Dom harei ini, menuac sia dua phường Long Phước saong Long Bình di ban Thủ Đức hu kadha bui sambai bahrau, kayua oh daok bruk “jaik sang min atah jalan”. Daok atah di gauk tok lac sa labik di baoh kraong Tắc, min caong tapa ravang gauk, urang brei nao vòng atah tal jaik pluh mbaik jalan. Meng bruk ba mbaik tatua Long Đại tame pandar meng blaoh, mikva dua gah nao mai hu mbuan lagaih. Amuk Nguyễn Thị Thu Vân, umo 67 thun brei thau: mbaik tatua lac bruk caong khin dom pluh thun tapa di dom rai menuac daok pak ini. Meng labik caong hu phà, hu phà blaoh ye caong hu tatua. Hatai caong nan urak ini hu jeng biak: “Biak uan tabuan. Bruk padang ngak tatua Long Đại cang miat tal harei ini meng hu tatua ye rahra biak uan tabuan. Rai menuac dahlau tapa blaoh saong rai ranaih urak ini yam tagok saong drei jeng biak uan tabuan kayua bruk nao mai di dom phường saong tame ban lac biak jaik”.

Ong Hoàng Tùng, Chủ tịch UBND TP.Thủ Đức brei thau, tatua Long Đại oh lac sa baoh tatua mekre njauk caik hatai bo daok lac brei mboh “bruk jam pataom saong patagok”. Mbaik tatua oh lac pambuak pagam 2 gah takai kraong Tắc bo daok lac talei pambuak khang kajap, pagam dom hatung hatian, dom kham merat saong prein yava biak praong: “Tatua Long Đại lac dalikan di bruk pambuak gauk, hatai jia saong kham merat. Nan lac prein yava di rilo rai, lac jak jeng di bruk jum pataom saong hatai caong padang ngak ban Thủ Đức dak harei dak siam, lac labik njauk daok”.

Langiu di tatua Long Đại ye rilo mbaik tatua karei di ban Thủ Đức jeng hu peih bruk padang ngak gilac veik hadei di sa tukvak atah brei padeih kayua tavak bruk peih mbaok taneh, yau ye: Tăng Long, Nam Lý; dom tatua karei yau tatua Giồng Ông Tố, tatua Bà Dạt jeng hu jhul samar tukvak ngak piah samar ba tame pandar. Maong praong tabiak, thun 2023, TP.HCM hu ba tame pandar biak rilo tatua karei, daong ba mai dom salih bahrau siam mekre di puk palei. Nan lac tatua Long Kiểng - huyện Nhà Bè; tatua Vàm Sát 2 - huyện Cần Giờ…

Daok hadar, tatua Long Kiểng daok angaok jalan Lê Văn Lương lac sa mbaik tatua pasei sit.… Mbaik tatua ini hu mbang jaleih, dui tui radaih pajeng pandap saong radaih patuh laik trun kraong di akaok thun 2018. Ini lac mbaik tatua ka bruk nao mai angaok jalan Lê Văn Lương, bhian hu pasang iek, mbaoh tangin brei ngak meng di thun 2001, min cang tal bilan 8/2018, tatua meng hu peih bruk padang ngak. Yau nan min, kayua tavak gah peih taneh ngak tatua, nan ye bruk ngak tatua dui atah miat tal bilan 9/2022 meng hu padang ngak gilac veik saong hu ngak salah dalam 365 harei hadei di nan, samar jang 3 bilan duk haong bruk ba tabiak.

Ong Lương Minh Phúc, Yam ndok mBan Khik ramik danak dak padang ngak dom jalan mbak TP.HCM brei thau, tatua Long Kiểng hu ba tame pandar lac pandap di gah jalan mbak alin brei ka rahra Nhà Bè saong jeng lac brei mboh ka panuac sanya, ka bruk kham merat di gah jalan mbak, nan lac: khik kajap tukvak piah ngak hu samar jang bruk ba tabiak piah pabak ka bhap bini.

Tui panuac khan di ong Phúc, rilo danak dak, abih di nyu lac bruk ngak tatua dui atah rilo thun tapa min hu peih ngak gilac veik saong ba tame pandar, lac meng hu bruk ba tangin tame di abih hệ thống chính trị; abih di nyu lac bruk pachreih tui, daong prein di bol bhap rahra: “Njauk ndom tal dahlau di abih nan lac bruk njauk hatai, pachreih tui, klah rabha di mikva dalam bruk jao brei mbaok taneh piah padang ngak saong ngak hu salah. Kol drei meda maong ini lac kadha bui sambai di gah jalan mbak. Saong kol dahlak biak caong lac daok taduan hu mbaok taneh piah padang ngak dom danak dak bo kol drei daok cang mbaok taneh meng lavik mai”

TP.HCM lac labik hu dom kraong, ribaong nduac tapa rilo labik. Nan ye bruk hu rilo mbaik tatua pambuak pagam dua gah takai kraong lac biak lagaih ka bhap bini dalam bruk nao mai, pablei salih saong jeng daong ka dom labik nan hu jalan piah cakrok, patagok./.