Palei Tà Gụ, xa Sơn Hiệp di bhum ceik, pablak tame dom labik daok di bhap bini lac bein durian hajao siam. Angaok jalan tame meng pasak xa Sơn Hiệp tal Tà Gụ, jaik abih dom baoh sang pakat 4 hu padang ngak  khang kajap, tui jalan “ 3 kajap”, nan lac takai sang khang, pra ine sang khang, tabung khang. Puac bilan 12 thun 2024, rilo baoh sang  birau padang ngak blaoh salah, urang puh ramik tame piah raok thun birau. Di palei Tà Gụ,  urang hu angan je saong dom kapol  bhian mai labik daok di bhap bini piah jak ba pataom tame bruk ngak mbang patagok saong kham merat ngak brei oh daok baoh sang taik tahak.

Ong Cao Lê Dân (umo 81 thun), bangsa Raglai, urang angan je di palei Tà Gụ, xa Sơn Hiệp, huyen bhum ceik Khánh Sơn nao dahlau dalam bruk ngak abih baoh sang taik tahak meng bruk jak ba bhap bini dalam palei saong gauk gar  rik jien tame padang ngak sang kajap di 10 thun dahlau. Meng bruk ngak tui puk palei saong gauk gar daong rik jien tame piah padang sang kajap tui jalan payeng salih gauk kayua ong Cao Lê Dân peih ngak  hu pambak tal rilo but pajaih dalam palei Tà Gụ. Ong Cao Lê Dân khan lac:

“Palei Tà Gụ nan rilo baoh sang tapa truh kathaot. Camereip di abih lac dahlak padang ngak sang jak ba mikva rik jien tame haong gauk. But pajaih karei rik jien tame haong mikva drei, dalam but pajaih  haong gauk rik daong gauk veik. Dom but pajaih karei mblak ngak tui. Dahlak ngak blaoh meng pambak praong, xa, huyen patagok.”

Dua thun dahlau, sang ong Cao Xuân Đoạn, daok palei Tà Gụ, xa Sơn Hiệp, huyen Khánh Sơn daok dalam sarak sang kan kandah yau nan ye dom urang puk paga saong but pajaih daong gauk gar rik jien piah ong ngak sang. Baoh sang praong 100m2 hu ginup pandap pandar, daong baoh sang  ong Đoạn tani tanat raidiuk. Ong Cao Xuân Đoạn khan lac, bruk yaok urang jak gauk rik jien tame daong ngak brei abih sang taik tahak hu jeng  bruk bhian ngak di dom but pajaih  saong di dom puk paga dalam palei Tà Gụ:

“Dahlau diah biak rambah, ralo daok di puh pakah, hajan hangin. Urak ini hu padang hu sa baoh sang hu siam, nao ngak pak hlei jeng mai veik sang pandaok hajan hangin. Hu sang kajap, raidiuk  siam jang dut haong  dahlau diah. Bruk rik daong padang sang daok, akaok meti  lac yaok urang dalam kapol nyaom daong gauk ngak, thei hu jien dahlau ye brei ngak dahlau, thei hu hu hadei ye ngak hadei”.

UB bhap bini huyen Khánh Sơn hu ba tabiak Jalan Jak ba pakacah “ Daong ngak brei abih baoh sang taik tahak di huyen Khánh Sơn dalam thun 2025”. Urak ini, dom jabat, don vi, dom mban, dom gah; Mat tran negar saong dom gah chinh tri - xa hoi huyen Khánh Sơn saong dom xa, ban sit, dom gah…pakacah padang ngak dom danak dak  ngak brei abih sang taik tahak, pasiam veik, padang ngak sang birau ka urang kathaot, jaik kathaot hu salamat, sang kajap, meda pacang hu pandiak hangin hajan, tuk langik alam salih karei, lagaih haong ilamo, adat cambat tanarakun di bangsa saong hatai caong di urang, rik tame paglong raidiuk saong patrun kathaot khang kajap. Ong Đinh Văn Dũng, Akok UB Bhap bini huyen Khánh Sơn, tỉnh Khánh Hòa mboh lac, tal thun 2025, huyen ngak brei salah oh daok sang halei taik tahak:

“ Tui tacei pato di tỉnh, bruk ngak di dom huyen, ban sit, ban dahau di quy I thun 2025 brei ngak abih baoh sang taik tahak. Di huyen Khánh Sơn daok 348 baoh sang taik tahak, jien ngak pasiam veik sang danaok kuhria tui yaom gah langiu. Meyah padang ngak birau yaom 60 trieu dong ye ginup, dalam 60 trieu dong sa baoh sang khol dahlak ngak kali kasalih, patak pataom jeng hu.”

Tukvak tapa, urang ngak praong di tinh Khanh Hoa jak ba da-a daong tame di dom jabat, kapol nyaom, đơn vị, doanh nghiep, dom urang ngak pahala dalam saong langiu tinh, dom bhap bini gam haong tinh hu pabak tame ngak. Urang ngak praong di tinh Khanh Hoa jeng iew karja dom palei samar ngak bruk pasiam veik sang danaok ka bhap bini dahlau tuk Tet Nguyen ndan Ula Naih 2025. Ngan haong baoh sang padang ngak birau brei ngak salah  blaoh dalam quý I ini./.