Dom harei ini, yau dom labik karei di Tây Nguyên, bhum taphia negar Thuận Hạnh, huyện Đắk Song, tỉnh Đắk Nông daok chreih chrai tame bilan paik cà phê. Labik taphia negar atah bayah, urang mbang pah paik cà phê pataom mai biak rilo, min di pak ini oh hu dom tệ nạn xã hội. Sa-ai Nguyễn Thị Trang, daok di palei Thuận Bắc, xã Thuận Hạnh, huyện Đắk Song, brei thau: “Tuk tame bilan paik cà phê, paik amriak kalu njauk pah menuac paik ye kol dahlak hu khan brei công an xã atau đồn biên phòng thau ka dom menuac pah nan. Meyah hu menuac karei tame ye kol dahlak khan brei  đồn biên phòng daok jaik di abih thau.”

Rah tui jalan tapen negar atah jaik 20km di xã Thuận Hạnh hu biak rilo hamu, puh di bhap bini pala ngak meng lavik mai. Sa-ai Y Quyết, bangsa Mnông, daok di bon Sapa, xã Thuận An, huyện Đắk Mil, ngak cà phê di labik tapen negar Thuận Hạnh khan lac, yaok rahra tuk nao ngak puh jeng thau pambuak haong bộ đội biên phòng dalam bruk khik iek jalan tapen negar, cột mốc: “Sang dahlak hu puh daok pak ini, di labik puh jeng hu cột mốc. Tuk nao puh ye dahlak bhian ngak hareik ka nyu hacih labik vil val cột mốc. Meyah mboh menuac oh randap tame labik tapen negar ye kol dahlak khan brei bộ đội biên phòng thau. Bộ đội biên phòng nao khik iek gam gam ye kol dahlak jeng sahanang hatai ngak hamu ngak puh di labik ini.”

Bhum tapen negar Thuận Hạnh hu 13 bangsa daok. Piah padang thế trận biên phòng dak harei dak khang kajap, Đồn biên phòng Đắk Song hu pambuak haong karja palei padang tagok saong khik ramik bruk ngak di 9 kapul khik iek jalan tapen negar, cột mốc saong 11 kapul eng drei khik iek puk palei. Meng bruk daong prein di bhap bini, bo dom thun jaik ini, di xã Thuận Hạnh oh hu urang halei tame negar suan hukum.

Tui Trung tá Lương Đình Hùng, Chính trị viên Đồn biên phòng Đắk Song, tỉnh Đắk Nông, thau lac khik caga khang kajap bhum tapen negar oh lac bruk di ta-eng bộ đội biên phòng bo daok lac bruk di abih rahra, brei pagam pambak tame prein khang di bhap bini. Kak kajap haong rahra, Đồn gam gam caik hatai sangka tal raidiuk, daong ka mikva bhum tapen negar. Gam haong nan, ngak siam bruk tham mưu, gam haong karja palei jhul khang bruk abih bhap bini khik iek jalan tapen negar, cột mốc, abih di nyu lac dom sang daok diukrai atau hu taneh pala ngak di tapen negar: “Kol dahlak thau lac, langiu di dom bruk biên phòng ye kol dahlak pagam pambak tame bol bhap rahra, kayua rahra lac menuac ngak po dalam khik iek bhum tapen negar, bộ đội biên phòng lac gah nòng cốt chuyên trách. Yaok thun, kol dahlak hu pambuak bruk haong karja xã peih ngak rilo bruk ilamu daoh tamia saong pataom iek veik 1 thun peih ngak bruk abih bhap bini khik caga quyền ngak po bhum tapen negar piah gam haong bhap bini ngak siam bruk khik caga siam mekre, sron mbon bhum tapen negar.”

Urang dang akaok Đồn Biên phòng Đắk Song daok brei thau lac, “Abih bhap bini hu mbaok tame khik caga quyền ngak po taneh ia, sron mbon bhum tapen negar dalam tukvak bahrau” brei hu pambuak haong bruk pakacah gauk anit ranam taneh ia saong padang ngak palei pala bahrau, jhul patagok kinh tế, paglaong raidiuk bhap bini. Anak tal, Đồn Biên phòng Đắk Song daok brei pambuak bruk khang kajap haong pakat ủy, karja palei, dom mban ngành, kapul nyaom piah pathau khan, jak ba, daong ka bhap bini cakrok KTXH, patruh eik, patrun kathaot, rik daong dak padang quốc phòng abih bhap bini khang kajap./.