Xa Vĩnh Hải, huyen Ninh Hải, tenh Ninh Thuan hu 2 pelei bhap bani urang bangsa urang Raglai daok di Cầu Gãy saong palei Đá Hang. Dua palei ini hu 90 baoh sang kathaot, ralo labaih 71% baoh sang kathaot dalam xa. Di dua palei bhap bani urang Raglai, taneh riya pala drak oh hu rilo, di bhum ceik, bhian tua riya thu ragu, kurang ia dalam bilan bhang bilan pandiak.

Akaok palei Đá Hang, ong Cao Văn Giác brei thau, labaih sa meteh palei jeng hu sang, dalam nan hu 35 baoh sang hu padang ngak khang kajap.

Akaok palei palei Đá Hang Cao Văn Giác lambaok ka mikva dalam palei brei thau: Hatai caong khin di bhap bani rahra urang bangsa Raglai caong khin hu karja brei patui buh jien tame ngak, daong ba cak rok patagok bruk ngak mbang kinh te - xa hoi, ngak jalan mbak nao mai saong dom bruk ngak duh brei ka bhap bani yau pabak brei aia hacih piah pandar, padang ngak jaman, sang menei; ngak binek pacang khik ia piah ba aia ka dom mblang hamu daok klak balau.

Daok ong Nguyễn Thành Mỹ, Pan akaok pakat Ndang uy, akaok UB Bhap bini xa Vĩnh Hải ye khang panuac lac: Xa Vĩnh Hải hu padang ngak danak dak phun jien piah peih ngak dom sarak bangsa nan lac 8,5 ty dong; jien buh tame ngak 1 ty dong meng phun jien di danak dak jalan ngak pakat negar cak rok patagok kinh te - xa hoi bhum urang bangsa takik. Usaha phun yaom ini hu daong palaghaih ngak brei cak rok patagok kinh te - xa hoi ka puk palei.

Dom pasalih bahrau di bhum urang bangsa Raglai xa Vĩnh Hải nan lac brei mboh ka bruk mbeik drei yam tagok di bhum urang bangsa takik tinh Ninh Thuan.

Dalam dom thun tapa, bruk peih ngak danak dak jalan ngak pakat negar dalam nan hu Danak dak jalan ngak pakat negar brei ka cak rok patagok kinh te - xa hoi bhum urang bangsa takik saong bhum ceik tukvak masa 2021-2030, tukvak ka I: meng thun 2021 tal thun 2025 saong dom danak dak karei hu ngak brei patrun takik di abih dom khat lahik kayua bala meng langik tasik; gah pala drak hu pasiam veik,  panduan salih khang kajap taneh ngak padai oh jeng salih tapa phun mbang baoh, phun pala katut panak harei brei baoh jeng siam mekre.

Ndom mayai brei ka sarak pacang khik langi tasik alam moi truong, UB Bhap bini tinh Ninh Thuan hu tacei pato dom puk palei peih ngak dom labik pataom caik, ramik hareik harom; pambuak pagam bruk puh ramik alam moi truong tame dalam adat hukum palei, khu pho; langiu di nan tacei pato bhap bani peih ngak brei ka bruk mbang huak, daok dang ka nyu hacih sa-at, panduan ba, ramik veik van ro ka nyu laghaih, oh brei raong pabui palao; padang ngak sang menei, jaman pahacih di bhum urang bangsa takik saong bhum ceik. Tal ini, dom xa hu peih ngak bruk pataom mek hareik saong rah hrom klak jaik 84% (dalam nan hu xã bhum urang bangsa takik saong bhum ceik), ty le di labik công cộng, dom canah jalan pambuak dom xa, palei saong dom canah jalan nao hamu hu pala phun hijao hu labaih 80%; dom nghia trang hu quy hoach, pasiam veik saong bruk ngak ndam metai hu peih ngak laghaih haong hatai jia, adat cambat tanarakun, ilamo meng kan di bangsa.

Ndom ka ilamo, tinh Ninh Thuan hu peih ngak Harei pok jao Harak brei angan Inem krung ilamo oh mboh di meta gah adat cambat akaok thun di urang bangsa Cam palei Bal Riya Bỉnh Nghĩa, xa Bắc Sơn, huyen Thuận Bắc; pambuak bruk haong UB Bhap bini huyen Ninh Phước peih ngak dom tal tacei pato alat ragam ragu meng kan di bhap bani bangsa Cam pambuak pagam haong bruk jirah rivang ma-in cak rok patagok palei ngak meng kan di palei Hamu Craok Bàu Trúc, ban sit  Phước Dân.

Tỉnh Ninh Thuan hu jaik 94% bhap bani di palei pala hu ba brei aia hacih piah pandar, dalam nan hu jaik 71% nan lac aia hacih mek hu chuẩn di Mentri Y te; ty le baoh sang hu jaman hu jaik 78%.

Ninh Thuan ieu lac sa tinh hu bhap bani bangsa takik, ngan haong 32 bangsa takik, ralo labaih 23% bhap bani dalam tỉnh; dalam nan hu bangsa Raglai labaih 10% saong bangsa Cam hu labaih 11% urang bhap bani di tinh. Baoh sang kathaot urang bangsa takik meblah labaih 22% dut haong baoh sang urang bangsa takik; baoh sang jaik kathaot urang bangsa takik labaih 12% dut haong baoh sang urang bangsa takik.

Ong Bá Bình Yên, urang Phaok akaok Mbang Bangsa tinh Ninh Thuan dahlau brei thau, dom baoh jak jeng siam mekre mek hu khang kajap piah ka bhap bani bhum urang bangsa takik saong bhum ceik tuk halei jeng bui sambai, chreih chai ngak mbang pala drak, oh padeih kham merat yam tagok, tuk halei jeng jia tame jalan ba di Ndang, Karja saong bruk pasalih bahrau di taneh ia./.