Jalan Nguyễn Hữu Trí, xa Thanh Phú, huyen Bến Lức, pabah mbang pambuak tinh Long An haong huyen Bình Chánh Ban Raya HCM tukvak masa tapa biak chreih  jang haong dom ralaoh jalan mbak ngak meng baoh radaih. Dom dam dara di bhum palei hu pataom dom baoh radaih o to, baoh radaih patuh klak, ngak brei hacih sa-at blaoh sơn gilac.

Tui yaok baoh radaih, dom urang dam dara rami ramik vak asal kadha pathau khan yau: “Dang radaih anak gom bhong - brei mboh ilamo di drei”, “Caik hatai pasang iek!”, “Oh nduac samar”…tauk tagok bi-ar khang Foam hijao saong pagam biak gheih meta. Dom ralaoh ini caik di dom jalan vaih, dom labik jalan canah klau, canah pak, kayua yau nan ye bo ngak trun manieng biak rilo bala jalan mbak.

Ong Trần Văn Thanh, urang daok di bhum palei bhian nao mai di jalan ini ndom lac, hadei di 2 thun, labaih 70 ralaoh jalan mbak meng baoh radaih hu ba mai siam lagaih dalam bruk paglaong ilamo peih nduac radaih di jalan mbak, abih di nyu nan lac dom labik jalan hu radaih nao mai rilo haong rilo sang bac:

“Dom ralaoh ini gam gheih gam mbuan maong boh, ngan haong dom jalan vaih labik oh maong mboh hu ye brei ramik padang ngak rilo jang di dom labik mbuan maong mboh piah mikva nao angaok jalan hu salamat jang. Mikkva mboh ralaoh jalan mbak yau nan jeng pathau khan ka gauk, piah hu salamat jalan mbak hu siam lagai.”

Di xa Mỹ Lộc, huyen Cần Giuộc, tinh Long An, meng thun 2022 tal ini, kapul dam dara xa ngak hu labaih 150 ralaoh jalan mbak pathau khan, kakei ka urang peih nduac radaih di jalan praong hu rilo radaih nduac nao mai di xa. Bruk ini jeng hu peih praong ngan haong yaok rituh ralaoh jalan mbak di dalam huyen Cần Giuộc. Sa-ai kamei Nguyễn Thị Hồng Thủy, Bi thu kapul xa Mỹ Lộc, huyen Cần Giuộc brei thau:

“Ralaoh di Karja ye rilo meng lac ký hiệu bo oh hu akhar, mikva dalam palei pala rilo urang jeng oh ka hu thau tani tanat, nan tuk ngak ralaoh jalan mbak hu akhar haroh mikva puac akhar saong thau chip bruk kakei di ralaoh jalan mbak saong biak pachreih tui bruk ngak ini. Dahlak Caong ka bhum palei patui veik peih ngak rilo jang di dom labik jalan dalam bhum palei”

Tukvak masa tapa, bala di jalan mbak rahtabiak di Long An mboh rilo salih bahrau. Min bala jeng daok rilo. Kong an, Mban Salamat jalan mbak tinh paglaong bruk pasang iek, pathau khan langyah dom bruk ngak suan adat hukum tuk peih nduac radaih di jalan mbak, peih ngak dom jalan langyah ka gah ilamo peih radaih piah ngak trun manieng bala jalan mbak.  Gam haong nan pambuak haong So Pato Megru, Tinh doan peih ngak dom bruk samu haong bruk anak meta yau: Mbang jang sang bac salamat, daong anek saih pakacah piah mek harak adat nduac radaih, phiên tòa xét xử ngak iek dom bala di jalan mbak…piah paglaong ilamo di rahra.

Ong Nguyễn Hoài Phong – Uỷ viên Thường trực Mban Salamat Jalan mbak tinh Long An brei thau: dom gah, dom pakat meda pataom prein tame bruk pasang iek, pasiam veik dom bruk pataom darak pasa, lih tame mbaok jalan di dom labik ngak kong: Salamat jalan mbak tỉnh Long An cho biết:

“Harei hadei Uy mban Bhap bini tinh jeng hu pato tacei saong dom kapul hu pambuak tal peih ngak dom jalan ba tabiak piah khik tani tanat salamat jalan mbak. Dalam nan hu So Cong thuong. So ini daok roh duah ramik dom labik pablei salih lagaih di dom labik ngak kong. Tapa nan jeng daong ngak habar piah rahra pablei salih saong urang blei pandar jeng hu lagaih piah blei pandar bo jeng khik kajap salamat jalan mbak”       

Piah paglaong jang bruk khik kajap karo siam mekre salamat jalan mbak dalam tukvak anak tal Uy mbang Bhap bini tinh Long An brei langyah dom labik mbaih mbaoh, dom labik jhak, patakik bruk gakgar jalan; peik ngak dom bruk khik kajap salamat jalan mbak di dom jalan nduac samar; pathau khan tui jalan bahrau, parilo bruk paglaong ilamo di rahra tuk peih nduac radaih di jalan mbak saong pasang iek catang bruk pajeng ba tuai damuai./.