Dom thun tapa, Việt Nam hu pataom prein tame roh duah cak rok ngak tabiak dom pajaih padai, bruk pandar padai hu brei thau lac thrau hu paglaong pandar; langiu di nan lac bruk ngak padai dak harei dak cak rok, rilo jamraih bahrau hu buh jien tame piah paglaong yaom pandap panda, trun bruk khat lahik, palai pajua hadei di tuk yuak kuak. Kayua yau nan ye, yaom lac hamu taneh ngak padai mada trun min tapi padai saong asar padai brah Việt Nam dak harei dak brei mboh hu dom yaom glaong di drei di darak pasar. Brah Việt Nam hu urang di dunya pok brei angan lac sa dalam dom janih brah bingi abih di dunya, pabak hu dom asal kadha siam dalam pandap nda mbang huak.

Dalam bruk ngak padai brah, hu patabiak dom bruk ngak pambuak gauk gam haong dom yaom kaom, ngak pasiam veik bruk ngak mbang, pala drak sit sot, peih ngak pataom gauk dom gah pandap panda, dui pachreih hu dom urang ngak mbang buh jien tame saong pambuak gauk ngak mbang haong urang ngak hamu taneh haong darak pasar, roh duah ilamo saong salih jalan pandar kong nghe jeng hu peih ngak siam lagaih jang.

Tapi min, tui Naep Pho Akaok Mintri Ngak nong saong patagok palei pala, ong Hoàng Trung brei thau lac jeng dom rilo bruk caong hu jalan langyah ngak pasiam piah cak rok patagok tui njauk kein lagaih di dom yaom glaong di padai brah Việt Nam tui jalan ngak hu trach nhiem saong karo kajap. “Bruk dom cuang kandah dalam yaom kaom ka oh sahaneng mboh hu bruk ngak saong dom makna di bruk pambuak gauk ngak mbang, pala drak, ka oh salih jalan sahaneng tui darak pasar, khik caga alam langik tasik saong lagaih haong bruk khi hau alam salih; bruk ngak mbang, pala drak daok sit sot, rahra ka oh maong mboh hu kein lagaih di bruk ba rup tame kapul atau kalup kapul piah peih praong bruk tui jalan patabiak pandap panda; langiu di nan, ka oh hu sarak ginup prein dui pachreih ngak mbang hu mbaok tame bruk pambuak gauk saong daong ka urang ngak nong tapa kalup kapul, kapul hop tac xa”

Di tỉnh Hậu Giang dom thun jaik di ini, bruk ngak padai brah hu mboh cak rok patagok khang kajap saong mek hu dom jak jeng, padai brah saong asar di nyu hu tagok glaong kayua bruk peih ngak jalan salih jalan pajaih padai, salih meng dom janih padai asar bier tapa dom janih pajaih padai hu asar glaong; pandar dom jamraik saong dom bruk ngak, pala drak padai khang kajap; padang ngak bhum labik padai hu asar glaong tui mblang hamu praong pambuak haong bruk duah jalan pablei tabiak, yaok thun, mblang taneh pambuak gauk ngak mek hu labaih 25.000 ha, dalam nan hu 7 bhum taneh hu pabak leka mã số bhum pala mek hu tanut chuan pablei tabiak negar langiu. Ong Đồng Văn Thanh, Akaok UBND tỉnh Hậu Giang brei thau lac: “Tỉnh meda patui veik pabak dom kapul hop tac xa hu mbaok tame saong mbang tui dom kein lagaih meng danak dak salih bruk ngak nong karo kajap, danak dak dom Pasak salih bahrau tui jalan ngak bahrau hijao, danak dak cak rok patagok bruk ngak nong khang kajap, lagaih haong bruk bien doi khi hau di tỉnh Hậu Giang; gam tui di nan jeng patui veik pasang iek, buh jien tame ngak pasiam hạ tầng, peih praong mblang taneh, paglaong prein ngak ka dom HTX piah pabak ginup dom panuac ieu kakei dalam bruk pala drak padai hu chat luong glaong, tathuak nerak bier abih pambuak haong bruk cak rok patagok hijao”

PGS.TS. Nguyễn Phú Son, Sang bac Đại học Cần Thơ langyah brei thau dom bruk daok papik, tavak tavaiy praong di bruk cak rok patagok dom yaom glaong padai brah tui jalan ngak tui hatai jeng ye karo kajap. Dalam nan hu dom bruk cuang kandah lac, dom gah hu mbaok tame dom yaom glaong padai brah ka oh saneng hu njauk saong ginup ka bruk pambuak gauk lac sa jalan ngak saong peih ngak lagaih haong kein di yaok labik, yaok tukvak, kayua yau nan ye, jalan ba tabiak pambuak  gauk ngak di dom gah ini tok padeih di bruk mek hu kein lagaih dalam tukvak katut panak dut saong dalam tukvak masa atah dhua: "Piah meda Cak rok patagok dom yaom glaong padai brah hu trach nhiem saong khang kajap ye hu 4 jalan ngak, nan lac Buh jien tame cak rok patagok bhum pandap panda padai pataom gauk, gam tui di nan jeng ngan haong bruk padang ngak paok dữ liệu praong. Ka dua di nyu ieu lac cak rok patagok bruk pambuak gauk khang kajap di dom gah; ka klau veik lac cakak trun phun jien saong puac di abih lac padang ngak danak dak cak rok patagok pajaih padai saong cak rok patagok angan je di padai brah Việt Nam"

Rilo urang roh duah ilamo di Việt Nam saong dunya, urang ngak mbang ngak bruk dalam gah pandai brah dalam nagar jeng rik tame bruk kuri kuhria padang ngak, cak rok patagok dom yaom glaong padai brah Việt Nam tantu cambaih laih, trach nhiem saong khang kajao, tani tanat bruk sam makre pandap mbang saong patagok yaom glaong di padai brah Việt di darak pasar gah padai brah di dunya./.