Di dalam tukwak masa daok ralo cuang kandah gah ngak tabiak khan ao, Kong ti TNHH Jhik khan ao Song Ngoc, quan Binh Tan, Ban Raya Ho Chi Minh daok dang anak cuang kandah oh ka taom meng halei mai brei ka bruk duah urang ngak. Ong Trần Thanh Sơn, Akaok jabat Harak gal ka gah manuac urang khan brei thau lac, ini lac mbang camereip akaok meti drei oh blaoh hu bruk duah ginup urang ngak ka danak dak ngak ba tabiak ndap nda. Urak ini urang ngak di kong ti hu jien mek tame jaik 12 trieu dong di sa bilan, dalam nan hu jien brei ka urang ngak ralo tuk vak. Min rilo urang ngak jeng daok padeih bruk saong rilo urang ngak daok dam oh takrei tame ngak bruk. Ong Sơn brei thau:

“Yau ye meng blaoh, kol dahlak hu ba tabiak rilo janih sarak gar brei pachreih glaong bruk brei jien yaom ka urang ngak 1 trieu dong meyah jak hu urang tame ngak hu 1 bilan, daok urang ngak hu ruah tame  hu 3 trieu sa bilan - yau dreih urang ngak dalau min tapi jeng oh pilih ruah hu. Meng akaok thun, kong ti duah hu 2 jamraik jhik, kuhria peih veik 2 jamraik jhik min tapi oh ngak hu. Kol dahlak ngak oh jeng, biak damen kayua thun ini urang blei kaya pandap biak rilo”.

Akaok Taong abaih kong ti Co phan Jhik Nha Be urak ini hu labaih 35.000 urang ngak saong piah brei peih 40 kong ti dalam harei meng anak. Min tapi, bruk patagok peih ngak praong duah urang ngak biak kan kandah ka dom sang mac di Jhik Nha Be. Ong Bùi Việt Nam, Yam ndok Truyen thong papar angan je, Taong kong ti Co phan Jhik Nha Be brei thau, dahlau daih, gah jhik khan ao saong kalik takhaok ieu lac sa bruk muan lagaih di Viet Nam. Min tapi urak ini, dom bruk ngak ini oh daok pachreih damdara. Piah langyah asal kadha brei ka bruk kurang urang ngak, Gah Jik di Nha Be daok pasang iek jien bilan brei urang ngak di Ban Raya Ho Chi Minh meda diuk hu ha oh rai ginup piah hu tabiak sarak atah dhua.

“Kol dahlak mboh janih duah urang ngak siam lagaih abih di nyu njauk tame jalan duah tapak. Yau janih urang ngak jak ba urang ngak. Yang ka 2 di nyau, facebook, nduac yaih khan piah damdara meda mboh khol dahlak hulin jeng ngak abih cih 360 do marketing. Kol dahlak jeng hu nao tal dom pasak daong bruk ngak, trun tal tinh, tal dom labik pataok radaih, min tapi oh mek hu kein lagaih”.

Hu sa dalam sabaoh Kongty urang ngak mbang jeng ngak tabiak ndap jik khan ao dapak di quan Binh Tan, Ban Raya Ho Chi Minh angan lac kong ti Pouyuen. Thun 2023 kong ti ini hu 3 mbang kaoh urang ngak tabiak yaok ribau cong nhan. Min urak ini, tuk ralo urang khin blei gilac, kong ti ini jeng daok dalam kan kandah kayua kurang urang ngak, ngak rilo bruk piah duah ginup urang ngak brei ka pandap di dom bilan jaiak abih thun. Amuk  Đặng Hồng Liên, Akaok Jabat Gah manuac urang brei thau, meng masa tukvak blaoh tapa, kong ti khin caong duah labaih 2.000 urang ngak, min urak ini jeng daok kurang labaih 1.000 meng ginup labik urang ngak:

“Kong ti Pouyuen tuk halei jeng kuria tani tanat saong ngak tui adat hukum brei ka urang ngak, gaok mai Kongti daok glaong jang tanut biar abih. Kadha ini daong kong ti mek hu hatai jia brei ka urang ngak. Tuk caong khin pilih ruah, kong ti bhian pandar urang ngak jak ba atau phat jao harak bi-ar di dom bhum palei hu radaih raok pajeng urang ngak”.

Tui Pasak Caga khan brei thau saong Khao tin darak pasar Ban Raya Ho Chi Minh, dalam 3 bilan abih thun ini di Ban khin caong hu meng 78.120 – 83.328 urang ngak. Tui taong yaom di rilo urang ilamu, mada lac bruk khin caong ralo urang ngak di Ban Raya min dom labih sang jammaraik lac oh mbuan si duah manuac urang ngak. Kayua lac urak ini urang ngak biasa hu rilo jalan duah bruk ngak jang tui lac tame sang mac yau dahlau daih. Bruk ngak hu ralo urang ngak dalam nan hu ralo dam dara pilih ralo di nyu ieu lac dom bruk ngak lagaih haong masa tukwak, lagaih tui sani sanang haong drei. Gam tui di nan mboh ralo tinh jeng hu peih ralo bhum ngak kong yau nan ye urang ngak nduac mai ban raya jeng trun ralo.