Palei Xóm Bằng ieu lac sa labik daok kan kandah abih di xa Ninh Hải. Min, dom thun jaik ini, Xom Bằng – labik hu maong lac bhum dhaong biar kathaot rambah hu “salih mbaok meta” oh lac uak drei tagok “samu haong labik karei” bo daok jeng sa dalam dom labik naih gheih ka bruk patruh eik patrun kathaot di xa Ninh Hải. Kadha ini mai meng bruk mikva Raglai daok di ini salih tapa pala Nya ndam piah pablei tabiak langiu negar. Ong Mang Min brei thau:

‘’Meng gah ngak mbang pablei salih pataom blei abih kaya ndap nda. Meng nan, phun nya ndam pablei tabiak langiu negar ye mikva biak chreih chrai ka bruk ngak jeng yau hu jien pandar ka raidiuk. Mikva biak bui Nya ndam hu pablei tabiak langiu negar, ini jeng lac bruk daong prein piah peih praong veik bruk pala phun Nya ndam”.

Meng sa janih phun hu maong lac “oh hu makna”, nya ndam urak ini hu ma-om hijao dom bhum taneh cuah thu lagu, ba mai mbaok meta ka palei pala Khanh Hoa. Amuk Phú Thị Hồng Duyên, Phaok Akaok UB Bhap bini xa Ninh Hải, tinh Khanh Hoa ndom meyai lac:

‘’Nya ndam hu pablei tabiak 27 negar dalam dunya, dom gah ngak mbang pablei salih pataom blei tani tanat. Meng nan, rahra jeng sahnang hatai ngak mbang. Bruk ini jeng ngak ka rahra chreih chrai kayua hu blei abih haomng yaom lagaih. Meng nan, kinh te di rahra jeng tani tanat”.

Oh lac di palei Xóm Bằng, xa Ninh Hải blaoh daok di palei Nha Húi, xa Mỹ Sơn hu taneh pala Nya ndam jeng praong labaih 20ha. Klau thun dahlau, amuk Hoàng Thị Dung daok di palei Nha Húi, xa Mỹ Sơn, tinh Khanh Hoa gaok khat lahik kayua pala tangei saong ritak. Mboh phun nya ndam brei jien mek tame glaong, gilac hu darak pasar langiu negar takre nan amuk Dung hu salih 3 sao taneh di baoh sang tapa pala nya ndam piah pablei tabiak. Amuk Dung kuhria, dom phun pala karei yaok thun hu jien mek tame meng 30 tal 50 trieu dong/thun min meng tuk pala Nya ndam, jien mek tame tagok labaih 100 trieu dong/thun.

‘’Khol dahlak hulin biak mboh hadah mbaok meta saong chreih chrai tuk Nya ndam khol dahlak njauk tanut pablei tabiak langiu negar. Khol dahlak biak bui sambai saong kham merat jang veik.

Gam haong bruk patagok meng pala phun nya ndam, rilo ayut cuai daok hu mbaok tame ngak kong di dom kongti ngak nya ndam dalam bhum palei. Kongti Kaya mbang Cánh Đồng Việt. Sa-ai Nguyễn Thị Hà daok di phuong Bảo An brei thau: “Dahlau diah bruk ngak oh tani tanat, meng tuk ngak kong di Kongti Kaya mbang Cánh Đồng Việt ye hu bruk ngak bhian, jien mek tame tani tanat jang biak rilo:

‘’Tuk ndap nda Nya Ndam hu pablei tabiak langiu negar ye jien mek tame di adei saong dom adei sa-ai jeng hu tagok biak rilo. Adei ngak jien bilan hu tagok 8 trieu dong. Nyu daong biak rilo saong lagaih ka radiuk di adei jeng yau adei sa-ai ngak kong dalam tukvak ini”.

Phun nya ndam hadei di tuk paik hu gah ngak mbang pablei salih pambuak pataom blei saong langyah meng sa jalan ilamo kong nghe bahrau ngak tabiak dom ndap nda pabak dom tanut chuan piah pablei tabiak darak pasar di labaih 27 negar, bhum negar. Tal ini, Nya ndam hu pablei tabiak 5.000 tan ndap nda haong kim ngach mek hu labaih 2,5 trieu USD. Ong Nguyễn Đức Thuận, Yam ndok Kongti Kaya mbang Cánh Đồng Việt, tinh Khanh Hoa brei thau:

‘Kongti likau brei lek taka ma so bhum pala, brei thau angan dom bhum pala. Meng nan, duh bruk duah thau ka bhum palka, pato ba bhum taneh ka phun nya ndam di tinh Khanh Hoa. Tukvak mai meng anak tal, khol dahlak hulin pataom meng dom Farm, dom bhum pambuak, meng bruk pala tui Vietgap, Globalgap, salih tapa huu co Organic mek hu dom harak mbaoh tangin pakat dunya piah peih praong saong patagok labik dang ka phun nya ndam, brei yaom kaom karo kajap ka phun nya ndam patagok di bhum atah bayah, bhum urang bangsa takik saong brei bhum pandap tamo ka sang jamraik mac ngak kaya kan”.

Rilo taneh klak balau hu ma-om kayau hijao. Kadha phun Nya ndam piah pablei tabiak langiu negar brei mboh, tuk duah njauk phun pala lagaih, hu bruk pambuak di gah ngak mbang pablei salih saong hatai kham merat di rahra ye yaom lac di bhum taneh kan kandah, rahra jeng meda uak drei tagok patruh kathaot saong ngak meda di palei pala drei./.