Tui Mintri Y tế, ngan haong dom jit ruak ka oh hu vắc xin pacang caga yau ruak tangin takai cambuai, ruak pandiak tabiak darah, dom urang ilamo kakei lac bhian rao tangin meng xabon, pruh jru pametai anek ruak di bilik bac taa, abih di nyu nan lac pandap ma-in saong mbaok pandap yau ye sàn, mban, khan lang ndih, bhian ngak saat, rao hacih dom pandap caik ia,…

Daok ngan haong jit ruak hu blaoh vắc xin, bruk jit ruak daok brei mboh njauk paglaong hatai sangka, meng akaok thun tal urak ini, dalam taneh ia hu 130 urang ruak ndaih baoh, tagok 1,4 mbang dut saong tukvak ini thun 2023.  Ruak patuk hu 118 urang, tagok 6,8 mbang dut saong tukvak ini thun blaoh. Makna lac kayua rilo uranaih oh hu klauk jru vacxin njauk tukvak, ka oh klauk ginup mbang vắc xin ngak ka bruk pacang caga ruak dalam rahra ka oh glaong. Thun ini, lac thun daok dalam tukvak 4-5 thun tamuh di jit ruak. Dom chuyên gia mboh lac mayah oh hu jalan brei klauk vắc xin pacang gunup, jit ndaih baoh meda mbuan tamuh tabiak khang. Angaok dunya, gah Y tế dunya WHO jaik di ini jeng ba tabiak panuac brei thau dahlau ka bruk patagok dom urang ruak ndaih baoh saong mbuan tamuh jit ndaih baoh di rilo bhum taneh di dunya.

GS.TS Phan Trọng Lân, Akaok Viện Vệ sinh dịch tễ Trung ương brei thau lac, piah pacang caga dom jit ruak ini tamuh tabiak, pak di dalam bilan 4 ini, dom puk palei njauk peih bruk klauk vắc xin ndaih baoh ka ranaih meng umo 9 bilan saong vắc xin sởi - rubella ka uranaih meng 18 bilan; klauk jru pacang patuk ka urannaih saong urang kumei matain tuk vắc xin hu pabak ginup ka dom tỉnh, ban:

" Ngan haong Mintri Y tế, sởi hu ginup, ieu kakei pasang iek biak gnup dom uranaih ka oh hu klauk jru njauk nao klauk chip saong bruk ini jeng hu Mintri pato tacei. Ngan haong vắc xin patuk daok dalam janih vắc xin 5 dalam trong 1, dalam bilan 4 ini meda mai ginup dom vacxin piah klauk saong jeng hu pato tacei dom tinh, ban pasang iek dom urang saong meda hu jalan piah klauk chip tuk dom vắc xin mai ginup. Ngak habar piah duah mboh avak dom urang ruak camriep, langyah pacang cakak bhum labik biak catang, oh caik ka jit ruak njom mbak".

Ngan haong jit ruak njom mbak meng kum manuk ada. Meng akaok thun tal urak ini Việt Nam hu 1 urang metai kayua ruak kum A/H5N1 saong sa urang njom kum A/H9N2. Tui langyah di dom urang roh duah brei mboh lac, bruk pasang iek jit ruak di athur caong hu bruk pambuak gauk di rilo gah, rilo kapul, abih di nyu nan lac gah ngak nong.

Ong Hoàng Minh Đức, Akaok Cục Y tế dự phòng, Mintri Y tế brei thau, yaom lac ini mbang camriep negar drei hu urang ruak kum A/H9, min lac janih hu jru mek bier, urang ruak bhian mboh hanjul saong oh ngak brei metai rilo manuk ada. Prein njom pambak ruak tapa manuac jeng daok takik, dom urang mbuan gaok ruak trak lac dom urang hu prein pacang caga ruak takik saong ka oh mboh bruk ruak njom pambak meng manuac tapa manuac:

"Bruk tamuh jit lac bier, bruk salih biến đổi gen, atau salih jru mek ka oh hu panuac kakei di Gah Y tế dunya saong ka oh mboh rahtabiak nan ye bruk mbuan pambak ruak lac biak bier. Kol drei jeng oh suh sah hatai min jeng oh iek lap bruk pacang caga ruak kum manuk ada. Ini jeng lac mbang camriep VN hu urang ruak kum H9. Dalam ruak kum manuk ada, hu H5N1 lac ba jru mek biak glaong, ba tal metai lahik tal 50%, daok rilo janih karei yau ye H9, H7 ba tal jru mek bier saong tuk ruak jeng oh mboh hagait trak".

Piah pasang iek jit ruak bilan pandiak, Mintri Y te hu ieu kakei dom labik  y tế peih ngak siam bruk taduan mek, taong ruak, cấp cứu urang ruak, pasang iek bruk njom mbak ruak saong pacang caga ruak njom mbak tapa gauk dalam dom labik iek ruak, taong ruak; pambuak bruk khang kajap haong dom Viện Vệ sinh Dịch tễ, viện Pasteur langyah bruk jit ruak, taong yaom bruk mbuan njom pambak piah peih ngak dom jalan pacang caga jit ruak samar drah, daong pasang iek jit ruak meng aval./.