Jaik 50 baoh sang urang Cam tui ugama Islam daok di sang chung ke 86/1, jalan Phan Văn Hân, phuong Bei Gon, (Phuong 17 klak) tuk halei jeng mong amuk Sho Lymah nan lac ayut sahabat dalam baoh sang, nan lac labik pambak ka mikva.

Piah mek hu hatai jia haong bhap bani, dalam dom pluh thun tapa, amuk Sho Lymah tuk halei jeng nao gam haong mikva dalam dom bruk ngak di yaok harei, mong iek mikva puk paga yau adei sa-ai dalam sang. Dom baoh sang halei hu rai diuk kan kandah, hu urang labuh ruak, ye amuk jeng hu klah rabha, daong ba saong daok jak ba dom urang ngak pahla, ayut sahabat, gauk gar rik daong.

Baoh meta amuk hadah tagok kadha bui sambai tuk ndom mayai tal bruk salih bahrau dalam rai diuk di mikva dalam puk paga, amuk Sho Lymah brei thau, labaih 10 thun taduan mek bruk ngak di sa urang hu angan je dalam bhap bani, kadha prong abih bo amuk ngak hu ka mikva nan lac bruk daong ka adei sa-ai kamei mesre hu phun jien piah ngak mbang pablei salih, mai meng nan bo rilo baoh sang tapa truh kathaot. Amuk Sho Lymah klah rabha khan brei thau:

Di Khu pho 37, phuong Linh Xuân, (Phuong Linh Trung klak) amuk Phạm Thị Nhàn, bangsa Mường meng lavik mai hu jeng sa thaik binguk ka hatai bruk ngak pah hala saong hatai gul pataom taong abih bangsa. Jaik 20 thun tapa, amuk Nhàn yau sa urang “galam tu và” ba akaok nao dahlau, kuhri kuhria bruk prong sit di khu pho yaom lac amuk prong thun, taha umo, njauk khun hu padeih padei. Yaok harei hadei 17h biar harei amuk gilac nao kabak tapa yaok canah jalan hem, veih tame yaok baoh sang hasit, sua tangi bruk ngak mbang pablei salih di urang prong, bruk bac megru di anek kamuan uranaih.

Khu pho 37 hu 17 bangsa adei sa-ai, thau cambaih laih kan kandah di urang kamei bangsa takik tuk nao tabiak truh puk palei tagok ban raya piah dak padang mbang angui, amuk Nhàn ngan haong bruk ngak di urang hu angan je, akaok khu pho, hu nao kataoh pambang di grauk labik piah duah bruk ngak ka urang kamei bangsa takik kan kathaot. Mai meng bruk ngak di amuk, rilo adei sa-ai kumei duah hu bruk ngak tani tanat di dom xuong jik pet, labik ngak meng tangin, daong ka dom urang nan duah hu jien padai saong raong ba anek mbang bac ka nyu siam jang.

Oh padeih di bruk daong brei ndap nda, amuk Nhàn daok lac urang “khik apui” ilamo di dom bangsa daok kreh ban raya. Amuk tuk halei jeng kakei dom adei sa-ai ka halaw gha di bangsa drei, pachreih khik panuac ndom, adat cambat tanarakun saong kadha hadah mbaok hadah meta di bangsa drei. Di akaok labik khu pho amuk padang sa labik parang iek dom blah khan ao bangsa piah kakei adei sa-ai kanar hadar tal bangsa drei:

"Yaom lac daok pak halei jeng njauk khik ramik asal ilamo di bangsa drei, kayua yau nan lac ye asal di ong akaok ong akei caik veik. Mai meng bruk ngak hu mboh di anak meta, drei lac urang bangsa hu khan ao di bangsa, jalan diuk rai bangsa nan ye drei jeng kakei bangsa karei dreh yau nan. Langiu di nan, dalam dom harei rija roya di yaok bangsa, ye dahlak jeng nao jak ba mikva peih ngak, yau peih ngak tet chol nam thmay di bhap bani Khmer, tahanek ngak dom kaya mbang di bangsa, angui cuk khan ao bangsa, ma-in padhih… palaghaih ka mikva dom bangsa bac megru nao mai haong gauk. Mikva dom bangsa biak takre. Nan lac pren khang piah ka dahlak pambuak pagam haong mikva."

Di sang megik Jamia Al Sa’adah, phuong Binh Tien, (Quan 6 klak) melam halei jeng yau nan, njauk 19 tuk ye sap e a bac megru di dom adei sit gilac yava tagok. Ini lac tal bac sap Cam oh abih jien di Gru Mohamad Zen, Akaok Mban khik iek sang megik Jamia al Sa’adah. Yaom lac oh hu ilamu su pham min kayua hu hatai ranam bangsa, caong khin pacang khik sap ndom, akhar vak di bangsa bo sa-ai hu dang ngak gru pato jaik 10 thun tapa.

Harei ye sa-ai Mohamad Zen jan van haong bruk pablei salih di sang, tal biar harei, sa-ai gilac rami ramik bruk ngak, kareik pambang kadai, angui cuk khan ao meng kan blaoh nao tame sang megik pato sap Cam.

Sa-ai Mohamad Zen caong khin daong ka dom adei bac hu kinh, thau sambahyang, atah dalam jang nan lac khik ramik hu asal ilamo bangsa Cam. Urang Cam njauk thau akhar, thau ndom sap bangsa Cam.

Sa-ai Mohamad Zen khan brei thau, tal bac hu patui khik tal harei ini nan lac mai meng bruk sa hatung hatai, daong ba di karja puk palei. Dalam dom harei prong di taneh aia atau di harei roya di urang Cam, karja puk palei jeng hu mai rivang, alin hadaih ndap nda saong daong brei jien padai. Taphia di nan hu ngak jeng rilo mblang ma-in, pok brei jien bac ka dom anek kamuan lac bangsa Cam, meng nan daong ka dom adei hu pren khang piah bac megru, taduan mek hu rilo baoh jeng siam mekre dalam rai diuk.

Tui So Bangsa Agama TPHCM, hadei di ba pataom Binh Duong saong Ba Ria - Vung Tau, TPHCM urak ini hu labaih 13,6 trieu bhap bani, dalam nan hu jaik  510.000 urang daok dalam 53 bangsa takik. Ban raya tuk halei jeng iek prong, taong yaom glaong saong pok meyaom dom rik daong di bhap bani bangsa takik di taong abih gah dalam tukvak tapa. Ong Tăng Phước Lộc, Phaok akaok So Bangsa Agama  TPHCM brei thau lac:

“Bhap bani dom bangsa takik tuk halei jeng jia tui bruk pal akaok ba jalan di Đang saong Karja, jak gauk rik daong tame bruk cak rok patagok bruk ngak mbang kinh te – rah ra ka ban raya; abih hatai hu mbaok tame dom bruk ngak siam mekre brei ka rah ra, dom bruk ngak pakacah gauk ranam taneh aia, meng nan, dak harei dak hu rilo bruk ngak, urang naih gheih nan lac urang bangsa takik, ba mai baoh jeng siam mekre dalam bruk ngak mbang kinh te, bol bhap rah ra, hu pren pambak prong angaok dom gah dalam rai diuk hu kapul nyaom iek prong, pok meyaom, bac megru saong ngak brei pambak prong tabiak taong abih ban raya”

 Dom baoh rik daong gandi gandang saong bruk njauk hatai gauk biak glaong dalam bhap bani bangsa takik nan lac dom klah pagam hadah tanjak ngak jeng blah thaik binguk rilo sambo mau di TP. Hồ Chí Minh. Dom urang nan oh lac suan yava di bangsa bo daok lac dom urang naih gheih, jhul patagok bhap bani sa tangin haong gauk dak padang sa ban raya ilamu, bahrau bahrang saong bak hatai ranam./.