Di mblang hamu palei 7, xa Lương Tâm, sang ong Huỳnh Văn Nhờ daok sami samar mek hadang raong di angaok mblang hamu labaih 2 ha raong hadang giraong hijao. Di hamu brei tathuak ia thu, bak anek hadang daok kadak dalam gluh hamu, yam tame ribaong mek hadang buh tame kadung bai ba tu. Hadang bahrau mek tagok meng hamu ba tagok taneh tabok jaik di nan piah ka urang pilih ruak pagap praong sit, teik pablei meng 105.000 – 125.000 đồng/kg, tui yaom praong sit di hadang. Ong Nhờ bui sambai lac:

 “Thun ini duah hu jien ralo kayua raong hadang thẻ, blaoh raong hadang sú, blaoh tal hadang giraong hijao. Anek hadang ini nyu mbang anek sit dahlau drei hu raba yau ini. Dut tui ngak padai raong hadang mboh kein raba ralo jang meng 50 đến 70%.” 

Abih xa Lương Tâm thun ini hu labaih 180ha raong hadang tui jalan pablah saong ngak hamu padai. Kayua hu tahu ngak siam hamu taneh njuh ia raong jeng ye pagap pakre ia mbak ia taba brei ka raong hadang hu ralo keih lagaih brei mek hu kein lagaih ralo. Ong Trần Bảo Bình- Akaok Kapul pambuak bruk hadang – padai palei 7 brei thau:

 “Thun ini mikva raong hadang mboh thei jeng hu jeng. Mikva raong pablak saong hadang thẻ tame mboh biak lagaih. Jeng khin brei peih praong jang kapul pambuak gauk ngak, yau ye dom thun dahlau ngak sa bilan padai, min thun ini raong hadang pablah saong hamu padai gam saong hadang giraong hijao. Drak padai blaoh drei palao anek hadang tame brei hadang kua padai bac magru meng di kapul pambuak, hop tac xa karei.”

Tui muk Bùi Thị Kim Chúc- Phaok akaok Jabat Kinh te xa Lương Tâm, dalam tukvak meng blaoh tui jalan ngak padai gam song hadang mboh jak jeng daong ka urang ngak nong paralo jien mek tame, pandar siam bilan ia mbak ia taba tui bilan di nyu, bilan padai Đông Xuân tuk hu ralo ia taba klak tapa Hè Thu tuk thu pandiak, ia mbak tame salih tapa raong hadang yaok janih. Bruk salih phun pala anek athur raong lagaih brei urang ngak nong duah jien tame sang ralo jang dahlau. Langiu di nan daok khik hu alam langik siam karo, pakurang hu jit ruak jeng ye daong ka he sinh thai hamu taneh siam karo. Tui danak dak xa mada patagok bruk raong glang ini brei ka labaih 50ha tra dalam thun meng anak.

 “Urang ngak nong ngak hamu sa mbang padai dan sa mbang raong hadang mboh siam karo, urang ngak nong pacang hu ruak brei ka padai jeng ye mek hu anek ruak ka anek hadang. Mboh kein lagaih labaih 27 trieu/ha, dut tui ngak padai”

Jalan ngak padai gam saong hadang, dalam nan raong hadang dalam hamu daok peih tabiak brei ka urang ngak nong xa Lương Tâm. Bruk lagaih tui langik tasik, pandar siam lagaih halau ia mbak ia taba tui bilan dalam thu mada daong ka mikva urang ngak nong gam khik siam langik tasik alam gam brei patagok jien tame sang iek lac sa jalan nao “lagaih” njauk pachreih peih praong, daong patagok raidiuk mikwa di palei palamai meng anak./.