Saai Vũ Thị Thúy daok di palei Ea Bring, xã Băng Adrênh, huyện Krông Ana, tỉnh Đắk Lắk ieu lac sang urang kan kathaot daok di dalam bhum palei, pasang di gait bhian ralo ruak kik, saai Thúy oh hu bruk ngak tani tanat, yau nan ye raidiuk di sang saai gaok biak rilo kan kandah. Thun 2021 baoh sang di saai Thúy hu Ủy ban MT negar Việt Nam huyện Krông Ana daong 50 triệu jien đồng piah padang ngak sang angan sang jumpataom gauk. Gam haong paok jien masaiy hu, gam bruk daong mikwa rahra di dalam palei, baoh sang pakat 4 hu yaom labaih 100 triệu jien đồng hu ngak salah blaoh. Hadei di tuk hu sang daok tani tanat, saai Thúy hu masaiy veik phun jien laba tukik meng gilang paraik kanja piah buh jien tame pablei salih dom pandap panda ngak mbang, phun pajaih, pajaih anek raong piah peih praong bruk raong glang.“Dua diuk pasang caong padang ngak sang daok min sang biak kan kandah, hu gah Mặt trận, dom kapul nyaom meda daong ka sang dahlak hu sa paok jien piah padang ngak sang kan kadang haci hacih, hadei nan dahlak jeng hu taduan bruk daong ba di gah kapul urang kumei daong paok jien piah peih bruk raong glang. Dahlak likau tabiak truh kan kathaot piah caik veik ka dom baoh sang karei kayua sang dahlak taduan bruk daong ba biak rilo paje, dahlak biak thau dhar phol”

Ong Lãnh Như Biểu daok di palei Ea Pri, xã Ea Wer, huyện Buôn Đôn jeng ieu lac urang di dalam dom baoh sang rilo thun gaok kan kathaot hu daong brei padang ngak baoh sang jumpataom. Hadei di tuk njauk bala kayua tala katal klak taong, prein yava di gait mboh trun, mai meng hu baoh sang khang kadang, siam makre, lac mboh biak hu makna sambai chreih chrai uan tabuan di gait:“Dahlau deih daok baoh sang sit, taik tahak kayua oh hu jien padai, gaok kan kandah oh ngak hu sang nan ye tuk hajan hangin, ia hajan tanjaok tame, urak ini hu gah Mặt trận daong padang ngak sang, ye dahlak dhar phol gah Mặt trận, biak thau dhar phol.”

Tui ong Mai Tri Phúc, Phaok Akaok Ủy Ban MT negar Việt Nam huyện Buôn Đôn, brei thau lac huyen hu 18 bangsa adei saai, dalam nan mikva urang bangsa takik ralo labaih 47% urang di dalam huyện. Mikwa ralo urang ngak nong ngak nong, gam haong langik glai tanah riya thu lagu, yau nan ye raidiuk di mikva gaok rilo kan kandah, sang kan kathaot daok ralo, ralo baoh sang ka oh hu sang danaok karo khang kadang piah daok. Maong mboh bruk nan, kadung jien kanja bhum palei oh ginup piah kuhria peih ngak danak dak patruh baoh sang taih tahak, sang kathaot, nan ye dom thun tapa Ủy Ban MT negar huyện Buôn Đôn hu paglaong bruk pathau khan, jak ba piah caga bruk daong di abih rahra piah ka dom urang kan kathaot dalam huyen hu sang danaok daok siam makre, khang kadang karo:“Mikva pak ini rilo meng lac thei jeng kan kathaot, nan ye bruk padang ngak pasiam veik dom baoh sang taik tahak lac biak kan, phun jien oh ginup piah pabak ngak. Thun halei kol dahlak jeng tal bilan 11 lac Bilan ngak bruk kayua urang kan kathaot jeng pamadeih tagok danak dak piah paglaong bruk pathau khan saong jak ba dalam gah hệ thống chính trị tame ngak bruk piah ngak habar pataom mek hu rilo abih.”

Mai mang bruk daong prein di dom rahra bhap bini saong dom urang ngak mbang doanh nghiep, meng di thun 2021 mbiah tal urak ini tỉnh Đắk Lắk jak ba hu labaih jaik 60 tỷ đồng saong labaih 7 tỷ đồng kayua Kadung jien “Ka urang kan kathaot – oh klak thei daok di likuk” di pakat nagar Trung ương saong dom tinh, ban karei karei daong brei. Ong Y Giang Gry Niê Knơng, Akaok Ủy Ban MT negar Việt Nam tỉnh Đắk Lắk khan brei thau lac:“Bruk pan akaok di pakat ủy dom pakat blaoh kapul nyaom di pak cơ sở đảng saong abih di nyu nan lac bruk sa tangin haong gauk di dalam rahra padang ngak sang jumpataom gauk ka mikva. Baoh sang bahrau biak hu yaom glaong ngan haong dom baoh sang kan kathaot, ba prein khang piah ka dom urang kan kathaot dalam bruk cak rok patagok bruk mbang ngui di harei hadei.” 

Meng thun 2021 tal urak ini, di tỉnh Đắk Lắk hu 1.138 baoh sang Jumpataom gauk hu padang ngak saong ngak pasiam; 173 baoh sang hu daong brei jien blei pandap panda, phun pala, anek pajaih. Kayua yau nan ye, tukvak masa 2021-2023 dom baoh sang kan kathaot di dalam tỉnh Đắk Lắk hu mboh trun labaih jaik 2% dalam yaok sa thun, dalam nan dom baoh sang kan kathaot dalam bhum mikva urang bangsa takik hu mboh trun tui kuhria jaik 4% yaok sa thun./.