Mentri Ngak nong saong patagok palei pala hu ba tabiak jalan ngak paglaong prein ngak brei ka labaih 620 HTX ngak nong patagok pagam yaom kaom saong jaik 200.000 baoh sang dalam bhum ngak Danak dak 1 trieu ha.

Tien si Trần Minh Hải, Phaok Hiệu trưởng Sang bac Sarak karja saong Patagok palei pala, Mentri Ngak nong saong Patagok palei pala brei thau, dom HTX di ĐBSCL dut haong 10 thun dahlau hu patagok, hu labaih 52% dom HTX mek hu siam saong gap mbiah. Min jeng hu brei parilo urang dalam HTX, patagok, kapul urang jakar pasang iek dalam HTX hu ginup prein ngak mayao mayit ka gah ngak mbang pablei salih. Langiu di nan jeng brei hu jien mesraiy gap mbiah harei, suai harei ka HTX, piah buh tame padang gilang padai, bayar jien padai ka rahra.

Mentri Ngak nong saong Patagok palei pala hu pambuak haong dom bhum palei pasang iek dak ha tang bhum ngak padai hu mbaok tame Danak dak; kuhria taong abih hatai caong ba tabiak jalan ngak bruk di dom tinh saong duah jien piah peih bruk buh jien tame pakajap ha tang dom gait gah ngak padai di 33 bhum pataom ngak padai di 12 tinh ĐBSCL. Ong Đặng Thanh Lâm, Phaok Akok Viện Quy hoạch kraong ribaong gah Meraong brei thau, dom bhum palei brei ngak cambaih laih dom bruk quy hoach, jalan ngak piah buh jien tame hu njauk, samu gauk haong binek kraong ribaong di bhum ĐBSCL, njauk dalam Danak dak 1 trieu ha.

"Ngan haong dom tinh ye brei hu dom danak dak cambaih laih dom bruk quy hoach meng sa danak dak ye bahrau hu ngak, hu kuhria ginup jang brei ka ky thuat piah ngak habar buh jien tame ka njauk saong samu haong he thong kraong ribaong bhum ĐBSCL. Urak ini bhum ĐBSCL padang labaih 26 bhum kraong ribaong sit hu praong labaih 30.000 ha tal labaih jaik 500.000 ha. Min tapi, hu labaih 13 he thong kraong ribaong jaik salah blaoh piah kol drei meda buh jien tame drah".

 PGS – TS Nguyễn Văn Hùng, Urang hu ilamo di Jabat Roh duah padai brah dunya IRRI brei thau, dom HTX, gah ngak mbang pablei salih brei padang bruk ngak, jalan ngak pablei salih tantu cambaih laih, ngak hu hatai je piah hu mesraiy jien siam lagaih. Gam haong nan hu bruk ngak kong, ngak njauk haong kein lagaih di yaok bhum karei, jhul tagok bruk brei pandar taka lek so piah daong pambuak urang ngak nong, pambuak haong urang ngak mbang pablei salih.

" Ngak kong nghe njauk haong yaok bhum palei, yaok labik cambaih laih biak hu angan makna ka 1 trieu ha, dom bruk pandar taka lek so piah daong ka gah pambuak bruk, pagap yau mon pambuak. Yau nan ye drei daong pambuak urang ngak nong nao tal darak pasar yau habar, bruk pablei salih, jalan ngak pablei salih yau habar piah urang payua ka gilang pariak, piah gilang pariak meda je tame hu, nan ye brei ka hu cambaih laih, nyu brei hu talei pambuak di urang ngak nong, darak pasar, dom yitvu mayao mayit vil taom dan".

TS Đặng Kim Sơn, urang Akaok Jabat Sarak karja saong jalan patagok gah ngak nong palei pala brei thau, langiu di dom kein lagaih ye kan kandah urak ini lac kurang jamraik mac moc pala tui talei, tui kapul. Piah taoh talaih dom bruk kandah ini brei hu dom sarak piah dom HTX, gah ngak mbang pablei salih hu mesraiy phun jien piah blei pandar jamraik ilamu, buh jien tame bhum ngak padai.

" Kol hulin dahlak sahaneng lac meyah jao prein khang nan ka HTX, ka dom gah ngak mbang pablei salih ba drei nao dahlau piah bo brei mesraiy tui chuỗi ye urang brei truh tapa tanut ini, kol dahlak brei peih praong danak dak nan tabiak jeng sa jayah praong saong tal tuk blaoh darak pasar hu tame bruk, bruk di darak pasar hu pandar yau ye  lac sa bruk jak jeng bahrau hu rah tabiak di ĐBSCL yau kol dahlak hulin hu jak jeng dalam 1 brei ngak 5 brei trun dalam dom bruk dahlau daih di ĐBSCL".

Dalam mbang padai Thu - Đông 2024 saong Đông - Xuân thun 2024-2025 Danak dak 1 trieu ha padai asar siam, patathuak nerak biar di bhum ĐBSCL hu peih praong di dalam 12 tinh, ban bhum ĐBSCL piah dak harei dak paglaong jien mek tame di bhap bini rahra, randap haong bruk langik salih karei, daong ngak dom pagun sanya ka bruk trun patathuak nerak baoh sang kreih camin./.