Bilan kaphe di tinh Dak Lak hu peih akaok meng puac bilan 10, tapi min kaphe bhian tathak rilo dalam kreh bilan 11 tal puac bilan 12 pambak tui pajaih, tui labik taneh pala. Dom thun jaik di ini, gam haong bruk pandar ilamu ky thuat tame dalam bruk pala drak, rilo urang ngak nong hu pandar dom pajaih bahrau hu rilo kadha siam jang yau: tathak rilo jang, suai jang dut haong dom pajaih klak, binah halei plaih hu dom kan kandah di langik tasik. Kadha daok veik dalam nan iec lac tukvak paik baoh piah hu asal kaphe siam di abih. Ong Lê Xuân Thuỷ, daok di xa Ea Na, huyen Krông Ana, tinh Dak Lak brei thau:

“Njauk paik bhian oh hu hagait pruac prac yau dahlau diah, baoh tasak ye paik daok da hijao rilo ye khut phun abih. Phun halei tasak ye drei paik. Paik baoh tasak abih blaoh gilac veik paik abih bein nan lac gap.”.

Hadei di labaih pluh thun khik yaom jien meng tanut 30.000 – 40.000 dong/kg kaphe asal, dalam tuk nan yaom jien buh tabiak brei khak bak, jien pah urang ngak tagok glaong ngak ka oh takik urang nong duh hatai haong kaphe. Dua thun blaoh ini, yaom cà phê tagok meng 50.000-60.000 dong/kg dalam thun blaoh, thun ini tagok tal 100.000 đồng/kg, gaok tuk mai tagok jaik 150.000 dong/kg, ngak ka urang pala kaphe di Dak Lak yam tame bilan paik baoh dalam hatai bui sambai.  

Yau nan min, tui ong Trịnh Đức Minh, akoak Kapul nyaom kaphe Buon Ma Thuot, urak ini, yaom kaphe tagok glaong caong khin ngak ka nyu siam rilo kadha piah kaphe hu siam, tapa nan grap tanat darak pasar pablei tabiak negar langiu hu khang kajap saong suai lavik. Dalam nan, kadha njauk ngak di abih nan ieu lac paik baoh cà phê njauk hu labaih 85% baoh tasak saong pambu thu, khik piah ka nyu njauk ilamu. Kadha ini caong khin hu bruk tani tanat saong tukvak atah min salih gilac mek hu asal kaphe nyu siam jang, kaphe paik hu jeng glaong jang, prong di abih nan lac pabak hu hatai caong khin di urang blei pandar. Ong Trịnh Đức Minh brei thau: urang ngak nong di Dak Lak dak harei dak hu sangka tal kadha ini.

 “Urang ngak nong hu hatai saneng biak siam tal bruk khik kajap yaom asal baoh karaoh di nyu, oh lac tapa bruk pala drak blaoh daok lac paik baoh. Dalam bruk ngak kaphe huu co, kaphe khang kajap, kaphe siam haong langik tasai alam moi truong, urang ngak nong oh daok nduac tui phun kaphe brei rilo baoh bo urang sangka tal kadha khang kajap di bein phun. Lavik mai nang suat kaphe di Dak Lak jaik 3 tan/ha min saong kham merat khik yau nan oh nduac tui nang suat rilo”.

Piah patagok gah pandap panda cà phê tui jalan khang kajap karo, ong Nguyễn Văn Hà, Phaok Akaok So Ngak nong saong patagok palei pala tinh Dak Lak brei thau, tinh hu padang ngak rilo jalan ngak pambuak pagam tal gah pandap panda cà phê saong jeng hu dom jalan ngak brei paglaong chat luong pandap panda meng di bruk ngak tabiak, paik baoh, ngak tabiak ndap nda kaya kan saong pablei tabiak kaphe. Dalam nan, paik baoh cà phê tasak nan lac sa dalam dom kadha prong nyu pambak tal nang suat, chat luong di angan je kaphe Dak Lak.

 “Khaol dahlak daok pachreih urang ngak nong juai paik baoh daok hijao kajang, njauk grap tanat asal tasak do tasak. Ka dua nan lac bruk ngak hadei di paik baoh piah grap tanat ka pandap panda kaphe mek hu siam asal. Ka klau, daok pandar dom jabat pablei tabiak blei tame samar mek tangin pambuak bruk haong dom hop tac xa, jabat, kapul nyaom di urang nong hadei di paik baoh hu ngak siam rah tapa, ngak tabiak duh ka bruk pablei tabiak negar langiu piah grap tanat chat luong jeng yau mek hu baoh jeng siam mekre”.

Paik baoh kaphe tasak oh lac sa janih tok brei patagok asal kaphe blaoh daok ieu lac sajalan ngak khang kajap daong dak padang angan je kaphe Viet Nam angaok darak pasar dunya. Urang nong tinh Dak Lak meng hatung hatai di drei dak harei dak rik daong brei thau ka labik dang di gah pandap panda kaphe Viet Nam./.