Blah facebook angan “H'Tuyết khan bai Jrai" hu yaok ribau mbang urang tui  iek, lac sa jalan yaih khan, daong ka sa-ai H'Tuyết daok di Tổ 10, Ban sit Phú Thiện, huyện Phú Thiện, tỉnh Gia Lai pablei meng 70 tal 100 đơn hàng, jien mek tame yaok pluh trieu ndong yaok bilan. Sa-ai Tuyết brei thau, di cửa hàng tuan bak 4 mbaok daning lac mac jhik saong khan ao jhik meng khan bai bangsa, sa-ai bhian livestream klak rabha dom bruk dalam raidiuk, hu tuk gam ngak gam daoh piah pachreih urang tui iek.

Khan bai Jrai hu sa-ai H'Tuyết jhik jeng dom blah ao atah, khan ngui cuk mbang ndam lakhah, ao ghi le ka urang likei, atau ao khan ka uranaih sit…njauk tui thaik thaot mau ma bo urang blei hu kakei dahlau. Meng nan, sa-ai hu ba bruk ngak ka 4 urang jeing jhik, jien mek tame 6 trieu dong yaok bilan saong  blei veik khan bai di dom nghe nhan daok di xã Ia Sol, huyen Phú Thiện ngak tabiak dalam rilo thun ini mai:“ Dahlak thaot saong quay phim peih online angaok facebook, Zalo, meng nan rilo tuai damuai thau saong duah mai haong dahlak. Urang payua tin nhắn, urang kakei blei pandap. Dahlak taduan hu khaw tin meng facebook, Zalo piah bac megru meng dom adei sa-ai di labik karei  yau Đăk Lăk, Lâm Đồng, Kon Tum...Dahlak biak thau dhar phol dom urang ngak tabiak mạng XH. Meng hu mạng XH daong dahlak bac mergu hu piah paglong bruk ngak. Jeng meng hu mạng XH bo rilo urang thau tal, payua tin nhắn mai saong kakei blei pandap oh lac tuai dalam negar bo daok hu gam tuai negar langiu”. 

Bruk gheih mekre di khan bai Gia Lai hu nha thiet ke Minh Hạnh - Yam ndoc sang tao Công ty Việt Mốt, lac urang ba ao atah, tơ lụa, khan bai bangsa di dom bhum palei dalam negar tabiak tal rilo darak pasar dunya, sangka saong yaih khan. Bahrau ini, dalam danak dak daoh tamia “Gia Lai lei”, kayua UB bhap bini tỉnh Gia Lai peih tabiak, mbang akok meti khan bai di urang Jrai, Bahnar hu urang thiet ke Minh Hạnh ngak jeng dom pandap  khan ao biak gheih karei nan lac khan váy, ao dhai ao tah, ngan haong 4 bilan lac: bilan ban bingu, bilan pandiak, bilan thu, bilan la-ar. Dalam nan, oh lac dom binguk angaok khan bai, bo thaot binguk ndung bak ilamu Tay Nguyen yau  sang rong, phun kayau praong  binguk ala ia craoh saong dom ghe gilai kayau…hu pagam tame gauk biak gheih angaok khan bai lụa, ngak jeng khan ao siam gheih biak karei.  Minh Hạnh – urang thiet ke khan ao khan lac, anak tal daok kuhria daong ka bai di dom bangsa takik di Gia Lai yam tabiak darak, piah ngak brei medeih tagok dom palei ngak meng kan dalam tỉnh:“Urang menyim biak tani tanat, bingu la di urang ndung bak makna raidiuk, biak gheih. Bruk akaok meti di khol dahlak lac caong khin ba yaom khan bai tagok glong. Bruk nan ngan haong khol dahlak lac biak mbuan, salih ka bruk mikva bangsa menyim merai tong hop ye khok dahlak kham pambuak piah menyim  dom blah khan bai  meng tơ lụa. Nan lac jalan ngak ka yaom khan bai tagok glong.   

Urak ini, tỉnh Gia Lai daok peih ngak rilo bruk piah pasiam veik, khik ramik saong pok meyaom dom ilamu meng kan, daong ngak brei kaya meda jang ilamu dom bangsa Tay Nguyen. Dalam nan, khik ramik khang kajap hu brei mboh tapa bruk patagok yaom glaong ilamu, pablei salih, daong ka urang menyim meda patagok kinh te. Muk Nguyễn Thị Thanh Lịch, Pho akok UB bhap bini tỉnh Gia Lai brei thau: “Khol dahlak caong khin pok meyaom dom nghe nhan, daong prein ka dom ayut ranaih umo piah khik ramik bruk ngak meng kan, pagam haong sahneng duah bharau. Kadua, khol dahlak caong khin yaih khan, piah ka dom urang roh duah ilamu, dom urang thiet ke khan ao piah ngak ka khan bai jeng janih pandap hu yaom kinh tế glaong, patagok kinh te ka bhap bini bangsa takik di tỉnh Gia Lai”.  

Meng bruk khik ramik dom yaom glaong khang kajap di khan bai gam haong bruk pambak tame yaom glaong ilamu, pablei salih, khan bai Gia Lai gam pachreih tuai damuai, gam ba mai jalan ngak mbang duah jien ka bhap bini bangsa daok dalam palei./.