Tui Sở Kế hoạch saong Đầu tư tỉnh Đồng Nai, thun 2023, dui pachreih FDI hu jaik 1 tỷ 230 trieu USD, dalam nan pabak brei bahrau 81 danak dak haong yaom phun jien tut angan abih tih labaih 467 triệu USD saong 94 danak dak tagok phun jien labaih 761 triệu USD pabak tame. Dom danak dak FDI dui pachreih bahrau daok dalam dom gah cơ khí, pandap mbang menyum, năng lượng… haong pok jien buh tame ngak kuhria rah tapa lac 6 triệu 200 rabau USD/ha.

Yau nan min, sở ini taong yaom binah prong dom danak dak ngak tabiak bahrau daok sit meng bruk ngak tal phun jien.. Kinh tế di tỉnh Đồng Nai oh ka cak rok patagok khang kajap, oh ka samu haong pren khang, saong labik dang lac sa tỉnh cak rok patagok di bhum Đông Nam Bộ. Dom khu ngak kong cak rok patagok samar min rilo khu daok dui pachreih dom danak dak hỗn hợp, pandar rilo urang ngak. 

Ong Nguyễn Hữu Nguyên – Akaok Sở Kế hoạch saong Đầu tư tỉnh Đồng Nai brei thau: maong rah tapa, cak rok patagok bruk ngak kong nan jeng lac pren khang di tỉnh min chất lượng ngak kong oh ka glaong. Tukvak anak tal, dui pachreih bruk buh jien tame ngak meda hu salih bahrau: “Đồng Nai biak sangka tal bruk môi trường, kayua yau nan ye dom danak dak njauk hu duah thau palih ruah gah môi trường oh caik yau dahlau diah. Jalan buh jien tame ngak bahrau anak tal jeng salih bahrau, kapul nyaom urang ngak hu palih ruah jeng brei hu chất lượng”

Tỉnh Đồng Nai thau lac jalan ngak tal 2050 meda lac sa dalam dom labik cak rok patagok biak prong di taneh aia, ba akaok nao dahlau dalam bruk cak rok patagok bruk ngak kong ba mai yaom glaong, mek kinh tế hijao, kinh tế tuần hoàn nan lac pasak, ngak hu bruk phát thải trung tính “net zero 2050”.

Bí thư Tỉnh uỷ Đồng Nai Nguyễn Hồng Lĩnh ndom lac, cak rok patagok hijao nan lac jalan njauk ngak. Tỉnh hu đề án patrun khí carbon tal thun 2030, jalan pamong tal thun 2050. Sarak di Đảng bộ tỉnh 2 nhiệm kỳ hu ba tabiak bruk cak rok patagok hijao, khik caga alam môi trường. Tui ong Lĩnh, jalan ngak “net zero” njauk hu caik hatai sangka piah pamong tal: “Bruk taom gaok di khaol drei haong darak pasar dunya anak tal, meyah oh kham merat ka net zero ye meda pambak tal pandap panda di khaol drei nao tal dom labik dalam tukvak anak tal.”

Yam tame sa vaktu cak rok patagok bahrau, tỉnh ngak kong Đồng Nai brei hu bruk nao gam saong brei ba tabiak hatai caong khin ngan haong dom doanh nghiệp FDI dalam bruk salih bahrau bruk ngak kong meng sit sot, njaom nerak tapa jalan ngak bahrau, pandar salih số. Tui mata maong di doanh nghiệp, ong Surakij Kiatthanakorn – Akaok Công ty Cổ phần đô thị Amata Biên Hòa (daok dalam tập đoàn ngak po labik ngak kong Amata Long Thành) ndom lac: “Amata Long Thành hu sanya haong tỉnh Đồng Nai pamong tal dui pachreih dom urang buh jien tame ngak công nghệ glaong, pandar takik urang ngak, tự động hóa rilo saong siam ka alam môi trường. Jalan ngak hu ba tabiak nan lac dak padang Khu ngak kong Long Thành jeng khu ngak kong sinh thái”.

Dom doanh nghiệp FDI hu labik dang biak prong ngan haong bruk ngak kong di tỉnh Đồng Nai, nan lac pren khang piah jhul patagok kinh tế di tỉnh. Meng hatai saneng saong jalan ngak bahrau, Đồng Nai kham merat pasiam veik bruk dui pachreih piah cak rok patagok khang kajap./.