Dom tinh, ban di bhum Taneran kraong Cuu Long daok khik hu dom janih ilamo di puk palei, gam haong he sinh thai rilo janih dalam nan hu pabah kraong, glai njom ia mbak, pulao kaoh, labik pataom khik sinh quyen, bein negar, labik pacang khik glai ram hu asal parilo janih sinh hoc glaong. Rivang ma-in glai ram di bhum Taneran kraong Cuu Long pambuak pagam haong ribaong kraong; jirah rivang ma-in padeih padei pambuak haong duah thau ka dak rai sajarah ilamo, palei ngak meng kan; rivang ma-in tasik pulao; rivang ma-in MICE. 

Tukvak masa tapa, thau hu dom yaom glaong prong dalam pambuak dom labik rivang ma-in veik haong gauk, 13 tinh, ban dalam bhum taneran kraong Cửu Long kham merat pambuak bruk haong gauk piah patagok pren meriak gauk dalam bruk jirah rivang ma-in. Njauk caik hatai, dalam nan hu hadei di tuk peih ngak bruk sanya pambuak gauk haong Ban raya Ho Chi Minh, ye rilo janih pandap rivang ma-in pambuak gauk hu tabiak rai.

Yau nan min, tui dom urang ilamu, rilo pandap rivang ma-in dalam labik biak dreh gauk yau rivang ma-in glai ram, ribaong kraong, thac aia mek ikan.., oh ka patagok hu abih pren khang angan je di yaok puk palei. Tuk vak jaik di ini, rilo doanh nghiep khang hatai padang ngak dom janih pandap bahrau min oh daok hu suai lavik. Sa-ai Nguyễn Thị Huế Hân, kongti jirah rivang ma-in Mekong Xanh, huyen Cái Bè tinh Tien Giang brei thau yau ini:

 “Piah ngak tabiak sa janih pandap panda bahrau hu pambuak haong tuai damuai taduan mek nyu nan jeng kan. Khaol dahlak jeng hu peih ngak dom janih pandap bahrau nyu karei dut haong darak pasar, min yaom jien nyu meda glaong jang nan ye biak kan piah tuai damuai taduan mek. Ini lac kan kandah bo dom doanh nghiep peih ngak bruk rivang ma-in di puk palei daok gaok.”

Gam haong bruk pambuak labik, yaok puk palei jeng hu dak padang dom bruk pambuak gauk karei. Cambaih laih, Ban Can Tho hu mboh tangin pambuak bruk haong Ban ine Ha Noi, tinh Ninh Binh meng rilo thun dahlau. Dalam tuk nan, di Ban Ha Noi, tinh Ninh Bình saong dom tinh Tay Nguyen jeng hu pambuak bruk haong gauk brei cak rok patagok bruk jirah rivang ma-in. Kayua yau nan ye, bruk peih prong  pambuak labik jeng hu daong ka talei pambuak bruk haong ngak mbang haong gauk, jhul patagok bruk rivang ma-in di dom puk palei. 

Anak meta hu mboh, pambuak bruk rivang ma-in di dom puk palei hu pambuak bruk haong gauk, peih ngak dalam rilo thun tapa, min bruk siam lagaih lac cuang kandah caong hu ba tabiak ginum biai piah taoh talaih. Rilo bruk pambuak gauk biak di nyu oh patagok hu siam lagaih, tok daok ndih angaok dom blah ba-ar mbaoh tangin tame. Rilo puk palei maong mboh lac, bruk pambuak labik haong gauk mek hu jak jeng siam mekre bhian padeih veik di bruk meyaih khan, dalam tuk dom bruk ngak prong yau dak padang pandap panda, sarak daong ba… jeng oh ka hu caik hatai tal.

Ong Hà Văn Siêu, Phaok akaok, Kuk jirah rivang ma-in pakat negar Viet Nam taong yaom glaong bruk pambuak labik haong gauk di dom puk palei piah jhul patagok bruk rivang ma-in. Rilo puk palei hu thau ngak bahrau dom janih pandap rivang ma-in di drei:

 “Khaol dahlak jak ba nan lac njauk salih bahrau ka nyu khang jang bruk meyaih khan rivang ma-in tal dom labik tal, khaol drei njauk dak padang asal kadha meyaih khan ka nyu biak dui pachreih. Meyaih khan njauk hu asal kadha. Urak ini jeng hu bruk ngak meyaih khan, hu asal kadha khaol drei meng meyaih khan pandap panda. Hu asal kadha blaoh khaol drei meng palih ruah jalan piah meyaih khan. Khaol drei meyaih khan angaok Internet saong dom nen tang so.”   

Anak mata mboh lac, pandap panda rivang ma-in di Bhum taneran kraong Cuu Long biak pachreih tuai damuai dalam tukvak jaik di ini, abih di nyu lac dom tour duah thau di bhum kraong ribaong, bein phun mbang baoh saong rivang ma-in glai ram. Yau nan min, bruk rivang ma-in di bhum taneran kraong Cuu Long jeng hu daok mong lac labik dhaong di negar caong khin njauk peih ngak siam gilac ka chat luong. Taphia di bruk dak padang dom janih pandap rivang ma-in biak karei di bhum Taneran kraong Cuu Long, dom puk palei jeng njauk caong khin dak padang labik saong talei pandap panda pambuak bruk./.