Bruk ngak ia mesin Phan Thiet hu meng dom thun puac abap XVII. Dalam dom yaok pluh thun jaik ini kayua bruk patagok ban medin saong bruk patagok di jirah rivang, rilo kongti ngak ia mesin hu padang tabiak saong hu jalan ngak karei jang dut haong bruk ngak ia mesin bhap bini. Yaom lac yau nan, jeng daok rilo kongti, labik, baoh sang daok khik tani tanat bruk ngak ia mesin bhap bini.

Amuk Phạm Thị Tuyết Lan, Phaok Yam ndok Kongti Ia mesin Cá Đen, Phuong Phú Thủy, tinh Lam Dong (lac tinh Binh Thuan klak) brei thau, angan je Cá Đen bahrau padang tabiak di hadei ini. Dahlau diah Phan Thiet danei angan haong ia mesin Bà Đâu, amuk Hoàng Hoa…

"Ia mesin Cá Đen hu padang tabiak di hadei ini, khol dahlak hulin bahrau ngak meng thun 2018, thun 2019 meng nao tal tangin di urang pandar. Angan hu daok tal harei ini hu ieu lac ia mesin bhap bini Phan Thiet ye dom urang meng dahlau nan ngak dahlau saong ngak biak siam, biak bangi. Dahlak hulin khin ndom lac drei lac urang hadei ini, min hatai caong di dahlak hulin jeng khin yau nan, jeng khin ba nao tal tangin urang pandar grauk labik dalam dunya di halei jeng thau ia mesin Phan Thiet lac ia mesin bhap bini biak bangi, hacih sa-at saong siam."

Tui Kapul Ia mesin Phan Thiet, ban Phan Thiet klak hu labaih 200 labik ngak ia mesin, yaok thun ba tabiak darak pasar labaih 22 trieu lit ia mesin hu jien mek tame jaik 1.000 ty dong, brei bruk ngak ka 400 urang ngak bruk saong yaok ribau urang ngak bruk tui tukvak. Bruk ngak ia mesin jeng pablei labaih 22.000 tan ikan sa thun, daong urang nao tasik khik tani tanat bruk di drei.

Ong Trương Quang Hiến, Akaok Kapul Ia mesin Phan Thiet brei thau, angan je ia mesin Phan Thiet dut haong dom bhum karei lac hu sambo bar kanyik pong atau hu ia bar bableik; jangaih, hu riyak, mbau pahe, yamen rilo kayua hu ia mbak di rilo ikan glaong.

"Viet Nam hu dom labik ngak ia mesin rilo. Min ia mesin Phan Thiet jeng hu labaih 300 thun paje. Kayua habar drei oh ngak harak piah likau angan drap ar ilamo oh mboh di meta ngan haong ia mesin ye bruk ini lac bruk kurang di Kapul. Njauk lac bruk ini drei brei ba tagok suai paje, tal urak ini ka meng mboh yaom kaom di nyu  biak njauk hu piah ngak."

Tui So Ilamo, Phat padhih saong Jirah rivang tinh Lam Dong, bruk ngak ia mesin tui mukkei yau meng kal di Phan Thiet khik kajap dom asal kadha padang Harak ilamo ba tagok Mentri Ilamo, Pahat padhih saong Jirah rivang pasang iek, ba tame Harak angan drap ar ilamo oh mboh di meta pakat negar tui adat.

Ngan haong bruk ngak ia mesin labaih 50 thun, ong Nguyễn Hữu Dũng, Yam ndok Kongti TNHH Ia mesin Bà Hai (Phuong Phú Thủy) brei thau, ong biak mboh bui sambai tuk pang hu khau tin ini, kayua ini lac bruk piah patagok kein lagaih hu angan di bhum taneh.

"Angan je ia mesin Phan Thiet jeng hu suai lavik, rilo thun paje. Asal kadha OCOP drei hu, pato tacei labik taneh drei jeng hu, gam haong bruk lagaih di labik tapen tasik piah ngak gah jirah rivang yau ini biak siam. Min piah hu brei angan ye brei hu bruk kham merat di taong abih dom gah karja, daok di gah labik ngak ye dom kongti daok ngak ia mesin, khol drei ngak ka nyu siam jang, meng nan drei paglaong hu angan je di nyu dak harei dak hu pambak tabiak atah jang."

Bruk ngak ia mesin Phan Thiet oh lac danei angan blaoh daok hu yaom kaom glaong brei ka bruk ngak mbang kinh te, jien mek tame meng bruk ngak ia mesin tagok tal yaok ribau ti dong dalam sa thun saong daong jhul tagok kinh te – xa hoi bhum palei patagok.

Meng dom yaom kaom nan, bhap bini rahra saong dom gah ngak mbang pablei salih caong takre “Bruk ngak ia mesin yau mukkei di Phan Thiet” brei hu ba tame Harak angan ilamo bhap bini pakat negar thun 2026./.