Dalam huyện Trảng Bom urak ini hu 11 chuỗi pambuak gauk ngak saong pablei pandap panda kaya nong, dalam nan hu 7 chuỗi pambuak gauk pala drak saong 4 chuỗi pambuak gauk raong glang. Sang ong Nguyễn Hồng Thanh hu labaih 1ha taneh. Dahlau daih ong pala ginup dom janih phun min năng suất oh glaong. Atah di ini 9 thun, ong Thanh salih abih tapa pala phun ca cao saong tut angan hu mbaok tame Kapul pambuak gauk ngak ca cao xã Trung Hòa. Meng ngak njauk ilamu kỹ thuật, pandar khak hữu cơ, bein ca cao di ong Thanh tuk halei jeng hu năng suất siam. Ong Thanh brei thau, meng tuk tame kapul pambuak gauk ngak ca cao xã Trung Hòa, ong oh daok huac oh hu labik pablei, tapa nan, daong ka sang ong sahanang hatai pala, ngak: “Phun jien buh tame takik, yaom jeng lap. Yau thun blaoh pala hu jaik 32 tấn, laba hu 150 triệu”

Đồng Nai bhian lac bhum pala ca cao praong abih di taneh ia. Min atah di ini labaih 10 thun, rahra dalam tỉnh ba gauk kaoh klaak phun ca cao kayua yaom kaom oh tani tanat. Meng tuk gah ngak nong tỉnh Đồng Nai tabiak jalan pambuak gauk di urang ngak nong haong doanh nghiệp ye phun ca cao hu pala veik. Urak ini, mblang hamu ca cao praong di tỉnh hu labaih 800 ha.

Ong San Thượng Minh, xã Phú Lợi, huyện Định Quán brei thau: Tuk pambuak gauk, doanh nghiệp ba tabiak dom kadha ka bruk iek glang, paik mek, nan ye paglaong năng suất phun pala, chất lượng baoh tuk halei jeng hu siam mekre. Gam haong nan, bruk pablei jeng hu doanh nghiệp dang tabiak: “Yaom kaom oh tani tanat, tuk yaom lap ye oh hu thei tame blei. Gah Cty hu mbaoh tangin pambuak bruk haong dahlak blei veik taong abih baoh haong yaom glaong jang duk saong yaom darak pasar”.

Tal urak ini, dalam tỉnh Đồng Nai hu labaih 200 chuỗi pala ngak saong pambuak bruk ngak nong haong labaih 160 doanh nghiệp, HTX saong jaik  15.000 sang urang nong hu mbaok tame. Bruk pambuak gauk ba mbuan lagaih ka karja dalam tacei ba ilamu, kỹ thuật, peih ngak dom sarak daong brei. Gam haong nan, peih tabiak jalan piah ngak jeng bruk pala ngak praong.

Ong Nguyễn Văn Thắng – Phaok Yam ndok Sở Ngak nong saong Patagok palei pala tỉnh Đồng Nai brei thau: Urak ini jeng daok hu dom bruk pambuak gauk oh catang, rahra eng drei klaak bruk pambuak gauk kayua kein laba di anak meta. Dom HTX oh ka ngak siam bruk di drei: “Palei njauk pathau khan, jak ba piah ka rahra thau cambaih bruk pambuak gauk lac jalan nao di urak ini dalam cakrok bruk ngak mbang kinh tế,  salih meng jalan sahneng lac ngak nong tapa kinh tế ngak nong”.

Ong Võ Văn Phi – Phaok akaok UBND tỉnh Đồng Nai brei thau: Tukvak tapa, urang pan akaok tỉnh Đồng Nai hu tacei pato dom puk palei pataom tame padang ngak cơ sở hạ tầng piah duh ka bruk pala, ngak. Dalam nan, hu kraong, ribaong, jalan mbak, điện. Gam haong nan, brei jhul khang dom bruk yau HTX, chuỗi pambuak gauk gam haong danak dak pandap OCOP. Ong Võ Văn Phi lac: “Dalam bộ tiêu chí palei pala bahrau, hu pataom tame bruk pala, ngak, hu dom puk palei pataom tame tacei pato, peih ngak biak siam. Nan ye, cakrok di gah ngak nong tuk halei jeng glaong jang duk haong kuhria rah tapa di taneh ia”.

Pambuak gauk pala, ngak, lac jalan nao piah cakrok bruk ngak nong bahrau, patagok yaom pandap, daong ka urang ngak nong hu jien mek tame siam jang, tani tanat jang. Anak tal, tỉnh Đồng Nai brei hu sarak pachreih ba, daong ka doanh nghiệp haong urang ngak nong piah ngak jeng rilo jang chuỗi pambuak gauk pala, ngak./.