Dom harei ini, mai tal dom tỉnh hu rilo mikva bangsa Khmer daok, kol drei mboh hu bruk chreih chrai, tuk sang halei jeng hu bah ramik hacih sa-at, ngak mekre papan kakuh piah caga siam di abih ka harei Sen Dolta.

Daok di dom baha Khmer jeng hu mikva tui agama Phat daong tun hala dok, bah ramik mblang baha, pasiam veik…ngak jeng sa labik gheih meta maong, pambuak haong phlieng ngũ âm ngak ka urang mboh bui sambai, chreih chrai...

Sa-ai Lý Hoành Thương, urang tui agam phật daok di baha Phù Ly 1, xã Đông Bình, ban sit Bình Minh, tỉnh Vĩnh Long brei thau, dom harei ini, harei halei sa-ai jeng nao tal baha kakuh Phat, pok lisei ka dom  ong bhik, dom achar, piah likau siam mekre ka muk-kei, ong muk, dom gauk tian metai lahik blaoh:

 “Dahlau di tuk ba lisei tame baha, pak sang dahlak cuh gilau di papan kakuh Phat saong papankakuh muk-kei, likau ka sang hu siam mekre. Hadei di nan, dahlak ba lisei tame baha ka dom ong bhik, dom achar saong likau siam mektre ka dom urang palang lahik. Dahlak jeng likau ka sang hu haniem phol, mikva tuk halei jeng anit ranam, daong gauk. Ini lac bruk siam gheih meng kal mai di bangsa Khmer tuk halei jeng hu khik ramik”.

Yaom lac Sen Dolta tok rah tabiak dalam 3 harei, min dahlau di nan jaik meteh bilan, tui prein di yaok baoh sang, yaok harei mikva thei jeng ngak lisei, dom kaya pandap mbang hu angan di bangsa pok tagok ka dom ong bhik, dom achar, likau siam mekre ka dom urang lahik. 

Ong Sơn Sết, daok di palei Phù Ly 2, xã Đông Bình, ban sit Bình Minh, tỉnh Vĩnh Long khan lac, sang ong saong mikva jaik taphia daok caga yuak padai He Thu, bilan ini yaom padai daok tani tanat di tanut glaong, nan ye sang ong raok Sen Dolta thun ini siam mekre jang, chreih chrai jang:

 “Yaom lac oh ka tal harei yuak padai min dahlak mboh padai siam, meda hu nang suat glaong, nan ye dahlak biak bui sambai. Urak ini yaom padai jeng tagok, meyah pala njauk, pablei hu yaom, urang ngak hamu chreih chrai lo. Langiu di padai ye sang daok hu jien mek tame meng bruk ngak bein saong jien mek tame meng bruk karei veik. Ini jeng lac bruk daong prein piah sang dahlak saong mikva raok harei Sen Dolta trei sir saong padang ngak dom adat duh ong muk hu ginup jang, khik ramik saong patagok adat cambat di bangsa drei”.

Harei Sen ĐônTa, dom urang dalam sang nao ngak mbang, bac megru atah  jeng samar drah mai sang cuh gilau hadar tal muk-kei, ong muk saong nao tal baha kakuh Phat. Ini jeng lac tuk piah adei sa-ai, mikva taom mbaok, tangi ravang gauk piah kak kajap talei gul pataom, pambuak gauk dalam bol bhap. Tapa nan, karja di dom tỉnh hu rilo mikva Khmer daok jeng hu padang dom kapul nao ravang tangi, alin hadiah pandap ka dom baoh baha, dom ong bhik, dom sang kan kandah…, daong palagaih ka taong abih mikva hu sa bilan Sen Dolta bui sambai, trei sir.

Xã Bàn Thạch, huyện Giồng Riềng, tỉnh Kiên Giang lac labik hu rilo mikva Khmer daok. Pakat ủy Ndang, karja saong dom kapul nyaom xã Bàn Thạch jeng sangka tal mikva Khmer. Tapa nan, piah pachreih ba mikva patagok bruk tmenyum ia hadar halau ia, jhul khang bruk pakacah gauk ngak tabiak, pablei salih, patagok bruk ngak mbang di sang…Ndom ka bruk ini, amuk Thị Mỹ Diên Hạnh, Phaok Akaok UB Bhap bini xã Bàn Thạch brei thau:

“Mikva Khmer daok di huyện Giồng Riềng saong daok di xã Bàn Thạch tuk halei jeng taduan hu bruk sangka di karja palei nan ye raidiuk di mikva hu patagok. Yaok thun, tuk tal Harei Sen Dolta, karja palei dalam tỉnh jeng padang kapul mai ravang tangi, alin hadiah pandap ka dom baoh baha dalam palei, sang sarak karja. Xã Bàn Thạch biak caik hatai sangka, daong sang mikva Khmer kathaot, jaik kathaot dalam puk palei…piah yaok urang, yaok sang ba gauk raok uan harei Sen Dolta haong hataI bui sambai, trei sir saong gul pataom. Dahlak caong lac, raidiuk di mikva dak harei dak ginup meda jang”.

Sen Dolta lac sa harei pataom mbaok praong dalam thun di mikva bangsa Khmer, ndung bak ilamo di bangsa, haong makna biak siam mekre, brei mboh bruk thau phol di anek taco haong muk-kei, ong muk, dom gauk tian lahik blaoh.

 Bruk bui sambai hu tagok jang rilo mbang, tuk dom harei ini, dom puk palei hu rilo mikva Khmer diukrai yam tame bilan yauk padai, pala njuak, pablei hu yaom, nan ye Harei Sen Dolta thun ini hu rah tabiak dalam bui sambai, trei sir, chreih chrai jang./.