Amuk Trương Thị Ngân, umo 74 thun, daok di puk Bình Minh, xã Bình Châu, huyện Xuyên Mộc, tỉnh Bà Rịa – Vũng Tàu brei thau lac, sang amuk ieu lac sa baoh sang kan kandah dalam palei, amuk daok haong diuk pasang anek likei saong dua urang taco daok hu umo daok nao bac. Kayua oh hu jien mek tame tani tanat, yaok harei anek likei di amuk Ngân njauk nao tasik ngak ka urang ngak mbang gilai ikan jaik mbaok tasik, anek matau ye naong tacut pablei di tapen jalan. Min tapi, dua thun tapa, kayua hu Bol lin caga pabah nagar bien phong daong yaok bilan 500 ribau dong piah blei tapuk siphau, khan aw ngui cuk, taco di amuk meng hu jien piah nao bac:

“Bol lin di Bilai caga nagar Biên phòng Bình Châu bhian haduh hatai ka sang dahlak, caik hatai sangka tal amuk taco dahlak. Maong mboh dom cei lin bien phong biak kak kajap haong rahra, anit ranam rahra nan ye biak sahanang hatai. Dahlak ye taha paje, rilo mbang dom urang lin oh mai hu jeng ieu phone sua tangi”.

Daok saai Bùi Văn Nhiều, urang daok di palei 3, xã Long Sơn, ban Vũng Tàu brei thau lac, jeng ieu lac baoh sang kan kathaot, gaok kan kandah di bhum palei, saai oh hu bruk ngak tani tanat, lac raong anek sit daok umo nao bac, sang saai kurang anak kurang likuk rilo thun gam. Meng tuk hu danak dak “daong takai adei nao tal sang bac” kayua Bilai caga nagar Biên phòng Long Sơn peih ngak, yaok bilan anek likei di saai hu mbang jien daong 500 ribau dong piah blei tapuk siphau, khan aw ngui cuk. Saai Nhiều brei thau:

“ 3-4 thun ini mai, urang jakar, bol lin Bien phong yaok thun jeng hu daong ka kamuan 4,5 triệu đồng jien bac, bac tal abih tal 12, harei lễ Tết ye bien phong jeng alin brah. Jeng kayua Bilai Biên phòng daong ba, tal urak ini raidiuk di saai jeng trun manieng kan kandah paje, biak uan tabuan kayua talei pambuak di urang lin saong rahra daok biak jaik gauk”.

Dalam dom thun tapa, Bilai caga nagar Biên phòng Bình Châu hu peih ngak rilo danak dak, bruk ngak lagaih piah klah rabha haong kanja palei dalam bruk sangka daong ka raidiuk, mbang ngui ka rahra di dalam bhum labik hu bol lin daok. Meng danak dak “Sa tangin haong gauk daong ka urang kan kathaot – oh caik thai daok veik gah likuk” di Rajaei, dalam kapul Biên phòng tỉnh Bà Rịa - Vũng Tàu hu rilo bruk ngak cambaih laih yau ye: “kadung brah dam dara”, “Daong ka adei nao bac”, “tangin dui di lin biên phòng caga nagar”… saong dom bruk ngak “Kapul eng drei khik ra”, “Kapul gilai jumpataom gauk, salamat hu mbaok tame khik iek quyen ngak po tasik, kaoh pulao”.

Tui Đại tá Nguyễn Văn Thống, Phaok Chính uỷ, Bol lin caga nagar Biên phòng tỉnh Bà Rịa – Vũng Tàu, bruk “daong ka adei nao bac” hu peih ngak meng hatai taduan bruk ngak saong hatai anit ranam. Jaik 10 thun tapa, bol lin Biên phòng tỉnh Bà Rịa - Vũng Tàu hu jak ba dom urang ngak pahla, atau kaoh mek tabiak meng harei jien bilai di urang jakar, bol lin piah daong 500 ribau dong sa bilan ka 48 adei lac anek saih sang kan kathaot meng tal 1 tal tal 12 di dom xa bhum tapen tasik, abih tih dom anek saih daok di dom xa hu rami ramik blei radaih mac saong radaih juak piah nao bac: 

“Caong hu khik tani tanat dom bruk ngak ini, dahlau di abih lac bruk khang hatai di urang jakar, urang lin Bien phong caga nagar tinh. Meng bruk ngak saong hatai anit ranam, kol dahlak meda peih ngak siam dom bruk ngak ini piah ka dam dara, anek saih hu kein lagaih piah pambuak haong dom hatai caong di xa hoi, sa tangin pambuak gam haong pakat uy, kanja bhum palei hu mbaok tame cak rok patagok kinh tế - xã hội, pabak pakhang quoc phong an ninh di bhum palei”.

 Tukvak masa anak tal, bol lin Bien phong caga nagar di tỉnh Bà Rịa – Vũng Tàu daok ba mai ka raidiuk mbang ngui di rahra di daok di bhum tapen tasik hu trei sir haniem phuneik caga dahlau, duah jalan ngak bahrau, meng dom bruk ngak tantu cambaih laih, ba tabiak jalan langyah, pambuak haong pakat uy, kanja piah hu dom danak dak, bruk ngak biak lagaih, rik tame cak rok patagok kinh te, ilamo, xa hoi, patruh eik patrun kan kathaot, ba mai ka rahra bhum tapen tasik hu trei sir, siam makre selamat haniem phul, ngak mbang hu siam makre, tani tanat jang./.