabak veik hatai anit ranam jang tal bhap bini Ban Cần Thơ.

Tukvak Tet Nguyen dan 2025, bruk caong hu daong darah samar chip saong taong ruak tagok glaong. Sang iek ruak Da khoa tinh Ninh Thuan daok caong hu halau darah ginup piah pabak ka bruk taong ruak ka manuac ruak trak kan si dhit saong kurang darah. Piah pabak halau darah, sang iek ruak pambuak haong gah Mban tacei pato jak ba daong brei darah di tinh Ninh Thuan peih ngak dua mbang ka urang mai daong brei darah saong kuhria caga kapul gilang darah dalam dom bruk drah samar. Dom y, gru jru brei hu mbaok luac harei melam dalam dom harei Tet piah daong taong ruak sumu.

Meng harei ini 23/1 tal harei 27/1, Trung Quoc meda hu sa mbang langik la-ar saong hajan tuyet khang abih, pambak praong ralo labik abih kuhria meng akaok bilan La-ar, hu nhiet ndo la-ar trun tal 20 ndo C. Ini lac mbang langik la-ar saong hanjan tuyet  ngak jhak saong khang  abih kuhria meng akok bilan La-ar. Kayua langik la-ar saong pandiak glong jang gauk ralo, jabat kuhria dut iek langik Trung Quốc  kakei bhap bini brei khik rup pabhap, tui iek khaw tin ka langik saong dom panuac kakei, ramik bruk nao mai piah hu lagaih, kayua urak ini tuk tabung glong  bruk jarah rivang ma-in Tet Nguyen ndan di negar ini. 

Tong thong My Donal Trump hu pathau khan sa danak dak co so ha tang ngak bruk meng tri tue nhan tao (AI) biak praong meng di labik tu nhan, hu yaom tagok tal 500 ty do la. Pusak du lieu akaok mati di danak dak urakni daok padak padang di bang Texas. Danak dak hu 12 pusak, mada brei nang luong ka AI piah kuhria iek harak prein yava ndien tu saong daong gru jru iek ruak ka urang ruak. Ong Donald Trump daok kham marat pachreih dom phun jien buh tame kinh doanh tu nhan pak My tukvak mbang di dua pan akaok nagar piah ngak tabiak 100.000 bruk ngak barau.

Hukum Sumu yau gauk di Lakhah hu Patao Thái Lan mboh harak, khan brei thau  saong brei ba tame pandar meng harei ini ba Thái Lan jeng taneh ia dalam bhum taneh ka 3 di Chau A, hadei Nepal saong Dai Loan (Trung Quoc) brei adat lakhah likei haong likei atau kumei haong kumei. Hukum birau nan brei ka dua urang umo meng 18 thun tagok mbaoh harak lakhah saong taduan hu dom bruk yau urang lakhah karei. Meyah urang tut angan  lakhah umo ala 20 thun, urang brei tadaun hu bruk njauk hatai di amaik ame atau urang raong ba./.