Dalam langik la-an, labik ia kakuan lapih di tada mbuan ceik dalam tanrak hadah biar harei, sap caing yava tagok yaok ragam bangi pang meng Labik padeih padei Hồ Gia Trang Lâm Hà, Lam Dong. Vik taom dar apui daok ghuah bheng bheng, meng ragam tamia xoang gheih ghang, gam blieng bara khik ragam caing. Sap caing yava dui atah yau pahadar veik inem krung di rilo rai rah mukkei meng kal. Tuai damuai Phạm Thị Vân, chreih chrai: maong kapul caing di urang kamei me-in, bruk gheih ghang nan mboh dan dan min biak khang kadang:

"Kapul caing anek kamei hu thaik thaot me-in gheih ghang jang ngak ka sap caing nyu hlai bangi pang jang, pagam haong tamia xoang gheih ghang ngak ka kadha caing hu yava sap karei jang kapul me-in caing urang lakei; biak lagaih haong ilamo gauk amaik bhap bangi di urang bangsa K’ho”.

Me-in bhian harei harei di labik jirah rivang di Lâm Hà hu lac Kapul kong caing anek kamei Bồ Liêng. Kapul hu labaih 20 urang, dalam nan hu 6 urang me-in kong caing, daok dom ye lac urang tamia xoang. Yaok ragam tamia di yaom urang – meng ragam takai, gavang tamia xoang tal bruk blieng takuai tangin, ba palak tangin tame mbaok caing – jeng brei mboh ka bruk gheih ghang siam mekre. Oh lac sa janih gheih ghang dalam thaik thaot, blaoh daok gheih meng bruk gheih ghang dalam sap yava kong caing bangi pang, siam mekre. Urang kamei nghe nhan K’Phèn, urang dalam kapul caing urang kamei Bồ Liêng, daok di xa Lâm Hà, tinh Lam Dong, brei thau:

 “Dahlak hulin biak chreih takre kong caing di bangsa drei, ini lac ilamo bhap bini bangsa meng kal meng mukkei caik mai. Meng bruk chreih takre blaoh nyu mbang tame ralo darah meng tuk halei jeng oh thau. Tal ini dahlak hulin thau me-in biak rilo dom ragam caing urang bangsa K’Ho di drei”.

Dalam kapul caing Bồ Liêng, nghe nhan K’Phôn daok lac sa sap adaoh gheih ghang bangi pang. Amuk hadah mbaok meta brei thau lac:

 "Mai me-in caing atau pakacah di halei kapul caing urang kamei khol dahlak jeng taduan hu bruk meyaom di urang maong iek saong urang pang. Kayua dom adei sa-ai kamei me-in kong caing biak tani tanat, ragam yava ye hlai haong gauk, thau rilo kadha caing, gam haong khan ao bingula gheih ghang, brei ka urang maong iek urang pang mboh biak karei, biak kamei binai. Tukvak anak tal, khol dahlak pato ka dom kamuan urang kamei, dahlau abih lac dalam but pajaih brei hu sa rai rah sit thun umo piah patui veik bac pasram me-in kong caing. Dahlak hulin brei pato tapak ka anek kamuan, caong khin ilamo bhap bini di ong amuk meng kal daok hu khik hu miat miat”.

Tukvak tapa, Kapul caing urang kamei Bồ Liêng hu ba drei tame dalam rilo raya bhap bini, dom bingun raya, tet, harei raya adat di bangsa Viet Nam. Dom urang nan jeng hu dom labik jirah rivang di bhum palei “kakei dahlau” piah hu mbaok dalam dom danak dak jirah rivang bhap bini. Yaom lac di angaok mblang adaoh tamia halei, dalam labik halei, dom urang nan jeng khik hu bruk gheih ghang mbuan mbiah saong hatai iek praong haong kong caing – sa lambaok ka bruk ginreih dalam raidiuk ilmao di urang K’Ho. Bruk gheih ghang di kapul caing anek kamei Bồ Liêng tapen kraong Đạ Đờng hu daong pabak prein dui pavhreih haong gah jirah rivang Lam Dong. Ong  Nguyễn Văn Thạnh- Phaok Yam ndok Pasak Jitvu Tong hop xa Đinh Văn Lâm Hà, tinh Lam Dong brei thau:

"Tukvak tapa bhum palei hu pambuak hu dom tour jirah rivang ilamo, tuai damuai hu pang ilamo kong caing biak chreih takre. Ini jeng lac sa bruk piah ka bhum palei yaih khan ilamo kong caing ka tuai damuai. Langiu di nan, brei bruk ngak duah jien, dom urang nghe nhan hu jien mek tame piah pagam karo kajap haong bruk khik ramik ilamo bhap bini bangsa.”

Kapul caing urang kamei Bồ Liêng oh lac ngak meda ka ilamo siam gheih di kong caing bangsa K’Ho, blaoh daok rik tame bruk khik ramik saong patagok ilamo bhap bini, brei kein lagaih ka bruk patagok kinh te, xa hoi biak karo kajap ka bhum urang bangsa takik di Lâm Hà, Lam Dong./.