Tui ong Nguyễn Hồng Hiếu, Phó akaok Cục Khik iek kaya ia, Mentri Tai nguyen saong Moi truong, bruk pandar ia dak harei dak tagok tuk menuac sia di bhum taneran kraong Cuu Long tui kuhria mboh tagok tal labaih 30 trieu urang di thun 2025; đô thị hóa  saong kong nghiep dak harei dak tagok jeng ngak brei tagok tui bruk pandar ia hacih. Nan ye, brei pandar dom jalan ba ia, ribaong kraong binek ia saong pandang ia, ba tabiak jalan kuhria halau ia kraong Cuu Long piah pabak ia ka bruk pala drak, abih di nyu lac ia pandar ka bhap bini. Ong Nguyễn Hồng Hiếu ndom lac: “Roh duah peih ngak dom jalan caga khik piah ia taba lagaih hoang bhum taneran piah patagok bruk khik piah ia ndik, khik ia taba saong peih kareik ia brei lagaih. Buh jien tame roh duah dom danak dak, dom labik pabak ia lagaih haong halau ia, ngak birau veik hạ tầng, danak dak ba ia pandar yau ye binek ia, danak dak pabak ia piah trun bruk njom ia mbak tame bhum taneran.

PGS - TS Lê Anh Tuấn, Gru pato khoa Môi trường saong Tài nguyên thien nhien, Sang bac Đại học Cần Thơ ndom lac, bhum taneran kraong Cuu Long daok palai pajua halau ia. Kayua yau nan ye, jalan ngak di urak ini lac pasiam veik bruk ia njom tame saong khik ia di dom labik dhaong; takik brei mek ia njar dalam haluk; padang sang mac hlang ia mbak jeng ia taba saong padang ngak dom danao padang ia sua.

Tui TS Nguyễn Ngọc Huy, Urang roh duah gah BĐKH, hajan takik abih di bhum ĐBSCL yaok thun lac labaih 1.600 mmm saong dom labik glong abih tagok tal 2.400 mm. Dom Ia hajan  nan hu makna biak praong piah pandar ka bhum taneran kraong Cuu Long min oh ka hu ba tame quy hoach piah pandar. Nan ye brei hu jalan ngak cambaic laic piah pacang palai pajua halau ia di bhum taneran kraong Cuu Long. Tacei tabiak bruk njaom ia mbak di Long An  tuk ieu danao Dầu Tiếng pabak ia piah daong bhum gah ala, TS Nguyễn Ngọc Huy ndom lac: “Pagap yau bruk di Long An meng blaoh kurang ia saong Long An ieu danao Dầu Tiếng peih ia saong danao hu pabak 7 trieu met khoi ia bo ba tui kraong ia vàm cỏ, dalam 7 trieu met khoi ia nan khol drei  lahik tal 90% ia. Yau nan jalan ba ia sir atau peih ia trun dom jalan kraong ribaong biak praong saong palai lahik ia, nan lac bruk njauk kuhri kuhria ka bruk palai pajua. Khol drei buh jien tame ngak tuk ini meda abih rilo jien, min buh jien tame ngak piah pandar 100 thun ye phun jien nan lac lagaih piah drei buh ngak.”

Tui PGS - TS Nguyễn Phú Quỳnh, Pho akaok Viện Khoa học thủy lợi gah Meraong negar, Bhum taneran kraong Cuu Long daok hu dak padang veik haong rilo kan kandah jang biak rilo. Bruk patagok brei tui jalan lagaih hu pasang iek, caga ngak tabiak ia siam lagaih, ngak trun dom khat lahik, kandah kandaiy dalam dom bruk ngak mbang kinh te, xa hoi:“Dom danak dak thuy loi di Bhum taneran kraong Cuu Long tal harei ini  biak ralo, tani tanat. Dom danak dak khik piah ia khol drei brei khik piah dalam dom ribaong kraong meda hu meng 2 tỳ meteh tal 3 tỷ met khoi ia, khik piah dalam ribaong dalam bein, padang ia dalam hamu, padang ia dalam phein wuang ia. Dom danak dak ribaong kraong dalam hamu khol drei daok caga peih ngak danak dak patagok khang kajap 1 trieu ha padai saong ngak dom hamu padang ia piah pabak ia pruh.”

Biak di nyu lac bhum taneran kraong Cuu Long daok dang anak rilo kan kandah ka hlau ia di urak ini saong harei hadei tuk pandiak bhang, nyom ia mbak aval saong tame dalam dak harei dak khang. Kayua yau nan ye, bruk ba tabiak dom jalan ngak ka khik piah ia taba rilo, lagaih haong Bhum taneran kraong Cuu Long piah tagok prein khik piah ia sua, khik piah ia taba, peih kareik ia hu maong lac jalan ngak ba mai kein laba gah jien padai, bruk ngak mbang, xa hoi saong alam moi truong dalam tuk pandiak bhang, njom ia mbak ngak kan kandah tal bhum taneran kraong Cuu Long./.